Nsulu za basankoga.
39
1 Balukile nsulu na misinge z'idangi ly'igulu, nu z'idangi lya misamba za mpene, nu zakisimana, nu bazilukile nsulu za basankoga buno bazivwale mu nkungu za mulimo wabo mu Kiziki za Kyasililila. Nu bakitile nsulu za busankoga za Haruni, anga bwakakizizie Yehowa ku Musa. 2 Bakitile nsulu zamanagwa efodi na misinge za olo nu z'idangi ly'igulu nu z'idangi lya misamba za mpene nu zakisimana nu za kitani kyotwa busoga. 3 Batulile olo zibe nunse nkeke nu kuzisesa kuba musinge buno bavwame kuziluka mu nsulu zalukilwe na misinge z'idangi ly'igulu nu z'idangi lya misamba za mpene nu zakisimana nu kitani kisoga, u mulimo wa mukulumizi wa menge. 4 Bakitile byindi bya bituli byalukilwe ku tunkundunkundu tubili twazo buno banavwama kuzikundamania lwabusio nu kuzikanda. 5 Nu mukoma wazo lingo walukilwe na misinge za olo nu misinge z'idangi ly'igulu nu misinge z'idangi lya misamba za mpene nu misinge zakisimana nu misinge za kitani kisoga, nu mukoma walukilwe gamozi na nsulu za efodi buno bibe kimozi lebelebe, nu tabyasigana byo bibili, anga bwakakizizie Yehowa ku Musa.
6 Bakandile makozi ma kibakuli aba sardoniki mu makila ma olo, nu basanzile gamo na masanzo ma kamenyikilo meina ma bana ba Israeli. 7 Nu bamakandile ga byindi bibyo bya bituli bya efodi, mabe makozi ma kakengelezio ma baIsraeli, anga bwakakizizie Yehowa ku Musa.
8 Bakitile nsulu za ku bukuba, u mulimo wa mwiya menge. Bazikitile anga bubakitile efodi, na misinge za olo nu z'idangi ly'igulu nu z'idangi lya misamba za mpene nu zakisimana nu za kitani kisoga. 9 Balukile nsulu bulingilingi, bulazi nu bungulu bumozi anga bulazi bw'ikasa limozi, nu bazigondile munkatini mwazo. 10 Baswikile kuzo makozi ma bukunza bukali mu milindi inazi. Mu mulindi mutangi mwabezaga akiki zakisimana nu yakuti zaluluka nu baharamani. 11 Mu mulindi w'ibili mwabezaga zumaridi nu yakuti samawi nu idama. 12 Mu mulindi w'isatu mwabezaga haikinto, nu akiki lyakisimana, nu ametisto. 13 Mu mulindi w'inazi mwabezaga zabarajadi, nu shohamu, nu yaspi. Makozi makandilwe mu makila ma olo. 14 Makozi mabezaga ikumi nu mabili, limozi limozi ku meina ma bana ba Israeli, nalyo nalyo lyasanzwa n'izina lya kikanga kimozi kya baIsraeli na masanzo anga mamo ma kamenyikilo.
15 Bakitile miyololo ibili za olo, zasusania muzigi wotilwe. 16 Bakitile makila mabili ma olo nu mpo ibili za olo, nu na makila bakandile mpo ku tunkundunkundu twa zezo nsulu za kukukila bukuba. 17 Baswikile zezo miyololo ibili ku mpo zabezaga ku tunkundunkundu twa nsulu za bukuba. 18 Nu baswikile tungo tuzinda twa miyololo ku makila makandile makozi mu efodi ku byindi bibyo bya bituli bya efodi, ku lulenge lwa lwabusio lwa efodi. 19 Bakitile ingo mpo ibili za olo. Bazikandile ku tungo tunkundunkundu twa nsulu za bukuba kunsi kwazo ku lulenge luli bwigi na efodi. 20 Nu bakitile ingo mpo ibili za olo nu baziswikile kuzinda kwa byindi bya bituli byili lwabusio lwa efodi, bwigi na kiziki kya kuluka mukoma ku efodi tondo gantata gakyo. 21 Bakandile mpo za nsulu za bukuba ku mpo za efodi na muzigi w'idangi ly'igulu, nu kuzikanda ku mukoma buno nsulu za bukuba tazilekanuke na efodi, anga bwakakizizie Yehowa ku Musa.
