Busi bunene bwa kukulumania.
16
1 Yehowa atendile ku Musa, kumbusa kwa lukuo lwa bana babili ba Haruni bakule gabakundile Yehowa. 2 Yehowa abwide Musa bunee: “Bula Haruni solonzi buno nteingile mu nkungu insania anga bwanasombola mu Kiziki Kyasililila Nunse, kili kumbusa kwa nsulu zili lwabusio lwa Kisumbi kya Kyombo, kiziki kya kukulumana na Nne kili ga Sanduku, anavwa kukua, kubuno Nne namoneke ko mu kimpa ga kikyo Kisumbi kya Kyombo kikukulumania na Nne. 3 Haruni eingile mu Kiziki Kyasililila Nunse mu nzila zeno: na kyana kya ngombe kili kisansa kya bwagi nu na kilimba kya mukoko kili kayulo ka kugisibwa. 4 Atunganana kuvwala nkanzu zasililila, nu itekele ku mubili wage. Akande mukoma wa kitani, nu avwale nkumbu za kitani. Zeno zili nsulu zasililila, nu atunganana koga ku mubili wage tanga, nti ntezivwala. 5 Musanganano unsania wa baIsraeli wamukase bilimba bibili bya mpene bili bisansa bya bwagi nu kilimba kya mukoko kili kayulo ka kugisibwa. 6 Haruni asese mulume wa ngombe guli kisansa kya bwagi kwikitila bukulumania, we wenyene nu kikanga kyage. 7 Kumbusa akasane bilimba bibyo bibili ku Yehowa ga mwingilo wa mukolo wa Numba za Kukulumana. 8 Nu ese mbale kubyo, kumenya kilimba kimozi kya Yehowa, nu kilimba kya bibili kya kusondelezia nu kukandula mu lubanda. 9 Nu Haruni asese kilimba kili kya Yehowa, kibe kisansa kya bwagi, 10 tondo kilimba kya mpene kyasombwedwe buno kyasondelezibwe mu lubanda kyakaswe kigimagima ku Yehowa, nu kibe kyakukita bukulumania mu nzila za kukisinga mu kalula ku kiziki kiteli na muntu.
11 Nu Haruni avwe na ngombe zili kisansa kyage kya bwagi kukita bukulumania ku kabamba kage nu ka kikanga kyage, nu azisese buno zibe kisansa kyage kya bwagi. 12 Nu akate kibungulu kyage kya kugisia bulago nu kukizazia na makangania ma keiya matukibwa ku kasenga ka bisansa keli lwabusio lwa Yehowa, nu atole namo makasa ma bulago busoga bwabungwa nunse, nu eingile mu Numba za Hema ku kiziki kili kumbusa kwa nsulu. 13 Nu abike bubo bulago ga keiya lwabusio lwa Yehowa buno muuki wa bulago gukukile Kisumbi kya Kyombo kili gantata Bulongeki, buno ntakue. 14 Nu atole nkindi za mikila za zezo ngombe nu kuzisandila na munwe wage lwabusio lwa Kisumbi kya Kyombo ku lulenge lwa kuntata, nu kumbusa asandide mikila lwabusio lwa Kisumbi kya Kyombo mambizi mutubakamo.
15 Kusila asese mpene za kisansa kya bwagi zili ku bantu nu kulusia mikila zazo kumbusa kwa nsulu, nu kukita nazo anga bwakitile na mikila za ngombe. Azisandile ga Kisumbi kya Kyombo nu lwabusio lwakyo. 16 Mu nzila zeno akite bukulumania bwa biziki byasililila nunse, ku kabamba ka nsese nu bwagi bwa lunano lwa baIsraeli mu bwagi bwabo bunsania. 17 Tamwabe muntu umozi mu Numba za Kukulumana nkungu zili Haruni mu Kiziki Kyasililila Nunse, kukita bukulumania ku kabamba kage nu ka kikanga kyage, nu ka musanganano unsania wa baIsraeli, kutukila nkungu zage za kwingila aaba nu gaatuke lingo.
18 Kusila atuke nu ende ku kasenga ka bisansa keli lwabusio lwa Yehowa, akakitile bukulumania. Atole mikila za ngombe nu mikila za mpene nu kuzibika ga mega ma kasenga. 19 Asandide nkindi za mikila ga kasenga na munwe wage mambizi mutubakamo, kukengia nu kukatikya nsese za baIsraeli.
20 Nkungu zasila kukita bukulumania ku kabamba ka Kiziki Kyasililila Nunse, nu ka Numba za Kukulumana, nu ka kasenga, nti alusie zezo mpene zikutenga. 21 Nu Haruni abike maboko mage mabili g'itoe lya zezo mpene zikutenga, nu kwigonga gazo mibi insania nu lunano lunsania lwa baIsraeli, u bwagi bwabo bunsania, nu kuzibika g'itoe lya zezo mpene. Asinge zezo mpene mu kalula ku kuboko kwa muntu wasombwedwe ku mulimo wozo. 22 Mpene zeeke bwagi bunsania bwa bantu ku kiziki kiteli na muntu, nu wozo muntu azikandule mu kalula.
23 Nu Haruni eingile mu Numba za Kukulumana nu kwikungula zezo nsulu za kitani zaavwalile lwabusio lwa kwingila mu Kiziki Kyasililila Nunse, nu azisige ko. 24 Nu oge mu mazi mu Kiziki Kyasililila nu kuvwala engo nsulu zage. Kusila atuke nu akasane kayulo kage ka kugisibwa nu kayulo ka kugisibwa ku kabamba ka bantu kukita bukulumania ku kabamba kage nu ka bantu. 25 Nu agisie manona ma kisansa kya bwagi ga kasenga.
26 Wozo muntu wakandwide mpene mu kalula, u mpene zikweka bwagi, atunganana kusuga nsulu zage nu koga mubili unsania mu mazi, nu kumbusa eingile mu mwino. 27 Ngombe nu mpene za bisansa bya bwagi, u zezo zalusizibwe mikila zazo mu Kiziki Kyasililila Nunse kukita bukulumania, misuna zazo nu bikoba byazo nu tubi twazo nti byekwe binsania ku isula lya mwino nu kugisibwa nunsania. 28 Nu muntu wozo wabigisie asuge nsulu zage nu koga mubili wage mu mazi, nu kumbusa eingile mu mwino.
29 Lilino lili ikakizio lya milyalya kumuli: Ku kindi ky'ikumi kya mwezi wa mutubakamo mwatunganana kwikanda nu kutakita mulimo unsania. Bantu bansania babukite, ndi beli beiya kisi aba ndi beli bageni. 30 Kubuno mu kindi kikino mwakitilwe bukulumania kumwengia, nu inyuwe mwengibwe na bwagi bweinyu bunsania lwabusio lwa Yehowa. 31 Kili kindi kya kumunwa, u Sabato, nu mwikande idia. Ikakizio lilino lili lya milyalya. 32 Sankoga wabongibwa nu kubikwa ku mulimo buno ayange isi mu kiziki kya sankoga munene, we akite bukulumania. Avwale nsulu zasililila, 33 nu kukita bukulumania ku kabamba ka Kiziki Kyasililila Nunse, ku kabamba ka Numba za Kukulumana nu kasenga, nu ku kabamba ka basankoga bansania nu ka bantu bansania ba musanganano. 34 Ikakizio lilino lili lya milyalya kumuli. Bukulumania bwakitwe limbizi limozi na mwaka na mwaka ku kabamba ka bwagi bwa baIsraeli.” Nu bakitile bubo, anga bwakakizizie Yehowa ku Musa.