Makakizio ma bibali
13
1 Yehowa atendile ku Musa nu Haruni bunee: 2 “Ndi muntu unsania eli na kibimba aba kyulu aba kizwalo aba kabalibango kenga ku kikoba kyage kakwigilana a ku ungo muntu, nti alusibwa ku Haruni aba ku sankoga uli wa bana bage. 3 Sankoga alole ku kyulu kili mu kikoba kya wozo muntu, nu ndi myoza zili mu kyulu zagaluka kuba zenga, nu ndi kyulu kyamoneka kili kunsi kwa kikoba, nti kili anga bibali, nu sankoga gaakubimona atende buno wozo muntu ntenga. 4 Nu kabalibango keli mu mubili wage, ndi kenga tondo takamoneka kutinga kikoba nu myoza zako tazenga, nti sankoga abike wozo muntu ku kiziki kimozi buno eikale mukyo wenyenenyene bindi mutubakamo. 5 Ku kindi kya mutubakamo sankoga amulole lingo, nu ndi amona buno kabalibango takagaluka tondo keli anga bukabezaga, nu takakwendelela aba kakeke, nti amusubye ku kiziki kikyo kya kwikala wenyenenyene bingo bindi mutubakamo. 6 Lingo ku kindi kya mutubakamo sankoga amulole, nu ndi kyulu kyalinga kukokoka nu takikwendelela mu kikoba kya muntu, nti sankoga atende buno enga, kili kyulu tugu. Muntu wozo asuge nsulu zage, nu kumbusa kwakukita bubo nti enga. 7 Tondo ndi kyulu kyendelela mu kikoba kya muntu kumbusa kwa kwidolesia ku sankoga buno atendwe enga, nti atunganana kwidolesia lingo ku sankoga. 8 Sankoga amulole lingo, nu ndi kyulu kyendelela mu kikoba kyage, nti atende buno wozo muntu ntenga, eli nsese, kubuno kili bibali. 9 Nkungu zili muntu unsania na kyulu kya bibali, nti alusibwe ku sankoga. 10 Sankoga amulole, nu ndi kuli iduma lyenga mu kikoba nu myoza zalyo zagaluka kuba zenga nu mulyo misuna mibisi zamoneka, 11 nti luli lusambo lubi lwa kikoba nu sankoga atende buno ntenga. Ntamubike ku kiziki kumulanga wenyenenyene kubuno ntenga.
12 Nu bibali ndi byabasa ku mubili wage unsania, nu ndi sankoga amona buno bili ku kikoba kinsania kya muntu utenga ku kabamba ka bibali, nu byamukukila kutukila ku itoe nu kubasa ku masindi, 13 kungwa sankoga amulola nu bibali byakukide mubili wage unsania, nti amutendela buno enga. Kubuno bibali byenga mu mubili wage unsania, nti muntu wozo enga. 14 Tondo kungwa misuna zamoneka mibisi, nti ntenga. 15 Ndi sankoga amona ku misuna mibisi, nti amutendela ntenga. Misuna mibisi tazenga, zili nsese, nu wozo muntu eli na lusambo lwa kwigilana. 16 Ndi misuna mibisi zagaluka nu kuba zenga, nti asubye ku sankoga, 17 nu sankoga amulole, nu ndi byulu byagalukile kuba byenga, nti sankoga atende buno wozo muntu eli wenga, nu we enge.
18 Lingo, ndi muntu eli na kibimba mu kikoba kyage, nu kyona, 19 nu ku mukolu wakyo kwaba ikuku lyenga aba itondoki lyenga nu lyakisimana lyamoneka, nti wozo muntu ende kwidolesia ku sankoga. 20 Sankoga agulole, nu ndi lyamoneka buno lyatinga kikoba nu kubasa ku misuna kunsi kwakyo, nu myoza zago zagalukile kuba zenga, nti sankoga atende buno ntenga, eli nsese. Kuli lusambo lwa kikoba lwa kwigilana lwabasile ku mukolu wozo. 21 Tondo kungwa sankoga amulole, ndi takuli myoza aba nzwili zenga nu kyamoneka buno takikwingila kutinga kikoba, tondo kwenga kwalinga kutuka, nti sankoga amubika mu kiziki kya kumulanga wenyenenyene bindi mutubakamo. 22 Kumbusa kwabyo, ndi kyendelela mu kikoba, sankoga amutendele buno ntenga, kubuno luli lusambo lubi lwa kikoba lwa kwigilana. 23 Tondo ndi itondoki lilyo talyagaluka nu talyendelela mu kikoba, nti lili mukolu tugu wa kibimba, nu sankoga amutendele buno enga.