22 Nu bakitile nkanzu za efodi zalukwa nunsania na misinge z'idangi ly'igulu, 23 na mwimbo munkatini mwa nsulu za nkanzu. Wozo mwimbo walukilwe anga mwimbo mukeke wa nsulu buno tazatike. 24 Ku mupinbo unsania wa nkanzu za efodi bakitile bisusania bya kiguma kyamanagwa komamanga byalukwa na misinge z'idangi ly'igulu, nu misinge z'idangi lya misamba za mpene, nu misinge zakisimana nu za kitani kyotwa busoga. 25 Nu bakitile ngebengebe za olo nsoga nunse nu baziswikile ku mupimbo wa nkanzu za efodi gasamba biguma bya komamanga. 26 Ku mupindo unsania wa nkanzu kwabezaga kiguma kimozi nu ngebengebe emozi, kiguma kimozi nu ngebengebe emozi, kutimba mupimbo unsania. Basankoga batunganenne kuvwala nkanzu nkungu zibakitilaga Kalaga mu Numba zage, anga bwakakizizie Yehowa ku Musa.
27 Nu bakitide Haruni nu bana bage makoti ma gantata malukilwe na kitani kyotwa busoga nunse, u mulimo wa mwiya menge ma kwota nu kuluka. 28 Lingo babakitide nkumbu za kitani kisoga, nu matekele ma kitani kyotwa busoga. 29 Balukile mikoma za makoti na misinge za kitani kyotwa busoga, nu misinge z'idangi ly'igulu, nu misinge z'idangi lya misamba za mpene, nu misinge zakisimana, u mulimo wa mwiya menge wa kuluka busoga, anga bwakakizizie Yehowa ku Musa.
30 Bakitile lupepe lwa nkumbu, u lupepe lwakitwa na olo nu lwa kulolesia bwangato nu luli lwasililila, nu basanzile galo na masanzo ma kamenyikilo bunee: KWASILILILA KU YEHOWA. 31 Kumbusa kwa kulukita balukandile ku nkumbu na musinge w'idangi ly'igulu kuluswika ku ntungo za malanga ma nkumbu, anga bwakakizizie Yehowa ku Musa.
Musa alola ku binsania bibakitile.
32 Bubo basilile milimo za Numba, u Numba za Kukulumana. BaIsraeli bakitile binsania anga bwakakizizie Yehowa ku Musa. 33 Bavule ku Musa na binsania bya Numba za Kukulumana nu bya mulungu: u Numba za hema na binsania byazo, u pengele za nsulu zazo, mbavu nu tuti twazo, mango mazo, nu bikalilo byazo; 34 kyuki kya bikoba bya bilimba bya mikoko byatilwa idangi lyakisimana, kyuki kya bikoba bya mpombolo, nu nsulu za kubika lwabusio lwa sanduku, 35 nu Sanduku za Bulongeki, gamozi na mingolo zazo nu kyuki kyazo u Kisumbi kya Kyombo; 36 nu Meza ma Tumpampa gamozi na binsania byamo, nu tumpampa twa kubika gamo; 37 nu Kyanikilo kya olo nsoga nunse gamozi na matala makyo nu binsania byakyo, nu makiti ma kyengi; 38 nu kasenga ka olo, mwambo wa kubonga, nu aliga za nsunu nsoga, nu nsulu za lwibi lwa kwingila mu numba; 39 nu kasenga ka kayulo ka nsubi gamozi na makila mako, mingolo zako, nu bikagi binsania byako; nu kibungulu kya koga gamozi na kikalilo kyakyo; 40 nu nsulu za mukolo wa mulungu wa Numba, gamozi na mango mago nu bikalilo byamo, nu nsulu za mwingilo wa mukolo, nu mizigi nu misumali zago; 41 nu nsulu zalukilwe za kuvwala nkungu za kukita mulimo mu Kiziki kya Kyasililila, u nsulu za kizila za Haruni sankoga, nu zezo za bana bage nkungu zabo za kukita mulimo wa busankoga.