Kusililila kwa basankoga
21
1 Yehowa abwide Musa bunee: “Tenda ku basankoga, u bamulume babutile Haruni, nu bakakizie bunee: ‘Sankoga nteibigie ku kabamba ka bakuzi ba baIsraeli, 2 tondo ku kabamba ka mubuto uli bwigi nage, anga nina aba isi, aba musikila wage aba mukinga wage, aba iselenzi aba muto wage, 3 aba mubitu wage utesongwa wamwegamina ko kubuno nteli n'iba, ku kabamba kage anavwama kwibigia. 4 Nteibigie ku kabamba ka muntu wakua uli mubuto wage mu isonga lyage, nu kwibika nsese ku kabamba kabo. 5 Basankoga tababege nzwili z'itoe lyabo, nu tababege ku ntungo za nzelu zabo, nu tabasese mibili zabo. 6 Batunganana kuba basililila ku Kalaga wabo, nu tabatende buliabulia izina lya Kalaga wabo. Babe basililila kubuno basese bisansa nu tuyulo twa Yehowa twakitwa na keiya, u idia lya Kalaga wabo.
7 Tabasonge mukikulu kitazi wabigibwa na butazi, aba watikibwa n'iba wage, kubuno basankoga beli basililila ku Kalaga wabo. 8 Bango bantu babaganze basililila kubuno bakukasana idia ku Kalaga weinyu. Nu babaganze basililila kubuno Nne Yehowa nasililila nu kumusililizia. 9 Mukinga wa sankoga, ndi eibigia na butazi, nti abigia isi, nu agisibwe mu keiya.
10 Sankoga munene, wozo wasombwedwe munkatini mwa mibuto zage buno abongibwa mwambo g'itoe lyage nu kuvwalikibwa nsulu zasililila za busankoga, nteide kulongeka nzwili zage busoga nu luzelu lwage, nu ntate nsulu zage. 11 Nteingile mu busio mumo muli kitumba, aba nteibigie ku kabamba k'isi aba nina, 12 ntatuke mu Kiziki Kyasililila kya Kalaga wage aba kukibigia, kubuno abikilwe ku mulimo wasililila nkungu zabongezibwe mwambo wa Kalaga wage. Nne nili Yehowa. 13 Asonge mukikulu uli kikumi lebelebe. 14-15 Ntasonge musigala, aba mukikulu watikibwa n'iba wage, aba mukikulu wabigibwa na butazi, tondo asonge tugu kikumi kya bantu bage. Nne nili Yehowa wamusililizia.’”
16 Yehowa atendile lingo ku Musa bunee: 17 “Kakizia Haruni bunee: ‘Muntu unsania wa kibuti kyobe uli na kabalibango ntakunde kukasana idia lya Kalaga wage. Mulembe wono guli ku bibuti byavwe, ku milyalya. 18 Muntu uli na kabalibango ntakunde kasenga, u muntu uli kyuku, aba kitunga, uli na mwembe wabiga, aba meiso aba malanga aba kimozi kyage kyabiga, 19 aba wabeleka ku magulu aba mu kuboko, 20 aba uli na mugongo guteli wisa aba muntu mwigi nunse, aba babo beli mintembele. 21 Ibuta linsania lya Haruni, Sankoga, uli na kabalibango kansania ku mubili, ntakunde kukasana kisansa kya kugisia ga keiya ku Yehowa; uli na kabalibango ntakunde kukasana idia lya Kalaga wage. 22 Alie ku idia lya Kalaga wage, ku lyasililila nunse, anga bwanalia ku idia lyasililila. 23 Tondo kubuno eli na kabalibango ntakunde nsulu za lwibi lwa Numba nu ntakunde kasenga ka bisansa. Ndi akita bubo nti abigie Kiziki kyane Kyasililila. Nne nili Yehowa.’”
24 Ububo Musa atendile bubuno bunsania ku Haruni nu ibuta lyage nu ku baIsraeli bansania.