Matala ma Numba za Kukulumana
24
1 Yehowa abwide Musa bunee: 2 “Kakizia baIsraeli buno bavwe kuguli na makiti masoga ma zeituni zatutwa ku kabamba ka kyengi buno matala mabangage kankanka. 3 Kumbuga kwa nsulu za bulongeki mu Numba za Hema za Kukulumana, Haruni amalongeke buno mabange lwabusio lwa Yehowa nkungu insania za kindi kulinga mwigolo aaba nu nindunindu. Ikakizio lilino lili lya milyalya mu bibuti byeinu. 4 Haruni alongeke matala ga Kyanikilo kya olo nsoga kili lwabusio lwa Yehowa bindi binsania. Tumpampa twa meza masoga
5 Tola bunga busoga bwa ngano nu nabo okya tumpampa ikumi nu tubili. Kampampa na kampampa kokibwa na bunga bwakuka byanzi bibili. a 6 Watubike mu milindi ibili, tumpampa mutuba ku mulindi na mulindi, gantata meza ma olo nsoga meli lwabusio lwa Yehowa. 7 Gamozi na tumpampa twa mulindi na mulindi bika bulago busoga buli kakengelezio ka tumpampa nu bwagisibwa, kayulo kakasanwa ku Yehowa mu nzila za keiya. 8 Tuto tumpampa twabikwe ga meza lwabusio lwa Yehowa mu nkungu za kutubika, u busi na busi bwa Sabato, ku kabamba ka baIsraeli, nu lili ikakizio lya milyalya. 9 Tumpampa tuli twa Haruni nu twa bana bage, kubuno tuli kyindi kyasililila nunse kya bibe byabo bya bisansa nu tuyulo twakasanwa ku Yehowa mu nzila za keiya.”
Mulingani eitwa
10 Kwabezaga musikila, nina muIsraeli nu isi muMisri. Atabangile na baIsraeli, nu wozo musikila wa mukikulu alwanine na muIsraeli mu ido. 11 Wozo musikila, mwana wa mukikulu muIsraeli, alingile izina lya Yehowa nu kuswilila. Ukinsa bamwekile ku Musa. Izina lya nina lyabezaga Selomiti, mukinga wa Diburi wa kikanga kya baDani. 12 Nu bo bamukandile mu kikando buno bamenye kusombola kwa Yehowa kwamusombolele.
13 Nkungu zezo Yehowa abwide Musa bunee: 14 “Ekazi wozo walingenne ku isula ly'ido, nu bansania bamungule babike maboko g'itoe lyage, nu bansania ba musanganano bamwise makozi. 15 Kumbusa bula baIsraeli bunee: ‘Muntu unsania walinga Kalaga wage eeke bwagi bwage wenyene. 16 Wozo ukwililika izina lya Yehowa lebelebe eitwe. Bansania ba mwino bamwise makozi. Ndi eli mugeni aba ndi eli mwiya kisi, ndi eililika izina lya Yehowa nti eitwe.
17 Muntu unsania wita ungo muntu, nti eitwe. 18 Muntu unsania ukwita nyama z'ungo muntu, nti azisubye, kalamo ku kalamo. 19 Nu muntu ndi asumita munyage, kyakitile kyakitwe kweli, 20 kubeleka ku kubeleka, liso ku liso, linyo ku linyo. Anga bwasumitile muntu, asumitwe bumozi. 21 Unsania ukwita nyama, nti asubye engo, tondo wozo ukwita muntu nti eitwe. 22 Mwabe na mulembe umozi ku bageni nu ku beiya kisi. Nne nili Yehowa, Kalaga weinyu.’”
23 Kusila Musa asambalide baIsraeli, nu bekile wozo wililikaga ku isula ly'ido, nu bamwisile makozi. BaIsraeli bakitile anga bwakakizizie Yehowa ku Musa.