24 Ndi muntu agisibwa ku kiziki kimozi kya kikoba kyage, nu mu kiziki mwamoneka itondoki lyakisimana aba lyenga mu misuna za kiziki kyagia, 25 nti sankoga alole ku kiziki kikyo, nu ndi amona buno myoza zakyo zagaluka nu zenga, nu kiziki kyamoneka kutinga kikoba nu kwingila ku misuna kunsi kwakyo, nti mu kiziki kyagia muli lusambo lubi lwa kikoba lwa kwigilana, nu sankoga amutende buno ntenga ku kabamba ka lusambo lulo lubi. 26 Tondo kungwa sankoga akilola, nu ntamona mukyo myoza zenga nu kiziki takikwingila mu kikoba ku misuna zili kunsi, tondo kwenga kwalinga kutuka, nti sankoga amubike mu kiziki kyage wenyenenyene bindi mutubakamo. 27 Ku kindi kya mutubakamo sankoga amulole lingo, nu ndi itondoki lyendelela mu kikoba, nti sankoga amutendele buno eli nsese, ntenga. 28 Tondo ndi kiziki takyagaluka nu takyendelela mu kikoba, tondo idangi lyakyo lyalinga kuba anga kingo kikoba kya muntu, nti kili iduma mu mukolu wa kiziki kyagia, nu sankoga atende buno muntu wozo enga, kubuno guli mukolu tugu.
29 Ndi wamulume aba mukikulu eli na kyulu g'itoe aba ku kanteluntelu kage, 30 sankoga amulole, nu ndi kyamoneka buno kingila munda kutinga kikoba nu mukyo muli nzwili zakega z'idangi lyagaluka aba luzelu lwagaluka idangi, nti sankoga atende buno ntenga, kubuno kuli binkungu, u lusambo lubi lw'itoe aba lwa kanteluntelu. 31 Tondo kungwa sankoga alola ku kyulu kya lukita lulo, nu kyamoneka buno takingila munda kutinga kikoba nu takuli nzwili zina mukyo, nti sankoga amubika mu kiziki kya kwikala muntu wenyenenyene tugu bindi mutubakamo, 32 nu ku kindi kya mutubakamo amulole lingo, nu ndi kyulu takyendelela nu takuli nzwili zaluluka nu takyamoneka buno kingila kutinga kikoba, 33 nti muntu mwiya binkungu abegwe, tondo ntabegwe ku kiziki kya binkungu, nu sankoga amubike ku kiziki kya kwikala wenyenenyene bingo bindi mutubakamo. 34 Ku kindi kya mutubakamo sankoga alole lingo ku kyulu kya binkungu, nu ndi takyendelela mu kikoba nu takyamoneka buno kyatinga kwingila misuna kunsi kwa kikoba, nti sankoga amutendele buno wozo muntu eli wenga. Asuge nsulu zage, nu abe wenga. 35 Tondo ndi binkungu bibyo byendelela mu kikoba kya wozo muntu watendilwe buno enga, 36 nti sankoga amulole lingo, nu ndi binkungu bili mu kikoba nu byendelela, nti sankoga ntanalonda nzwili zaluluka, nu wozo muntu eli nsese, ntenga lingo. 37 Tondo, kungwa sankoga asongolola buno kyulu takyagaluka nu nzwili zina zili mukyo, nti binkungu byona, nu muntu enga, nu sankoga amutendele buno enga. 38 Kungwa wamulume aba mukikulu eli na matondoki menga ku kikoba, 39 nti sankoga amulole, nu ndi matondoki makulukusa tugu, tamenga nunsania, nti taluli lusambo lukali ku kikoba kyage, luli tugu lusambo lwa matuti mu kikoba, nu muntu wozo eli wenga.
