Kuganzwa kwa baLawi.
3
1 Bibino bili bibuti bya Haruni nu Musa, ku bindi byatendenne Yehowa na Musa ku mwiduko wa Sinai. 2 Meina ma bana ba Haruni meli: Nadabu u nkula zage nu Abihu nu Eleazari nu Itamari. 3 Mamano meli meina ma bana ba Haruni, u basankoga babongezibwe mwambo, u babo bakasilwe mponga ku mulimo wa busankoga. 4 Tondo Nadabu nu Abihu bakule lwabusio lwa Yehowa, gabakasile keiya kageni ku Yehowa, mu Kalula ka Sinai; gabakule tababezaga na bana. Ukinsa Eleazari nu Itamari tugu u bakitaga mulimo wa basankoga, kunsi kwa Haruni isibo. 5 Yehowa abwide Musa bunee: 6 “Lusia kikanga kya Lawi, nu kubakasa ku Haruni sankoga buno bamukasie. 7 Bamukitile, Haruni nu bansania ba baIsraeli, mu mulimo wa Numba za Hema nu mu Numba za Kukulumana. 8 Balange bikagi binsania bya Numba za Kukulumana, nu kuzindilizia meiyanino ma baIsraeli mu mulimo wa Numba za Kukulumana. 9 Kasa baLawi ku Haruni nu ku bana bage. Munkatini mwa baIsraeli bansania baLawi beli babo bakasanwe nunse kweli. 10 Kasa Haruni nu bamulume ba kikanga kyage tugu mulimo wa kunkitila mu busankoga. Ungo unsania, anaba nazi, ndi akunda Numba za kizila nti eitwe.”
11 Yehowa abwide lingo ku Musa bunee: 12 “Busi bunalibwide nkula insania za mu kisi kya Misri niyengezizie nkula insania za baIsraeli, nkula za mulume za mukikulu na mukikulu uli muIsraeli, nu nkula za nyama insania za baIsraeli. 13 Ububo nkula zili zane; tondo kano kaluma nkwiyengezia baLawi mu kiziki kya nkula za bantu, kubatola kundi buno babe bane munkatini mwa baIsraeli bansania. Ububo baLawi beli bane. Nne nili Yehowa.”
14 Nu Yehowa abwide Musa mu kalula ka Sinai bunee: 15 “Ganza baLawi nu bikanga byabo mu kikanga ky'isibo. Baganze wamulume na wamulume, kulinga na babo beli na mwezi umozi tugu.” 16 Ukinsa Musa aganzile baLawi, anga bwakakizizibwe na Yehowa. 17 Mamano meli meina ma bana ba Lawi, u Gersoni, Kohati nu Merari. 18 Mamano meli meina ma bikanga bya Gersoni, u Libuni nu Simei. 19 Meina ma bikanga bya Kohati meli Amramu, Izihari, Hebroni, nu Uzieli. 20 Meina ma bikanga bya Merari meli Mali nu Musi. Bibino bili bikanga bya baLawi, mu numba za beisibo.
21 Mu kikanga kya Gersoni mwabezaga bikanga bya baLibuni, nu baSimei. Bibino bili bikanga bya baGersoni. 22 Babo baganzilwe kubeli, kulinga na babo ba mwezi umozi, nu kutinga ku bansania, babezaga maganzo ma bamulume tununu mutubakamo nu nkama itano (7.500). 23 Bikanga bya baGersoni batunganane kwikala kumbusa kwa Numba za Hema, ku lulenge lukwendaga kisongo kya busi. 24 Mukota wa bikanga bya baGersoni abezaga Eliasafu, mwana wa Laeli. 25 Mulimo wa baGersoni wabezaga kulanga Numba za Kukulumana, nu Hema zazo, u nsulu nu bikoba byakuzikukila, nu nsulu za lwibi lwa Numba za Kukulumana, 26 nu nsulu za mukolo wa mulungu nu nsulu za mwingilo guli bwigi na Kasenga ka Bisansa, nu mizigi za kukokomezia mango ma nsulu, nu binsania bya mulimo wabyo.
