Lusungio ku bwagi
20
1 Yehowa atendile lingo ku Musa bunee: 2 “Kakizia baIsraeli bunee: ‘MuIsraeli unsania aba mugeni wikalage munkatini mweinyu, wakasane mwana wage unsania ku Moleki, lebelebe eitwe. Bantu ba mwino wage bamwise makozi aaba nu akua. 3 Nu Nne nabike meiso mane ku muntu wozo nu namupumbie bulazi na bantu bage, kubuno abigizie Numba zane Zasililila gaakasile mwana wage ku Moleki, nu lingo anyegizie izina lyane. 4 Ndi bantu ba mwino wa muntu wakasana mwana wage ku Moleki baziba meiso mabo kweli buno tabeite wozo muntu, 5 nti nabike meiso mane ku muntu wozo gamozi na kikanga kyage, nu nabapumbie na bantu babo, we nu bansania bakumuyanga ku butazi bwa kukumbamina Moleki. 6 Nabike meiso mane ku muntu ukwenda ku bagila kubayanga, nu namulekanukye bulazi na bantu bage. 7 Mwiyengie nu mube basililila, kubuno nne nili Yehowa, Kalaga weinyu. 8 Mukokomezie milembe zane nu kuzikita. Nne nili Yehowa ukumusililizia. 9 Unsania waswilila isi aba nina eitwe lebelebe, nu mikila zage zili g'itoe lyage. 10 Ndi wamulume akita butazi na mukikulu w'ungo muntu, ndi na mukazi wa munyage aba mubuto wage, nti wozo wamulume nu mukikulu beitwe. 11 Ndi wamulume akita butazi na mukazi w'isi, nti bobabili batunganana kukua nu katati ka lukuo lwabo keli kubeli bobenyene. 12 Ndi wamulume akita butazi na mukamwana wage, nti bobabili beitwe. Bakitile bwagi bwa lunano lubi nunse, nu mikila zabo zibe ga matoe mabo.
13 Ndi wamulume ayama n'ungo wamulume anga butazi na mukikulu, bobabili bakitile bwagi bunene, nu beitwe lebelebe. Lukuo lwabo luli kabamba kabo tugu. 14 Ndi muntu asonga mwana nu nina gamozi, nti bakitile bwagi, nu bobasatu bagisibwe mu keiya, buno bwagi tabwabe munkatini mweinyu. 15 Ndi muntu wamulume akita butazi na nyama, lebelebe eitwe, nu mwite nyama zezo. 16 Ndi mukikulu akunda nyama buno akite butazi nazo, nti mwite mukikulu wozo nu nyama zezo. Lebelebe bakue, nu kabamba ka lukuo nti keli kabo tugu. 17 Ndi wamulume asonga mubitu wage, u mukinga w'isi aba wa nina, nu kukita butazi nage, nti buli nsoni. Nu balekanukibwe na bantu babo. Eitizie mubitu wage nsoni, nu eli na kabamba kazo. 18 Muntu wamulume wiyombeka na mukikulu mu byata byage nu kumumenya lebelebe, amenyine kiziki kyatuka mikila zage, nu mukikulu akikulile, nu bobabili bapumbibwe ku bantu babo. 19 Tamukite butazi na mubitu wa so, aba n'iselenzi aba muto wa nyoko, kubuno kukita bubo kukwitia bamubutile nsoni, nu bo bakubukita beeke kabamba kabo ka bwagi. 20 Ndi muntu akita butazi na mukikulu wa ninalume, aba na mukikulu w'iselenzi w'isi aba na mukikulu w'isi mwana muto, nti eitizie iba wa mukikulu wozo nsoni, nu bobabili nti beeke kabamba kabo ka bwagi, nu bo bakue geteli kubuta mwana. 21 Ndi wamulume asonga mukazi wa mubuto wage nti akita kitondo kya nsese, nu bobabili bakue geteli kubuta mwana, kubuno eitizie mubuto wage nsoni.
22 Kokomeziazi makakizio mane mansania nu milembe zane insania, kubuno kisi kinkumulusizia buno mwikale mukyo, takinamupumbia. 23 Tamukitage misako za bantu ba bilongo binapumbie lwabusio lweinyu. Bantu babo bakitile misako zezo insania, nu ku kabamba kazo, nabasombile. 24 Tondo namubwide bunee: “Mukeiyana bilongo byabo. Nkamukasa byo bibe bwiyani bweinyu, nu bili kisi kiyala na mabele nu buuki.” Nne nili Yehowa, Kalaga weinyu wamulekanukizye na ba bilongo. 25 Nu inyuwe, mwatunganana kusongolola nu kulekanukya gasamba nyama nsoga nu nyama ziteli nsoga, nu gasamba tuzoni tusoga nu tuzoni tuteli tusoga. Tamwikite kuba beiya nsese ku kabamba ka nyama zinatendile buno zili nsese kumuli, aba ku kabamba ka kazoni kansania kanatendile keli nsese, aba ku kabamba ka kinsania kikugelegeta kinatendile kili nsese kumuli. 26 Nu mwabe basililila kundi, kubuno Nne Yehowa nasililila, nu namulekanukizye na ba bilongo buno mwabe bantu bane.
27 Muntu wamulume aba mukikulu uli mugila aba muganga eitwe lebelebe. Mubeise makozi aaba nu bakue, tondo kabamba ka lukuo lwabo keli kabo tugu.’”