Milimo za baLawi.
4
1 Yehowa abwide Musa nu Haruni bunee: 2 “Ganzazi baKohati munkatini mwa baLawi mu bikanga byabo, nu mu numba zabo. 3 Muganze bamulume bansania beli na myaka makumi masatu nu kutinga aaba nu ku babo beli na myaka makumi matano, u babo bavule kukita mulimo mu Numba za Kukulumana. 4 Mulimo wa baKohati mu Numba za Kukulumana uli kulanga bikagi byasililila nunse. 5 Nkungu za kuzanzukila lugendo lwa musanganano, Haruni nu bana bage beingile mu Numba nu kugezia nsulu zili lwabusio lwa Sanduku, nu kukukila Sanduku za Bulongeki nazo. 6 Kusila bazikukile na bikoba bya pombolo,a u nyama za mu kitatenge, nu kubikukila na nsulu z'idangi ly'igulu, nu kumbusa kubika mu mpo mingolo za kweka Sanduku. 7 Ga Meza ma Tumpampa zikulolesia buno Yehowa eli gago babike nsulu z'idangi ly'igulu, nu kubika gantata gazo mpepe nu mpagu, bibungulu nu makopo ma kutaga maku ma kunubwa. Tumpampa tuli ga Meza kankanka tusigale gamo. 8 Banze gantata ga bibyo nsulu zakisimana, nu kuzikukila na bikoba bya pombolo. Kumbusa babike mingolo za kumeeka mu biziki byazo. 9 Batole nsulu z'idangi ly'igulu, nu kukukila kyanikilo kya kusania kyengi gamozi na matala makyo, nu tulaso twa kukalakasa ntambi, nu mpepe zamo, nu makopo mansania ma kweka makiti ma matala. 10 Bagonde Kyanikilo nu nsulu zili gakyo, nu binsania byakyo mu bikoba bya pombolo nu kubibika gantata ga mingolo za kubyeka.
11 Nu gantata ga Kasenga ka Olo kakugisia Bulago banze nsulu z'idangi ly'igulu, nu kuzikukila na bikoba bya pombolo, nu kumbusa kubika mu mpo zako mingolo za kukeeka. 12 Batole bikagi binsania bibakukita nabyo mulimo wa, numba Zasililila, nu kubigonda mu nsulu z'idangi ly'igulu, nu kuzikukila na bikoba bya pombolo, nu kubibika gantata ga mingolo za kubyeka.
13 Batikye lwito lwa Kasenga ka Nsubi ka Tuyulo, nu kwanza ko na nsulu z'idangi lya misamba za mpene. 14 Kusila babike ga zezo nsulu binsania bya mulimo wa kako kasenga, anga bibungulu bya kweka keiya, nu nkanya, nu mpagu, nu bibungulu bya kusandila mikila. Gabasile kubika binse mu kiziki, bakukile byo na bikoba bya pombolo, nu kubika mu mpo zako mingolo za kukeeka.
15 Nkungu zasile Haruni nu bana bage kukukila bikagi binsania byasililila, u bikagi bya Numba Zasililila, nu bantu bansania ba mu ido beli kayikayika kwendelela, baKohati bavwe kubyeka, tondo tabeitubye ku bintu byasililila. Ndi beitubya kubyo, nti bakue. Mulimo wa baKohati guli kweka bibyo bili mu Numba za Kukulumana.
16 Mulimo wa Eleazari, mwana wa Haruni, guli kulanga makiti ma matala ma kusania kyengi, nu bulago bwa nsunu nsoga, nu bunga busoga bwa kayulo, nu mwambo wa kubonga. Alange lingo Numba Zasililila insania, nu binsania bili muzo, u bintu byasililila.”
17 Yehowa atendile lingo ku Musa nu Haruni bunee: 18 “Tamulekanukye bikanga bya baKohati na bango baLawi. 19 Bakitile bubuno buno balame nu tabakue, mu nkungu za kukunda bikagi byasililila nunse: Haruni nu bana bage beingile mu Numba Zasililila, nu kutenda ku muntu na muntu mulimo wage, kumulolesia kikyo kyeke. 20 Tondo baKohati bobenyene tabeingile mu numba kumona ku bikagi byasililila nkungu zibyakukilwa, ta kazanga kamozi, kubuno ndi bakita bubo, nti bakue.”
