Kwengibwa kwa mwiya bibali
14
1 Yehowa abwide Musa bunee: 2 “Mamano meli makakizio ma mwiya bibali ku busi bwage bwa kwengibwa: Alusibwe ku sankoga, 3 tondo sankoga abase ku isula lya mwino geli muntu nu kumulola. Ndi mwiya bibali ona, 4 nti sankoga akakizie buno bango bantu batolele mwiya bibali wengibwa tuzoni tubili twenga nu tukutenga, nu muti wa mwerezi, nu muzigi wa myoza zakisimana, nu kiyikanwa kyamanwa hisopo. 5 Nu sankoga akakizie buno kazoni kamozi kaseswe gantata mazi meli mu idega ly'ibumba. 6 Kusila atole kazoni kakutenga nu kukatutika mu mikila za kazoni kasesilwe gantata mazi masoga, gamozi na muti wa mwerezi nu muzigi wotilwe na myoza zakisimana nu hisopo. 7 Asandide mikila mambizi mutubakamo ku wozo wengibwa ku bibali nu kumbusa amutendele buno enga. Kusila nti akandule kazoni kakutenga mu isoa. 8 Muntu wa kwengibwa asuge nsulu zage, nu kwibega nzwili nu myoza za mubili unsania, nu eiyogie mu mazi, nu kusila nti engibwe. Kumbusa eingile mu ido, tondo eikale kumbuga kwa numba zage za hema bindi mutubakamo. 9 Ku kindi kya mutubakamo abege nzwili z'itoe lyage nu luzelu lwage nu myoza za mubili wage unsania, nu kusuga nsulu zage, nu koga mubili wage unsania, nu abe wenga.
10 Ku kindi kya kinana avwe na byana bibili bya bilimba bya mikoko nu kyana kimozi ky'ibuti kya mukoko, na kyo na kyo kya mwaka umozi nu kyasililila, gamozi na byindi bisatu by'ikumi bya luzi a bya bunga busoga bwasambikwa na makiti buli kayulo kage ka bunga, nu mbusu emozi b nkeke za makiti. 11 Sankoga wamwengia alusie wozo muntu wengibwa ku Yehowa ga mwingilo wa mukolo wa Numba za Hema, gamozi na nkaso zage. 12 Sankoga akate kilimba kimozi kya mukoko nu kukikasana kibe kisansa kya katati ka bwagi nu mbusu za makiti, nu abitengietengie lwabusio lwa Yehowa. 13 Asese kilimba kimozi ku kiziki kyasililila gago gakusesagwa bisansa bya bwagi nu bya kugisibwa. Anga kisansa kya bwagi, kisansa kya katati ka bwagi kili kya sankoga. Kili kyasililila nunse. 14 Sankoga atikye nkindi za mikila za kisansa kya katati ka bwagi nu kuzitila ga ntonga za kutuzi kwa seidume kwa wozo wengibwa nu ga kinkumu kya kuboko kwage kwa seidume nu ga mpanda za mulume za kugulu kwa seidume. 15 Kusila sankoga asongolozie nkindi za makiti meli mu mbusu mu ikasa lyage lya kwa seikazi, 16 nu abike munwe wage mutangi wa seidume mu makiti meli mu ikasa lyage lya seikazi, nu na munwe wage asandide ku Yehowa mambizi mutubakamo. 17 Nu wozo sankoga abike nkindi za makiti masigala mu ikasa lyage ga ntonga za kutuzi kwa seidume kwa wozo wengibwa, nu ga kinkumu ky'ikasa lya seidume nu ga mpanda za mulume za kugulu kwa seidume, ga biziki bili mikila za kisansa kya katati ka bwagi. 18 Nu makiti masigala mu ikasa lyage amabike g'itoe lya wozo wengibwa, nu amukitile bukulumania na Yehowa.
19 Kusila sankoga akasane kisansa kya bwagi nu kukitila wozo wengibwa bukuluzi, nu kumbusa amusesele kayulo ka kugisibwa, 20 nu kukikasana ga kasenga ka kugisia gamozi na kayulo ka bunga, nu bubo amukitile bukulumania, nu muntu engibwe nunsania.
