Kwimika kwa Numba Zasililila.
40
1 Nu Yehowa abwide Musa bunee: 2 “Busi butangi bwa mwezi mutangi, obaka Numba za Hema, u Numba za Kukulumana. 3 Bika Sanduku za Bulongeki muzo, nu anika nsulu za kuzibisa lwabusio lwazo ku mango mazo. 4 Vwa mu Numba na Meza, nu anza binsania byamo gamo. Bika Kyanikilo nu bika matala makyo ku biziki byamo. 5 Bika Kasenga ka Kugisia Aliga ka olo lwabusio lwa nsulu za kubisa Sanduku tondo bwigi na Sanduku. Kumbusa anika nsulu za lwibi ga mango, ku mwingilo wa Numba. 6 Bika Kasenga ka Kugisia Bisansa kakitilwe na nsubi bwigi na mwingilo wa mukolo wa Numba za Kukulumana, 7 nu bika Kibungulu kya koga gasamba Kasenga ka Tuyulo nu Numba za hema, nu kusongolozia mazi mukyo. 8 Imika mukolo wa mulungu wa Numba wa kuzitimba ndenge insania, nu anika nsulu za lwibi lwa mukolo. 9 Tola mwambo wa kubonga, nu bongia Numba za Hema nu binsania bili muzo. Bubo u buwengie Numba za Hema nu binsania, nu bibe byasililila. 10 Kumbusa bongia Kasenga ka Kugisia Bisansa nu bikagi binsania byako. Engia Kasenga nu kabe kasililila nunse. 11 Bongia kibungulu nu kikalilo kyakyo, nu kubyengia.
12 Vwa na Haruni nu bana bage ga mwingilo wa Numba za Kukulumana nu kubogia na mazi. 13 Kumbusa vwalikya Haruni nsulu zasililila, nu kumubongia mwambo nu kumwengia buno ankitile mulimo wa busankoga. 14 Vwa na bana bage nu kubavwalikya makoti. 15 Babongie mwambo anga buwabongezie isibo, buno bankitile mulimo wa busankoga. Kubongibwa kwabo mwambo, kwabe ku busankoga bwa milyalya mu bibuti byabo binse.”
16 Musa akitile binsania anga bwamukakizizie Yehowa. 17 Ukinsa mu busi butangi bwa mwezi mutangi wa mwaka w'ibili, Musa obakile Numba za Hema. 18 Gaazyobakile, Musa abikile bikalilo bya Numba mu biziki byabyo nu eimikile mbavu gabyo, nu abikile tuti twazo mu biziki byato, nu eimikile mango. 19 Abikile nsulu za hema ga mbavu, nu akukide zo na hema, anga bwamukakizizie Yehowa.
20 Atolile Bulongeki nu kububika mu Sanduku. Abikile mingolo zazo mu mpo za kuzikata, nu abikile kyuki kya kukulumania, u Kisumbi kya Kyombo, gazo. 21 Kumbusa ekile Sanduku mu numba kuzibika muzo, nu anikile nsulu ku mango mabezaga lwabusio lwa Sanduku kubisa Sanduku za Bulongeki, anga bwakakizizie Yehowa ku Musa.
22 Musa abikile Meza ma Tumpampa mu Numba za Kukulumana ku lulenge lwa kwikazi, u ku ntungo za ku seidume gakwingila muntu mu Numba, lwabusio lwa nsulu za kulanga Sanduku, 23 nu abikile gamo tumpampa lwabusio lwa Yehowa, anga bwamukakizizie Yehowa.
24 Nu abikile Kyanikilo kya Matala mu Numba za Kukulumana ku ntungo za kulolana na Meza, u ku lulenge lwa kwidume kwa Numba, 25 nu abangizie matala lwabusio lwa Yehowa, anga bwamukakizizie Yehowa.
26 Musa abikile Kasenga ka Aliga ka olo mu Numba za Hema lwabusio lwa nsulu zikulanga Sanduku, 27 nu agisizie gako bulago bwa aliga, anga bwamukakizizie Yehowa. 28 Kumbusa eimikile nsulu za lwibi ga mango ma lwibi lwa Numba za Kukulumana na Kalaga.
29 Musa abikile Kasenga ka Kugisia Tuyulo bwigi na mwingilo wa mukolo wa mulungu wa Numba, u Numba za Kukulumana na Kalaga, nu agisizie gako tuyulo twa kugisibwa nu twa bunga, anga bwamukakizizie Yehowa. 30 Abikile Kibungulu gasamba Numba nu Kasenga ka Kugisia Tuyulo, nu asongolozizie mazi mukyo. 31 Musa nu Haruni nu bana bage bogile ku maboko mabo nu ku magulu mabo mukyo. 32 Mambizi mansania ma kwingila mu Numba za Kukulumana, nu mambizi mansania ma kukunda Kasenga ka Kugisia Tuyulo, bogile ku maboko nu ku magulu, anga bwakakizizie Yehowa ku Musa.
33 Kumbusa Musa akandile mukolo wa mulungu ku mango mago kutimba Numba nu Kasenga ka Tuyulo, nu eimikile nsulu za lwibi lwa kwingila mu mulungu ga mango ma mwingilo. Ububo Musa asilile mulimo.
Lutanuno lwa Yehowa.
34 Kusila kimpa kikyo kyakukide Numba za Kukulumana, nu lutanuno lwa Yehowa lwizazizie Numba. 35 Musa ntavamine kwingila mu Numba za Kukulumana, kubuno kimpa kikede gantata gazo, nu lutanuno lwa Yehowa lwizazizie Numba za Hema.
36 Mu ngendo insania za baIsraeli gabendaga ku lingo ido, ndi kimpa kyasakikwa nti benda, 37 tondo ndi kimpa kyasigede ga Numba, nti basigede mu ido lilyo aaba nu kimpa kyasakikwa lingo. 38 Ububo kimpa kya Yehowa kyabezaga gantata ga Numba za Kukulumana mu musi, nu keiya kabezaga mu kimpa mu kindi, nu baIsraeli bansania bakimonaga ko mu ngendo zabo insania.