22
1 Yehowa abwide lingo Musa bunee: 2 “Kakizia Haruni nu bana bage buno beidange na tuyulo twasililila tukukasana baIsraeli kundi, buno tababigie izina lyane. Nne nili Yehowa. 3 Babule bunee: ‘Mu bibuti byobe bikuvwa ndi kuli muntu umozi uli nsese nu akunda kukasana tuyulo twasililila tukukasana baIsraeli ku Yehowa, nti wozo muntu apumbibwe bulazi na Nne. Nne nili Yehowa.
4 Ndi mu ibuta lya Haruni muli uli na bibali aba lungo lusambo lwa kwigilana lwa kikoba, a aba ndi abasia bwina aba kingo kyatuka mu mubili, nti ntalie idia lyasililila aaba nu ona. Lingo ndi eitubya ku kyabigibwa ku kabamba ka kitumba, aba ndi eitubibwa na muntu wabasia bulume, 5 aba ndi eitubya ku kikugelegeta, kyamubigia, aba ku muntu unsania wabigibwa na nsese, ku nsese insania zili nazo, nti eli nsese. 6 Muntu witubya ku kinsania kya lukita luluno abe nsese aaba nu mwigolo. Ntalie ku tuyulo twasililila tunsania ndi ntoga mu mazi. 7 Kungwa busi bwida nunsania nti enga lingo, nu alie ku tuyulo twasililila, kubuno tuli idia lyage. 8 Ntalie nyama zasangwa zakua kalazi, aba nyama zatilwe n'engo nyama, nu mu nzila zezo kwibigia nu kuba nsese. Nne nili Yehowa. 9 Basankoga balange makakizio mane buno tababe na katati nu kukua ku kabamba ka kumakita na lusombo.
10 Muntu uteli wa kikanga kya sankoga ntalie ku kayulo kasililila, aba mugeni guli mu numba za sankoga, aba mukiti wage ntalie ku kayulo. 11 Tondo sankoga ndi akunza mukobe na bikulo, aba ndi mukobe abutwa mu numba zage, nti wozo mukobe alie ku idia lyage. 12 Nu mukinga wa sankoga ndi asongwa na muntu uteli wa kikanga kya sankoga, nti ntalie ku tuyulo twasililila. 13 Tondo mukinga wa sankoga, ndi eli musigala aba ndi atikibwa n'iba wage nu nteli na mwana, nu asubya ku numba z'isi anga ku bukinga bwage, nti alie ku idia ly'isi. Tondo mugeni unsania ntalie kulyo aba kakeke.
14 Muntu uteli na bwangato bwa kulilia, ndi alia geteli kulimenya, nti alisubanie ku sankoga gamozi na kyindi kimozi kya bitano kyatalikilwa kulyo. 15 Basankoga tababigie tuyulo twakasilwe na baIsraeli ku Yehowa, 16 aba tabeitabizie bantu beteli na bwangato kulia ku tuyulo twasililila nu kuba na katati ka bwagi, kubuno Nne nili Yehowa ukubasililizia.’”
Bisansa nu tuyulo tuteitabizibwa
17 Yehowa akakizizie Musa bunee: 18 “Tenda na Haruni nu bana bage nu baIsraeli bansania. Babule bunee: ‘Muntu unsania wa baIsraeli, aba wa bageni beli munkatini mweinyu, ukukasana lukaso lwa kayulo ka kugisibwa ku Yehowa, ndi akakasana kuzindilizia idumbilo lyage, aba ndi akakasana kubuno atunda kukakasana mu mutima wage tugu, 19 nti akase mulume wa ngombe aba kilimba kya mukoko aba kya mpene kiteli na kabalibango buno keitabizibwe ku kabamba kage. 20 Tondo nyama insania zili na kabalibango, tamuzikasane, kubuno tazitabizibwe ku kabamba keinyu. 21 Kungwa muntu unsania akasana ku Yehowa kayulo ka bubobelelo katuka ku ngombe aba mikoko aba mpene buno azindilizie idagano lyage aba kuzikasana ku lutundo lwa mutima wage, nti nyama zibe ziteli na kabalibango aba kyulu kimozi. Ndi ta bubo, nti tazitabizibwe. 22 Tamukasane ku Yehowa nyama zili kyuku aba zabeleka aba zili kitunga aba zili na byulu aba zili na mpele ku kikoba aba zili na kibambu. Tamukasane nyama zili na bibino ku Yehowa buno zibe kayulo aba kisansa ga kasenga ka kugisia bisansa ku Yehowa. 23 Tondo munakasana ku Yehowa ngombe aba mukoko guli na kimozi kikwitumpula anga kayulo ka lutundo lwa mutima, tondo ngombe aba mukoko ukwitumpula tazitabizibwe ku kayulo ka kuzindilizia idagano. 24 Tamukase ku Yehowa nyama zili na mabolo mazo matutwa aba masumitilwe aba maseswa aba matwa, tamukite bubo mu kisi kyeinyu, 25 nu tamwitabizie kuzikata ku maboko ma bageni nu kuzikasana kuba idia lya Kalaga weinyu. Nyama zili bubo tazitabizibwe ku kabamba keinyu kubuno zili zatubuka aba zili na kabalibango.’”
26 Yehowa abwide Musa bunee: 27 “Nkungu zabuta ngombe aba mukoko aba mpene, nti kyana kyasigala na nina bindi mutubakamo. Kulinga ku kindi kya kinana, kineitabizibwa kuba kisansa kyakasanwa ku Yehowa mu nzila za keiya. 28 Tamusese ngombe aba mukoko nu kyana kyazo ku busi bumozi. 29 Mu nkungu za kukasana ku Yehowa kayulo ka kuganuna, mukakase mu nzila nsoga buno keitabizibwe ku kabamba keinyu. 30 Kalibwe mu busi bubo, nu tamusige aba kakeke kuzo aaba nu nindunindu. Nne nili Yehowa. 31 Kokomeziazi makakizio mane nu kumakita. Nne nili Yehowa. 32 Nu tamubigie izina lyane lyasililila, kubuno Nne nili Yehowa ukumusililizia nu 33 namutikizye mu kisi kya Misri buno nibe Kalaga weinyu. Nne nili Yehowa.”