21 Yehowa abwide Musa bunee: 22 “Lingo, ganza baGersoni mu bikanga byabo, nu mu numba zabo. 23 Ganza bamulume bansania beli na myaka makumi masatu, aaba nu ku babo beli na myaka makumi matano, bavwe kukita mulimo wa Numba za Kukulumana. 24 Mulimo wa bikanga bya baGersoni guli kunkitila nu kweka mizigo, 25 u nsulu za Numba za Kukulumana, u kyuki kya bikoba bya pombolo, nu kyuki kya bikoba bya bilimba bya mikoko byakisimana, gamozi na nsulu za lwibi lwa kwingila mu Numba, 26 nu nsulu za mukolo wa mulungu gukutimbikania Numba nu kasenga, nu nsulu za mwingilo wa mukolo, nu mizigi nu binsania bya kukita mulimo wabyo. BaGersoni bakakita mulimo unsania wa bintu bibino. 27 Mulimo wabo unsania, bagukite ku ikakizio lya Haruni nu bana bage. Haruni nu bana bage babakakizie mulimo wabo, ku muntu na muntu muzigo wage wa kweka, aba ungo mulimo wa kukita. 28 Bubuno buli mulimo wa bantu ba kikanga kya baGersoni mu mulimo wa Numba za Kukulumana. Itamari mwana wa Haruni sankoga, eli musondelezia wa baGersoni mu mulimo wabo.
29 Ganza baMerari mu bikanga byabo nu mu numba za beisibo. 30 Ganza bamulume bansania beli na myaka makumi masatu nu kutinga aaba nu ku babo beli na myaka makumi matano, babo bakuvwa kukita mulimo mu Numba za Kukulumana. 31 Mulimo wabo gubakite mu Numba za Kukulumana guli kweka mbavu za Numba, nu mingolo zazo za kuzikanda, nu mango mazo, nu bikalilo byamo, 32 gamozi na mango ma mukolo wa mulungu, nu bikalilo byago, nu misumali, nu mizigi, nu bingo bintu bya mukolo, nu bikagi binsania byago. Kakizia muntu na muntu muzigo wage wa kweka. 33 Wono guli mulimo wa bantu ba kikanga kya Merari gabakukita mulimo wa Numba za Kukulumana ku ikakizio lya Itamari mwana wa Haruni sankoga.”
34 Musa, nu Haruni nu mitonge za mwino baganzile baKohati mu bikanga byabo, nu mu numba za beisibo. 35 Bamulume bansania babezaga na myaka makumi masatu nu kutinga aaba nu ku babo babezaga na myaka makumi matano, bavule kukita mulimo mu Numba za Kukulumana. 36 Baganzilwe mu bikanga byabo babezaga maganzo ma bantu tununu tubili, nkama mutubakamo nu makumi matano (22.750). 37 Mamano meli maganzo ma bansania ba kikanga kya baKohati, bakitaga mulimo mu Numba za Kukulumana; Musa nu Haruni babaganzile anga bwakakizizie Yehowa ku Musa.
38 Babo ba kikanga kya baGersoni baganzilwe mu bikanga byabo, nu mu numba za beisibo. 39 Bamulume bansania babezaga na myaka makumi masatu nu kutinga aaba nu ku babo babezaga na myaka makumi matano, bavule kukita mulimo mu Numba za Kukulumana. 40 Baganzilwe mu bikanga byabo babezaga bantu tununu tubili, nkama mutuba nu makumi masatu (2.630). 41 Mamano meli maganzo ma babo ba kikanga kya baGersoni, bakitaga mulimo mu Numba za Kukulumana. Musa nu Haruni babaganzile anga bwakakizizie Yehowa ku Musa.
42 Babo ba kikanga kya baMerari, baganzilwe mu bikanga byabo, nu mu numba za beisibo. 43 Bamulume bansania kutukila myaka makumi masatu nu kutinga aaba nu ku babo babezaga na myaka makumi matano, bavule kukita mulimo mu Numba za Kukulumana. 44 Baganzilwe mu bikanga byabo babezaga bantu tununu tusatu, nkama ibili (3.200). 45 Mamano meli maganzo ma babo ba kikanga kya baMerari bakitaga mulimo mu Numba za Kukulumana, Musa nu Haruni babaganzile, anga bwakakizizie Yehowa ku Musa.
46 Bubo u bwaganzile Musa, nu Haruni, nu mitonge za baIsraeli baLawi, bansania mu bikanga byabo nu mu numba za beisibo. 47 Bamulume bansania bakitaga mulimo mu Numba za Kukulumana, kulinga na babo babezaga na myaka makumi masatu nu kutinga aaba nu ku babo babezaga na myaka makumi matano, 48 baganzilwe bantu tununu kinana, nkama itano nu makumi kinana (8.580). 49 Mu ikakizio lya Yehowa ku Musa, muntu na muntu akasilwe mulimo wage, nu akakizizibwe muzigo wage wa kweka; bubo u bubaganzilwe anga bwakakizizie Yehowa ku Musa.