Bindi binene bya Kalaga
23
1 Lingo Yehowa abwide Musa bunee: 2 “Tenda na baIsraeli bansania nu babule bunee: ‘Bibino bili bindi byane binene, u bindi binene bya Yehowa, biwasambale bibe bindi bya musanganano wasililila. Sabato, u Busi bwa Kumunwa.
3 Mwakite mulimo bindi mutuba, tondo busi bwa mutubakamo buli Sabato za kumunwa lebelebe, u busi bwa musanganano wasililila. Mubo tamukite mulimo wa lukita lunsania. Buli Sabato ku Yehowa kunsania kumwikalage.
Kisagulo ky'Isuluko nu kya tumpampa tutagaga
4 Bindi bibino bili binene ku Yehowa, nu misanganano zasililila zimwasambale mu nkungu zabyo. 5 Mwigolo lya kindi ky'ikumi nu binazi kya mwezi mutangi kili kisagulo ky'Isuluko lya Yehowa. 6 Kindi ky'ikumi nu bitano kya wozo mwezi kyalinga kisagulo kya Yehowa kya tumpampa tutagagibwa. Bindi mutubakamo mwalie tumpampa tutagagibwa. 7 Busi butangi bwakyo mumane musanganano wasililila, nu tamukite mulimo unsania. 8 Mukasanage ku Yehowa kayulo mu nzila za keiya bindi mutubakamo, busi na busi kayulo ka bo. Nu lingo ku busi bwa mutubakamo mumane musanganano wasililila.’”
Kisagulo kya matubulo matangi
9 Yehowa atendile ku Musa bunee: 10 “Tenda na baIsraeli bansania nu babule bunee: ‘Nkungu zimwingile mu kisi kinkumukasa nu mwakale matubulo makyo, lusiazi ku sankoga mukanda wa matubulo matangi meinyu. 11 Sankoga agutengietengie lwabusio lwa Yehowa buno witabizibwe ku kabamba keinyu. Sankoga agutengie ku busi bwa kindi kitangi kumbusa kwa Sabato. 12 Busi bumwatengietengie mukanda, musese kyana kya mukoko kya mwaka umozi kiteli na kabalibango, kibe kayulo ka kugisibwa ku Yehowa 13 gamozi na kayulo ka bunga bwakuka byanzi binazi nu kyindi, a nu bunga bubo bwa ngano buli busoga nunse, nu bwasambikwa na makiti, u kayulo ka nsunu nsoga kakasanwa ku Yehowa mu nzila za keiya, gamozi na kayulo ka kunua, u idega b limozi lya maku. 14 Nu inyuwe tondo, tamulie kampampa kansania, aba mbuto za ngano zayikwa aba mbisi aaba nu busi bubo bwa kukasana kano kayulo ku Yehowa, Kalaga weinyu. Ikakizio lilino lili lyeinyu mu bibuti byavwe aaba nu milyalya, kunsania kumwikalage.
Kindi kinene kya Pentekote
15 Kulinga na busi buli kumbusa kwa Sabato, u busi bumwavule na mukanda wa matubulo matangi, muganze mazinga mutubakamo. 16 Ganzazi bindi makumi matano aaba nu ku kindi kili kumbusa kwa kuzindilila kwa mazinga mutubakamo, nu busi bubo mwakase kayulo ka bunga buto ku Yehowa. 17 Kutukila biziki binsania bimwikalage mubyo, lusiazi tumpampa tubili twakitwa na byindi bibili by'ikumi, bya luzi lwa kulindika bunga, bya bunga bwa ngano buto. 18 Lusiazi gamozi na tuto tumpampa bilimba bya byana bya mikoko bya mwaka umozi nu byasililila, nu lingo kyana kya mulume kya ngombe kito nu bilimba bibili bya mikoko. Kube kayulo ka kunua, ka kwenda gamozi nako, u tuyulo twa nsunu nsoga twatananizia Yehowa mu keiya. 19 Kusila nti mwasese kilimba kimozi kuba kisansa kya bwagi, nu byana bibili bya mikoko byili bya mwaka umozi kuba kisansa kya bubobelelo. 20 Sankoga atengyetengye byana bibyo bibili bya mikoko lwabusio lwa Yehowa anga kisansa kya kutengibwa gamozi na tumpampa twa bunga buto bwa matubulo matangi. Bili bisansa byasililila bya Yehowa ku sankoga. 21 Bubo busi mwamane musanganano wasililila nu kutakita mulimo unsania. Ikakizio lilino lili lya milyalya kumuli mu bibuti byeinu bikuvwa, nu kunsania kumwikalage.