27 Mu kikanga kya Kohati, mwabezaga bikanga bya baAmramu nu baIzihari nu baHebroni nu baUzieli; bibino bili bikanga bya baKohati. 28 Babo baganzilwe kubeli, kulinga na babo ba mwezi umozi nu kutinga ku bamulume bansania, babezaga maganzo ma bamulume tununu kinana nu nkama mutuba (8.600). BaKohati batunganenne kulanga bikagi bya mu numba, u Kiziki Kyasililila. 29 Kibe kyabo kya kwikala kyabezaga ku lulenge lwa kwidume kwa Numba za Kukulumana. 30 Mukota wa bikanga binsania bya baKohati abezaga Elizafani, mwana wa Uzieli. 31 Mulimo wa baKohati wabezaga kulanga Sanduku, nu Meza ma Tumpampa, nu Kyanikilo kya Matala, nu tusenga, nu binsania bya mu Numba za Kukulumana, bya mulimo wakitwa mu zezo Numba, nu nsulu za munda mwa Numba, nu binsania bya mulimo wa mu Numba.
32 Mukota munene wa baLawi, u Eleazari mwana wa Haruni sankoga, asombwedwe kuba mwangati wa babo bakukunga bulangi bwa Kiziki Kyasililila.
33 Mu kikanga kya Merari mwabezaga bikanga bya baMali nu baMusi. Bibino u bikanga bya baMerari. 34 Babo baganzilwe kubeli, kulinga na babo ba mwezi umozi nu kutinga ku bansania, babezaga maganzo ma bamulume tununu mutuba nu nkama ibili (6.200). 35 Mukota wa kikanga kya baMerari abezaga Zurieli, mwana wa Abihaili. Kibe kyabo kya kwikala kyabezaga ku lulenge lwa kwikazi lwa Numba za Hema. 36 BaMerari basombwedwe kulanga mbavu za Numba, nu mitondo zazo, nu mango mazo gamozi na bikalilo byamo, nu binsania bya mulimo wazo. 37 Gamozi na mango ma mukolo wa mulungu nu bikalilo byamo nu mizigi nu misumali zamo.
38 Musa nu Haruni nu bana bage batunganenne kwikala lwabusio lwa Numba za Hema, ku lulenge lwa kukutukaga kisongo kya busi. Batunganenne kukita mulimo unsania wa kukitila baIsraeli mu mulimo wakitwe mu mulungu wa Numba nu mu Numba Zasililila lingo. Ungo unsania wakunde kugukita eitwe.
39 Maganzo ma baLawi bansania baganzile Musa nu Haruni ku ikakizio lya Yehowa mabezaga tununu makumi mabili nu tubili (22.000). Baganzile bamulume bansania, kulinga na babo ba mwezi umozi, nu kutinga.
40 Yehowa abwide Musa bunee: “Ganza bamulume bansania beli nkula za mwezi umozi nu kutinga, nu sanza meina mabo. 41 Ntolele baLawi mu kiziki kya nkula za baIsraeli, nu bituganwa bya baLawi ku kiziki kya nkula za bituganwa bya baIsraeli; nne u Yehowa.”
42 Ukinsa Musa aganzile nkula insania za baIsraeli, anga bwamukakizizie Yehowa. 43 Maganzo ma bamulume beli nkula za mwezi umozi nu kutinga, mabezaga tununu makumi mabili nu tubili, nkama ibili makumi mutubakamo nu basatu (22.273), basanzilwe meina.
44 Yehowa abwide lingo Musa bunee: 45 “Tola baLawi mu kiziki kya nkula za baIsraeli, nu bituganwa bya baLawi ku kiziki kya nkula za bituganwa bya baIsraeli; baLawi babe bane; nne nili Yehowa. 46 Ku kukulula zezo nkula nkama ibili makumi mutubakamo nu basatu za baIsraeli, zatinga maganzo ma baLawi, 47 tola shekeli itano ku nkula na nkula, nu shekeli zibe za shekeli a za Numba Zasililila, z'idindiko lya gera b makumi mabili. 48 Kasa Haruni nu bana bage shekeli zezo za kukulula nkula zatinga maganzo ma baLawi.”
49 Ububo Musa atolile bikulo byakukulula nkula zatingile maganzo ma baLawi. 50 Ku nkula za baIsraeli zatingile maganzo ma baLawi atolile shekeli kanunu, nkama isatu, makumi mutuba nu itano (1.365), za shekeli za Numba Zasililila. 51 Musa akasile shekeli zezo za kuzikulula ku Haruni, nu ku bana bage, anga bwamukakizizie Yehowa.