40 Ndi nzwili za muntu zatuka ku itoe lyage, nti eli na kisegesege tugu, nu we wenyene eli wenga. 41 Ndi nzwili zili ku malanga mage zatuka ku lwabusio lw'itoe, nti eli na kisegesege kya malanga, nu wenyene eli wenga. 42 Tondo ndi eli na kyulu kyakisimana nu kyenga gamozi na kisegesege kyage ky'itoe aba kya malanga, nti luli lusambo lubi lwa kwigilana lwalinga g'itoe aba ga malanga. 43 Sankoga amulole, nu ndi kyulu ky'iduma g'itoe lyage aba ga malanga mage kili kyakisimana nu kyenga gamozi, 44 nti wozo muntu eli na bibali nu ntenga. Sankoga amutendele buno ntenga ku kabamba ka kyulu kili g'itoe lyage.
45 Muntu mwiya bibali aba lungo lusambo lukali lwa kwigilana atunganana kwata nsulu zage, nu nzwili zage taziseswe, nu akukile milomo zage, nu kulalukaga bunee: ‘Mwiya nsese! Mwiya nsese!’ 46 Bindi binsania byeli na lulo lusambo ntenga, nu eikalage wenyenenyene mu kiziki kyage kili ku isula lya mwino.
Makakizio ma mbubu
47 Ndi mu nsulu muli itondoki lya mbubu, ndi nsulu za myoza aba za kitani, 48 ndi zalukwa na myoza aba na kitani, mu nkita insania za kuluka nsulu, aba ndi mu nsulu za kikoba aba mu kinsania kyakitwa na kikoba muli mbubu, 49 nu mu nkita insania za nsulu za kuvwala, nu mbubu zili zakisimana aba z'idangi lya mazi ma sombe, nti zili mbubu mbi zikwitila, nu nsulu zili nazo zalolesibwe ku sankoga. 50 Nu sankoga alole ku mbubu nu kubika mu kiziki kyakusigala nsulu zenyene tugu bindi mutubakamo. 51 Ku kindi kya mutubakamo azilole lingo, nu ndi mbubu zitila mu nsulu aba kikoba, nti nsulu aba kikoba zili nsese, ta nsoga, kubuno zili mbubu zikubigia. 52 Nu agisie nsulu, ta kitondo kya misinge za kima na za bungulu, nu ta kitondo kya lukita lwa nsulu, ndi kitani, myoza aba kikoba, kubuno mbubu zezo zikubigia nsulu, nu nsulu zagisibwe.
53 Tondo ku kindi kya mutubakamo, galole sankoga ndi mbubu tazitila nu misinge za kima aba za bungulu mu nsulu za kitani aba myoza aba kikoba, aba kinsania kyakitwa nunsania na kikoba, 54 nti sankoga akakizie buno basuge nsulu zili na mbubu, nu kuzisubya ku kiziki kya kuzisiga zenyene bingo bindi mutubakamo. 55 Kumbusa kwa kusuga nsulu zili na mbubu, sankoga azilole lingo ku kindi kya mutubakamo, ndi mbubu tazagalukile tondo zili bumozi anga buzabezaga, nti nsulu ta nsoga, zili nsese. Nu agisie zezo nsulu zili na mbubu zikubigia. 56 Tondo kungwa sankoga azilola ku kindi kya mutubakamo ndi mbubu zakokoka kumbusa kwa kusuga nsulu, nti ate kibe kikyo kili na mbubu nu kukitikya, ndi nsulu aba kikoba, ndi zalukwa aba kukandwa. 57 Tondo ndi mbubu zasubya ku zezo nsulu zalukwa aba zakandwa, ndi kitani aba za kikoba, nti zili mbubu zikwitila, nu binsania bili na zezo mbubu nti byagisibwe. 58 Nu nsulu zalukwa aba zakandwa aba za kikoba zasugwa nu mbubu zasila lebelebe muzo, nti zasugwa lingo limbizi nu nti zenga.”
59 Mamano meli makakizio ma mbubu mu nsulu, ndi mu nsulu za myoza aba za kitani, ndi mupila aba engo nsulu zalukwa na misinge, aba ndi za kikoba, buno sankoga atende buno zili nsoga aba ta nsoga.