Butazi bwasombwa
18
1 Yehowa abwide Musa bunee: 2 “Kakizia baIsraeli nu kubabula bunee: ‘Nne nili Yehowa, Kalaga weinyu. 3 Inyuwe, tamukite misako anga bukukita baMisri, kisi kimwikalaga mukyo, aba tamukite misako anga bukukitaga bantu mu kisi kya Kanana, kisi kinkumukasa. Tamukite misako za bantu babo. 4 Mwatunganana kukita milembe zane, nu kwidanga kuyanga makakizio mane. Nne nili Yehowa, Kalaga weinyu. 5 Anzazi makakizio mane nu milembe zane, kubuno muntu ukuzikita alame ku kabamba kazo. Nne nili Yehowa. 6 Takube munkatini mweinyu muntu umozi wakunde ungo wa kikanga kyage buno eiyombeke nage. Nne nili Yehowa. 7 Ntukange so nu nyoko aba kulimbania nage ku buno eli nyoko nu ntwiyombeke nage. 8 Ntukange mukazi wa so aba kwiyombeka nage; bubo buli nsoni za so. 9 Ntukange mubitu wobe, aba mukinga wa so aba mukinga wa nyoko, ndi abutwa mu kikanga kimozi nobe aba ndi abutwa mu idombe. 10 Ntukange mukinga wa musikila wobe aba mukinga wa mukinga wobe, kubuno kukita bubo nti nsoni nnene kuguli. 11 Ntukange mukinga wa mukazi wa so, wabutilwe ku so, kubuno eli mubitu wobe. 12 Ntukange mubitu wa so, kubuno eli mubuto wa so wa kikanga kili bwigi ku so. 13 Ntukange iselenzi aba muto wa nyoko, kubuno eli mubuto wa nyoko. 14 Ntukange solonzi aba so mwana muto aba kukanga mukazi wage nu kwiyombeka nage. Eli mukikulu wa mubuto wobe. 15 Ntukange mukamwana wobe. Eli mukazi wa mwana wobe, nu ntwiyombeke nage. 16 Ntukange mukazi wa solonzi aba muto wobe, kubuno kukita bubo kukwitia mubuto wobe nsoni. 17 Ntukange mukikulu nu muyukulu wage, u mukinga wa musikila wage aba wa mukinga wage, kubuno beli mibuto zage, nu kukita bubo kuli bwagi bunene. 18 Ntusonge muto wa mukazi wobe. 19 Ntwiyombeke nage bindi bya byata byage. 20 Ntwiyombeke na mukikulu wa munyobe nu kwibigia nage. 21 Tamukase bana beinyu ku Moleki, kubatingia mu keiya, kubuno mwatunganana kutalinga izina lya Kalaga weinyu. Nne nili Yehowa. 22 Ntuyame na wamulume anga buukuyama na mukikulu, kubuno buli bwagi bwasombwa nunse. 23 Ntuyame na nyama nu kwibika nsese nazo. Mukikulu ntemane lwabusio lwa nyama buno ayame nazo. Buli bwagi bwasombwa nunse.
24 Tamwibigie mu bitondo bibino binsania, kubuno mubyo bilongo binapumbie lwabusio lweinyu, beibigizie, 25 aaba nu kisi kyabigibwa. Ku bubo nakisungie ku kabamba ka bwagi, nu kisi kyimbizie bantu beikalaga mukyo. 26 Nu inyuwe tondo, mwatunganana kwanza makakizio nu milembe zane. Wozo wabutwa mu bikanga byeinyu nu mugeni ukwikala munkatini mweinyu, mwatunganana kutakita kimozi kya bitondo bibyo byasombwa nunse, 27 kubuno bantu beikalaga mu kisi nti tamubasa bakitaga bitondo bibyo binsania, nu kisi kyabigile ku kabamba kabyo. 28 Nu ndi mwabigia kisi, nti kisi kyamupumbie anga bukyapumbizie bantu babezaga mukyo lwabusio lweinyu. 29 Unsania wakite kimozi kya bitondo bibino byasombwa, wozo muntu nti alekanukibwe bulazi na bantu bage. 30 Kitazi makakizio mane mansania nu tamukite misako insania zasombwa zakitile bantu lwabusio lwa kuvwa kweinyu. Tamwibigie na zezo misako. Nne nili Yehowa, Kalaga weinyu.’”