Nsese za mubili
15
1 Yehowa akakizizie Musa nu Haruni bunee: 2 “Tenda ku baIsraeli bunee: ‘Kungwa muntu unsania akubasa mazi mu mubili wage, nti mazi mamo makutuka meli nsese. 3 Ndi mekimatuka aba ndi makandwa buno tamakutuka, nti nsese zamo zikumukita nsese kankanka. Mamo makutuka mamukitila nsese mu nzila zeno: 4 Na mugu na mugu na geiyombeke nti guli nsese, nu kisumbi kinsania geikale nti kili nsese. 5 Unsania witubye ku mugu wage asuge nsulu zage nu koga na mazi, nu abe nsese aaba nu mwigolo. 6 Unsania wikalage ga kisumbi geikede wozo ukubasa mazi asuge nsulu zage nu koga na mazi, nu eli nsese aaba nu mwigolo. 7 Unsania witubye ku mubili wa wozo ukubasa mazi, asuge nsulu zage nu koga na mazi, nu eli nsese aaba nu mwigolo. 8 Ndi wozo ukubasa mazi aswila muntu uteli nsese matazi, nti asuge nsulu zage nu koga na mazi, nu abe nsese aaba nu mwigolo. 9 Binsania byikalile muntu ukubasa mazi gaakwenda ga mpunda nti bili nsese, 10 nu unsania witubye ku bibyo bikede ga wozo ukubasa mazi nu wozo ukweka bibyo geikede nti asuge nsulu zage nu koga na mazi, nu abe nsese aaba nu mwigolo. 11 Nu muntu unsania witubibwa ko na mwiya kubasa mazi, ndi ntoga ku maboko mage, nti asuge nsulu zage nu koga na mazi, nu eli nsese aaba nu mwigolo. 12 Idega ly'ibumba linsania lyitubibwa na mwiya kubasa mazi nti lyabugibwe, nu kinsania kyanzwa na mbavu nti kyasugwa na mazi. 13 Kungwa muntu asakilwa ku kubasa mazi, aganze bindi mutubakamo ku kwengibwa kwage. Asuge nsulu zage nu koga na mazi masoga, nu engibwe. 14 Ku kindi kya kinana, akate nkulimba ibili aba byana bibili bya bilinga, nu avwe nabyo lwabusio lwa Yehowa ga mwingilo wa mukolo wa Numba za Kukulumana, nu abikase ku sankoga. 15 Sankoga azikasane, emozi zili kisansa kya bwagi nu engo zili kayulo ka kugisibwa. Bubo u bwamukitile sankoga bukulumania na Yehowa ku kabamba ka kikyo kyabasile mweli.
16 Nu wamulume unsania ndi atuka bulume, nti oge mubili wage unsania mu mazi, nu abe nsese aaba nu mwigolo. 17 Nu nsulu na nsulu aba kikoba na kikoba kili na bulume kyasugwe mu mazi, nu kili nsese aaba nu mwigolo. 18 Ndi wamulume eiyombeka na mukikulu nu bulume bwatuka mu wamulume, nti boge mu mazi bobabili, nu babe beiya nsese aaba nu mwigolo.
19 Kungwa mukikulu eikala ga byata mu mwezi wage, nti nsese za mwezi wage zasigala kweli bindi mutubakamo, nu unsania witubya kweli nti eli nsese aaba nu mwigolo. 20 Kintu na kintu gaakwiyombeka aba gaakwikala mu bindi bibyo bya mwezi wage, nti kili nsese. 21 Muntu unsania witubye ku mugu geiyombeka aba ku kisumbi geikala, nti asuge nsulu zage nu koga mubili wage mu mazi, nu eli nsese aaba nu mwigolo. 22-23 Ndi muntu eitubya aba ku mugu aba ku kisumbi kyikalaga gakyo, nti wozo muntu eli nsese. 24 Ndi wamulume unsania eiyombeka nage mu bindi bya byata byage nu byabasa ku wozo wamulume, nti eli nsese bindi mutubakamo, nu mugu unsania geiyombeka nti guli nsese.
25 Ndi mukikulu eikala ku byata byage bindi byingi kutinga bindi bya lukita lwage, aba ku engo nkungu ziteli za bindi bya mwezi wage, nti eli nsese bindi binsania bya kutuka mikila, anga bwabezaga mu bindi bya mwezi wage. 26 Nu mugu unsania geiyombeka mu bindi bya byata byage nti guli nsese, nu kisumbi kinsania kyikala gakyo nti kili nsese, anga bweli mu bindi bya mwezi wage. 27 Nu muntu unsania witubye ku mugu wage guli nsese, aba ku kisumbi kyage kili nsese, nti eli nsese, nu asuge nsulu zage nu koga mu mazi, nu eli nsese aaba nu mwigolo.
28 Kungwa byata byage byasila nu mukikulu asila koga, nti aganza bingo bindi mutubakamo nu nti enga lebelebe. 29 Ku kindi kya kinana atole nkulimba ibili aba byana bibili bya bilinga, nu ende nabyo ku sankoga uli ga mwingilo wa mukolo wa Numba za Kukulumana. 30 Sankoga akasane kimozi kuba kisansa kya bwagi, nu kingo kili kayulo ka kugisibwa. Bubo u bwamukitile bukulumania lwabusio lwa Yehowa ku kabamba ka nsese za byata byage.
31 Mwatunganana kulekanukya baIsraeli na nsese zabo, buno tabakue ku kabamba ka nsese zabo zikubigia Numba zane mu nikalage, nu zili munkatini mwabo.’”