Milembe za bitondo byingi
19
1 Yehowa atendile lingo ku Musa bunee: 2 “Tenda ku musanganano unsania wa baIsraeli. Bakakizie bunee: ‘Mube basililila kubuno nne Yehowa, Kalaga weinyu nasililila. 3 Muntu na muntu anze isi nu nina. Kokomeziazi Sabato zane. Nne nili Yehowa, Kalaga weinyu. 4 Tamugaluke kukumbamina nkisi, aba tamukite nkisi za kunyengulwa. Nne nili Yehowa, Kalaga weinyu.
5 Ndi muntu akasane ku Yehowa kayulo ka bubobelelo, nti akakasane mu nzila zitabizibwe ku kabamba kage. 6 Kalibwe bubo busi bwakukakasana nu lubi lwa bubo busi; milanga zasigala aaba nu ndele za bubo busi, nti zatunganana kugisibwa nunsania, 7 nu ndi milanga zimozi zako zalibwa ku ndele za busi bwakukakasana, nti keli nsese nu takeitabizibwe. 8 Muntu wozo wazilia ku busi bw'isatu nti eli na katati, nu eka bwagi bwage kubuno anyegia kikyo kyasililila kya Yehowa. Wozo muntu alekanukibwe bulazi na bantu bage.
9 Mu nkungu za matubulo, tamutubule nunse myaga z'isoa nu tamukale aba tamusongye bibyo byasigala mu isoa. 10 Nu tamwoze limbizi lya mabili mizigi zeinyu za biguma, nu tamusongye biguma bibyo byakolokile gansi. Sigazi byo ku kabamba ka bazambi nu bageni. Nne nili Yehowa, Kalaga weinyu.
11 Tamwibe. Tamweke buza. Tamwengelelane. 12 Tamulumbile buza mu izina lyane, nu mu nzila zeno kubigia izina lya Kalaga weinyu. Nne nili Yehowa.
13 Tamusungie muneinyu, aba kumunyaga bikulo byage. Tamwikale na lukalilo lwa mukiti weinyu kindi kinsania aaba nu kukya kwa busi.
14 Tamuswilile kimbula matuzi, aba tamubike ikozi lya kukikitania lwabusio lwa kyuku, tondo mukue Kalaga weinyu boba. Nne nili Yehowa. 15 Tamugalukye lusungio. Tamukitile bazambi bubi, nu tamukutye banene, tondo sungiazi baneinyu bansania bulingilingi ku kwisanana. 16 Tamwende kuko nu kuko munkatini mwa bantu beinyu anga bagabuzi. Tamukite kitondo kimozi kyakwitia muneinyu boba bwa kalamo kage. Nne nili Yehowa.
17 Tamusombe mubuto mu mutima weinyu. Zugilazi mibuto na bulili, buno tamweke bwagi bwage. 18 Tamwisube nu tamube na lusombo lwa muntu umozi wa baIsraeli, tondo tundazi baneinyu anga bumwitunda mubenyene. Nne nili Yehowa. 19 Anzazi makakizio mane. Tamuzige mulume wa nyama emozi kubuta n'ibuti lya engo nyama. Tamuyike nkita ibili za mbuto mu isoa limozi, nu tamuvwale nsulu zalukwa na misinge za nkita ibili.
20 Ndi muntu eiyombeka na mukinga uli kalemba nu andwa n'ungo wamulume nu ntakululwa aba kukaswa bwangato, nti basungibwe, tondo tabeitwe, kubuno wozo mukinga nteikaswa bwangato. 21 Wamulume wozo alusizie Yehowa kisansa kya katati ka bwagi, u kilimba kya mukoko, nu avwe nakyo ga mwingilo wa mukolo wa Numba za Kukulumana. 22 Sankoga amukitile bukulumania na Yehowa na kilimba kya mukoko ku kabamba ka bwagi bwakitile, nu asigililwe bwagi bubo.
23 Nkungu zimwingile mu kisi nu mwayike miti za biguma bya kulia, nti mwaganze biguma byazo anga biguma bitalibwe myaka isatu. Ku nkiko zezo za myaka isatu miti zezo zibe kumuli anga miti zitalibwe, nu biguma byazo tabilibwe. 24 Tondo ku mwaka w'inazi nti biguma bili bisanana, u kayulo kakasanwe ku Yehowa kumusima. 25 Ku mwaka w'itano nti mwalie biguma byazo, nu mu nzila zeno biguma byeinu byitile. Nne nili Yehowa, Kalaga weinyu.
26 Tamulie misuna mukili mikila. Tamubuke aba kukita bugila. 27 Tamusese nzwili za ku ntungo z'itoe, nu tamubege ntungo za luzelu lweinyu. 28 Tamwisese mibili zeinyu ku kabamba ka bakuzi. Tamwisake nkembe ku mibili zeinyu. Nne nili Yehowa. 29 Tamubigie bakinga beinyu kubakata buno babe bitazi, aba kisi kyagaluke ku butazi nu kiyale na bubi bunsania. 30 Kokomeziazi Sabato zane nu anzazi Numba zane zasililila. Nne nili Yehowa. 31 Tamwende ku mugila; tamubalonde kubuno mwabigibwe nabo. Nne nili Yehowa, Kalaga weinyu. 32 Emanukazi lwabusio lwa bakungu, nu anzazi beiya mbwe, nu kuazi Kalaga weinyu boba. Nne nili Yehowa.
33 Tamusungie mugeni wikala munkatini mweinyu, 34 tondo mukitilazi anga umozi wa bana beinyu, nu mutundazi anga bumukwitunda mubenyene kubuno mwabezaga bageni mu kisi kya Misri. Nne nili Yehowa, Kalaga weinyu.
35 Mulindike bintu na bilindiko bya bulili gamwalindike bulazi, aba buzitu aba bwingi bwa bintu. 36 Lindikazi na kilindiko kya bulili, na luzi lwisanana, idega lyakuka. Nne nili Yehowa, Kalaga weinyu wamutikizye mu kisi kya Misri. 37 Mukokomezie nu kulanga makakizio mane mansania nu milembe zane insania, nu kuzikita. Nne nili Yehowa.’”