Tabalie mikila
17
1 Yehowa atendile lingo ku Musa bunee: 2 “Kakizia Haruni nu bana bage nu baIsraeli bansania bunee: ‘Yehowa akukakizia bunee: 3 “MuIsraeli unsania wasese ngombe aba mukoko aba mpene mu ido aba ku masula malyo, 4 nu ntazisesa ga mwingilo wa mwingilo wa Numba za Kukulumana, kuzikasana zibe kisansa ku Yehowa lwabusio lwa Numba za Hema za Yehowa, muntu wozo abe na katati ka kubasia mikila. Muntu wozo abasizie mikila, nu atunganana kupumbibwa bulazi na bantu bage.” 5 Nkutenda bubuno buno baIsraeli bavwe ku Yehowa na bisansa byabo bibakukasa kano kaluma mu masoa mabo. Batunganana kuvwa nabyo ku sankoga nu ku Yehowa ga mwingilo wa Numba za Kukulumana nu kubisesa, bibe tuyulo twa bubobelelo. 6 Sankoga asandile mikila ku kasenga ka bisansa bya Yehowa keli ga mwingilo wa mukolo wa Numba za Hema za Kukulumana, nu kugisia manona, mabe nsunu nsoga zikutananizia Yehowa. 7 Tabakase lingo kayulo kabo kamozi ku nkisi za bilimba zibakukumbamina. Ikakizio lilino lili lya milyalya kubeli nu ku bibuti byabo binsania.’ 8 Babule bunee: ‘Muntu unsania wa baIsraeli aba wa bageni beikala munkatini mwabo, wakasana kayulo ka kugisibwa aba kisansa 9 nu ntakilusia ku mwingilo wa Numba za Kukulumana kukikasana ku Yehowa, nti wozo muntu alekanukibwe bulazi na bantu bage.
10 Nu muntu wa baIsraeli aba wa bageni beikala munkatini mweinyu ndi alia mikila za lukita lunsania, nti nakumbe meiso mane ku wozo muntu, nu Nne namwimbye bulazi na bantu bage. 11 Kubuno kalamo ka mubili keli mu mikila, nu nazikasile kumuli ga kasenga buno zimukitile bukulumania, kubuno zili mikila zikumukitila bukulumania.’ 12 Ukinsa nkubula baIsraeli bunee: ‘Ta wampa wa munkatini mweinyu ulia mikila, nu mugeni ukwikala munkatini mweinyu ntalie mikila.’ 13 Muntu unsania wa baIsraeli aba wa bageni beli munkatini mweinyu, ndi akata nyama aba kazoni ka kulibwa, nti abasie mikila zako nu kuzikukila na mukungu, 14 kubuno kalamo ka kibumbwa na kibumbwa keli mu mikila zakyo. Ku kabamba kako natendile ku baIsraeli bunee: ‘Tamulie mikila za kibumbwa kinsania kubuno kalamo kakyo keli mu mikila. Unsania wazilie nti alekanukibwe bulazi na bantu bage.’