21 Tondo ndi eli muzambi nu ntavwama kukunza byana bya mikoko bibyo, nti avwe na kyana kya kilimba kya mukoko kimozi kibe kisansa kya katati ka bwagi kikutengibwatengibwa kumukitila bukulumania, gamozi na kyindi kimozi ky'ikumi kya luzi c lwa bunga busoga bwasambikwa na makiti buli kayulo ka bunga, nu mbusu za makiti, 22 nu nkulimba ibili aba byana bibili bya bilinga, byavwama kukunza, kimozi kili kisansa kya bwagi, nu kingo kili kayulo ka kugisibwa. 23 Ku kindi kya kinana avwe nabyo ku sankoga uli lwabusio lwa Yehowa ga mwingilo wa mukolo wa kibanza kya Numba za Hema, ku kabamba ka kwengibwa kwage. 24 Sankoga atole kikyo kilimba kya mukoko kili kisansa kya katati ka bwagi, nu gamozi na mbusu za makiti, kubitengiatengia lwabusio lwa Yehowa, anga kayulo ka kutengibwatengibwa. 25 Asese kilimba kya kyana kya mukoko kibe kisansa kya katati ka bwagi, nu akate nkindi za mikila zakyo nu kuzibika ga ntonga za kutuzi kwa seidume kwa wozo wengibwa, nu ga kinkumu kya munwe wage wa seidume, nu ga mpanda za mulume za kugulu kwage kwa seidume. 26 Sankoga akubule makiti mamozi ku ikasa lyage lya seikazi, 27 nu na munwe wage mutangi w'ikasa lya seidume asandile mamozi ku Yehowa mambizi mutubakamo. 28 Nu mango makiti mamozi ma mamo meli ku ikasa lyage, amatile gago gaatilile mikila, ga ntonga za kutuzi kwa seidume kwa wozo wengibwa, nu ga kinkumu kya kuboko kwage kwa seidume, nu ga mpanda za mulume za kugulu kwa seidume. 29 Makiti mansania masigala kumbusa kwa kukita bubo, nti amabongia g'itoe lya wozo wengibwa, kumukitila bukulumania na Yehowa. 30 Kusila nti asese nkulimba aba byana bya bilinga, anga bwavwama kukunza wozo muntu, 31 kitangi kibe kisansa kya bwagi, nu kingo kibe kayulo ka kugisibwa, gamozi na kayulo ka bunga. Bubo u bwakitile sankoga wozo wengibwa bukulumania na Yehowa. 32 Mamano meli makakizio ma muntu muzambi uli na bibali ku kikoba, nu utavwama kukunza bibyo bya kumwengia anga bango.”
Kwengibwa kwa mbubu
33 Yehowa abwide Musa nu Haruni bunee: 34 “Gamwingile mu kisi kya Kanana kinkumukasa kuba bwiyani bweinyu, nu ndi nabika mbubu zikwitila mu numba za mu kisi kikyo, 35 nti mwiya numba ende kubula sankoga bunee: ‘Mu numba zane muli itondoki lyasusania mbubu.’ 36 Nu sankoga akakizie buno, batikye binsania bili mu numba buno tabyatendelwe bili nsese, nu babitikye nti nteingila mu numba kulola ku kiziki kya mbubu. Kumbusa kwa kubitikya, nti eingile mu numba kulola ku kiziki kya mbubu. 37 Alole ku mbubu zili ku bitutu, nu ndi zili n'idangi anga mazi ma sombe aba lya kisimana ku biziki bikumoneka matengu mu bitutu, 38 nti sankoga atuke mu numba nu akande lwibi lwazo bindi mutubakamo. 39 Ku kindi kya mutubakamo sankoga avwe lingo nu kulola ku numba. Ndi mbubu zitila mu bitutu, 40 nti akakizie buno batikye makozi meli na mbubu nu kumeisa ku kiziki kya nsese ku isula lya mwino. 41 Akakizie lingo buno batikye makese mansania ma bitutu binsania bya numba, nu makese makululwa ku bitutu meiswe ku kiziki kya nsese ku isula lya mwino. 42 Kusila nti batole mango makozi nu kumabika ku biziki bya mamo matikizibwe, nu kutila mango makese mato mu numba insania.
43 Ndi mbubu zasubya lingo kumbusa kwa kutikya makozi nu kutikya makese makulu nu kutila makese mato, 44 nti sankoga ende azilole, nu ndi mbubu zitila mu numba, nti zili mbubu zikubigia, nu numba zezo tazili nsoga. 45 Numba zezo zigusibwe gansi nunsania, nu makozi nu mbavu nu makese mazo meiswe mansania ku kiziki kya nsese kili ku isula lya mwino.
46 Nu lingo wozo ukwingila mu numba zezo mu nkungu zizabezaga zakandilwe abe nsese aaba nu mwigolo. 47 Ndi muntu eiyombeka muzo, nti atunganana kusuga nsulu zage. Nu we walia mu numba zezo asuge nsulu zage.
48 Tondo ndi sankoga avwa kuzilola nu amona buno mbubu tazitila kumbusa kwa kutikibwa nu kutilwa mango makese mato, nti anasambala buno numba zili nsoga, kubuno mbubu zasila kutikibwa. 49 Nu atole tuzoni tubili nu muti wa mwerezi nu musinge wa myoza zakisimana nu hisopo, 50 nu asese kazoni kamozi mu idega ly'ibumba lili na mazi masoga. 51 Nu akate muti wa mwerezi nu musinge wa myoza zakisimana nu hisopo, nu kubitutika mu mikila za kazoni kasesilwe ku mazi masoga nu kumasandila mu numba mambizi mutubakamo. 52 Engie numba na mikila za kazoni nu mazi masoga, nu kazoni kakutenga, nu muti wa mwerezi, nu hisopo, nu musinge wa myoza zakisimana. 53 Kusila nti akandule kazoni kakutenga mu masoa meli kumbuga kwa mwino. Bubo u bwakite bukulumania ku kabamba ka numba, nu zenge lingo.”