Kwengibwa kumbusa kwa kubuta
12
1 Yehowa abwide Musa bunee: 2 “Tenda ku baIsraeli bunee: ‘Mukikulu ndi eka iyimi nu kubuta mwana wamulume, aganzwe mwiya nsese bindi mutubakamo, anga bweli nsese ku bindi bya mwezi wage. 3 Ku kindi kya kinana nti mwana wamulume amonesibwe. 4 Mukikulu tondo asigale bingo bindi makumi masatu nu bisatu mu kwengibwa ku mikila zage. Aaba nu bindi bibyo binsania byasila, nteitubye ku kintu kimozi kyasililila, nu ntende ku Numba Zasililila. 5 Tondo ndi abuta mwana wa mukazi, nti aganzwe nsese mazinga mabili, anga bweli nsese mu bindi bya mwezi wage. Nu alindile bindi makumi mutuba nu mutuba lwabusio lwa kwengibwa ku mikila zage. 6 Gakuke bindi bibyo bya kumwengia ku mikila zage, busi bubo avwe ku sankoga uli ga mwingilo wa Numba za Kukulumana na kyana kya mukoko kya mwaka umozi kili kayulo ka kugisibwa nu kyana kya nkulimba aba kilinga kili kisansa kya bwagi. 7 Sankoga abikasane ku Yehowa kukitila mukikulu bukulumania, nu engibwe ku mikila zage. Mamano meli makakizio ma wabuta mwana wamulume aba mwana wamukazi.
8 Ndi bikulo byage tabyakuka ku kyana kya mukoko, nti avwe na nkulimba ibili aba byana bibili bya kilinga, kimozi kya kayulo ka kugisibwa nu kingo kili kisansa kya bwagi. Bubo u bwamukitile sankoga bukulumania, nu mukikulu nti engibwa.’”