22 Mu nkungu zimwakale matubulo mu kisi kyeinyu, tamukale ku myaga za masoa meinyu, nu tamusongye kyasigala mumo. Sigazi mbuto zili bwigibwigi na myaga, nu mbuto zikukoloka gansi ku bazambi nu ku bageni. Nne nili Yehowa, Kalaga weinyu.’”
Kindi kinene kya kwida monze
23 Yehowa abwide lingo Musa bunee: 24 “Bula baIsraeli bunee: ‘Ku kindi kitangi kya mwezi wa mutubakamo mwabe na busi bwa kumunwa, busi bwa kumana musanganano wasililila, buli busi bwa kwikengelezia na kwida monze. 25 Ku bubo tamukite mulimo unsania, tondo mukasane ku Yehowa kayulo mu nzila za keiya.’”
Kindi kya bukulumania
26 Yehowa abwide Musa bunee: 27 “Kindi ky'ikumi kya wono mwezi wa mutubakamo kili kindi kya bukulumania. Ku bubo busi mumane musanganano wasililila nu kwikanda buno tamulie, nu kukasana ku Yehowa kisansa kyakitwa mu keiya. 28 Tamukite mulimo unsania busi bubo, kubuno buli busi bwa kukulumanibwa, busi bwa kukita bukulumania ku kabamba keinyu kumukulumania na Yehowa, Kalaga weinyu. 29 Muntu unsania uteisungia busi bubo apumbibwe ku bantu bage, 30 nu muntu unsania wakita mulimo unsania bubo busi namubigie munkatini mwa bantu bage. 31 Tamukite mulimo unsania, ta wampa. Lili ikakizio lya milyalya ku bibuti bikuvwa nu mu biziki binsania bimwikalage mubyo. 32 Bubo busi buli Sabato za kumunwa kumuli, nu mwisungie kutalia. Kulinga mwigolo lya busi bwa mubula bwa mwezi aaba nu mwigolo lya busi bw'ikumi mukokomeziazi Sabato zeinyu.”
Bindi binene bya nusu
33 Nu Yehowa abwide Musa bunee: 34 “Bula baIsraeli bunee: ‘Ku kindi ky'ikumi nu bitano kya wono mwezi wa mutubakamo kwalinga bindi binene bya Yehowa bya kwikala ga nusu nu bili ku nkiko za bindi mutubakamo. 35 Ku busi butangi bwa zezo nkiko kwamanwe musanganano wasililila. Tamukite mulimo unsania ku bubo busi. 36 Ku bindi mutubakamo, na busi na busi, kasanazi ku Yehowa bisansa byakitwa mu nzila za keiya, nu ku busi bwa kinana mumane lingo musanganano wasililila nu kukasana ku Yehowa kisansa kyakitwa mu nzila za keiya. Guli musanganano wa kuzinda, nu tamukite mulimo unsania.
37 Bibino bili bindi binene, anga bindi bya bisagulo bya Yehowa, mubyo mwamane misanganano zasililila nu kukasana bisansa nu tuyulo twagisizibwa ku Yehowa mu nzila za keiya, tuyulo twa kugisibwa, nu twa bunga, bisansa nu tuyulo twa kunua anga bwatunganana kukaswa na busi na busi. 38 Bisansa bibino bikatalikwa ku bibyo bya Sabato za Yehowa, nu ku bibyo bya nkaso zeinyu nu ku bibyo bya bilumbilo, nu ku bibyo bimwakasana na mutima weinyu, bimukukasana ku Yehowa.
39 Kumbusa kwa matubulo mansania ma kisi, gamwasile kutubula binsania bya masoa, kulinga ku kindi ky'ikumi nu bitano kya mwezi wa mutubakamo, mwabe na kisagulo kinene kya Yehowa bindi mutubakamo. Ku busi butangi tamukite mulimo unsania, nu lingo ku busi bwa kinana tamukite mulimo wa lukita lunsania. 40 Busi butangi bwa kinana kolazi biguma bisoga bya miti, nu nanga za bibila, nu ntabi zili na nsamba ningi, nu ntabi za miti zikwasa bwigi na nuuzi, nu mubogeboge lwabusio lwa Yehowa, Kalaga weinyu bindi mutubakamo. 41 Na mwaka na mwaka mube na bindi bibino bya kisagulo kya Yehowa bindi mutubakamo. Lili ikakizio lya milyalya ku bibuti bikuvwa: Mwabe na bindi bibyo mu mwezi wa mutubakamo. 42 Mwikalage ga nusu bindi mutubakamo. Bansania babutwa mu bikanga byeinyu beikale ga nusu, 43 buno bamenye buno nikazizie baIsraeli ga nusu nkungu zinabatikizye mu kisi kya Misri. Nne nili Yehowa, Kalaga weinyu.’”
44 Ububo Musa asambalide baIsraeli bindi binene bibino bya Yehowa.