Kwengibwa kwa mwino wabo.
5
1 Yehowa atendile ku Musa bunee: 2 “Kakizia baIsraeli buno beimbie mu mwino muntu na muntu uli na bibali aba lusambo lwa kikoba lwa kwigilana, nu babo bakubasia bwina aba bikutuka mu mubili, nu muntu na muntu uli nsese ku kabamba ka kitumba. 3 Babapumbie, bamulume nu bakikulu bumozi. Bababasie kumbuga kwa mwino buno tababike nsese ku mwino gunkwikalaga munkatini mwabo.” 4 BaIsraeli bakitile bubo, beimbizie mu mwino babo beiya nsese, anga bwakakizizie Yehowa ku Musa. 5 Yehowa abwide Musa bunee: 6 “Tenda baIsraeli bunee: ‘Nkungu zakita wamulume aba mukikulu bwagi bunsania, anga lukita lwa bantu bakwagila Yehowa, nu muntu wozo eli na bwagi, 7 nti eigonga bwagi bwage bwakita, nu we nti asubya bukunza bugimagima bwa bwagi bwage nu kutalikila kyindi kimozi kya bitano gantata gabo, nu kubukasa wozo waagide. 8 Tondo ndi wozo muntu nteli na mubuto wa kuligwa ku kabamba ka bwagi, kuliga kwa bwagi kukukitwa ku Yehowa mu kuboko kwa sankoga, gamozi na kilimba kya mukoko kya bukulumania bwakitilwe wozo wagile. 9 Na lukaso na lukaso lwa kusakika lwa bikagi byasililila bya baIsraeli bibakulusia lwabusio lwa sankoga bibe byage, 10 nu bikagi byaswagibwa bya muntu na muntu bibe byage; kinsania kikukasana muntu na muntu ku sankoga nti kibe kyage.’”
Idindiko lya lugi.
11 Yehowa atendile lingo ku Musa bunee: 12 “Sambala ku baIsraeli bunee: Mukikulu wa muntu ndi agaluka nu kumwagila, 13 geiyombeka n'ungo wamulume, nu kitondo kikyo kyabiswa ku iba wage, nu iba nteizi bwagi bwakitile mukazi wage, kubuno takuli mulongeki wakusambala ku iba, nu tabakatilwe mu nkungu za kukita bwagi bubuno, 14 nu ndi lugi lwingila mu mutima w'iba nu akuzulila mukazi wage idimbia nu eli nsese, aba ndi akuzulila mukazi wage idimbia nu nteli nsese, 15 nti wozo iba alusie mukikulu wage ku sankoga. Ende ku sankoga na kayulo kage lingo, u byanzi bibili a bya bunga busoga nunse, nu ntakubule makiti ku bubo bunga, aba ntabike bulago gamozi nabo, kubuno buli bunga bwa kayulo ka lugi, kayulo kakukengelezia katati ka bwagi. 16 Sankoga amulusie ku kasenga ka tuyulo nu amwemanie lwabusio lwa Yehowa. 17 Nu sankoga atole mazi masililila mu idega ly'ibumba, nu atole mukungu mukeke guli gansi mu Numba za Hema, nu agubike mu mazi meli mu idega. 18 Kusila kwa kumwemania lwabusio lwa Yehowa, sankoga aktikye kitambala ku itoe lyage, nu kubika ku maboko mage bubo bunga bwa kayulo ka lugi, nu wenyene abe na mazi ma lubaba makulusia kiswililo ku kuboko kwage. 19 Nu sankoga amulumbizie nu kumubula bunee: ‘Ndi ungo muntu nteiyombekile nobe, nu ntwagalukile nu kuba nsese mu nkungu ziwabezaga n'iba, nti mazi ma lubaba mamano makulusia kiswililo tamakubabazie, 20 tondo ndi wagalukile nu kuba nsese mu nzila za kwiyombeka n'ungo muntu uteli iba wobe,’ 21 gaatende mamo moki, sankoga abike mukikulu ku kilumbilo kikulusia kiswililo, ‘nti Yehowa akukitile buno bakweinyu bakuswilile nu kukulagila mu nkungu zikubozia Yehowa bibelo byobe nu kutumbia nda zobe. 22 Mazi mamano makulusia kiswililo meingile mu nda zobe nu kutumbia nda nu kubozia bibelo byobe.’ Mukikulu atende bunee: ‘Nitabizia, bwabe bubo.’
23 Sankoga asanze biswililo bibino mu kigondi kya mukanda nu kumbusa abizimie na mazi mu idega. 24 Kumbusa anusie mukikulu mazi ma lubaba makulusia kiswililo, nu mamo mazi meingile mweli nu kulusia lubaba lukali. 25 Sankoga akate bunga bwa kayulo ka lugi buli ku kuboko kwa mukikulu, nu kubutengia lwabusio lwa Yehowa nu kubulusia ku kasenga ka kayulo. 26 Nu sankoga akate na kuboko kwage nkindi za bunga zakuka ku kuboko kumozi, nu azigisie ga kasenga. Kumbusa kwa kukita bubo, anusie mukikulu mamo mazi. 27 Ndi agide iba wage nu eikitile nsese, nti mu nkungu za kunusibwa mazi makulusia kiswililo makwingila mweli nu makumubabazia nunse, nda zage nti zatumba, nu bibelo byage byabole, nu we abe wakuswililwa munkatini mwa bakwabo. 28 Tondo ndi ntagide iba wage, nu nteikitile nsese nu enga lebelebe, nti atendelwe buno enge nunsania nu anabuta bana.”
29 Wono guli mulembe wa lugi nkungu za mukikulu eli n'iba tondo agaluka nu kwibigia, 30 aba nkungu za mutima wa lugi wabase ku muntu kubuno akengela mukazi wage agaluka. Sankoga amwemanie lwabusio lwa Yehowa, nu amukitile mulembe wono unsania. 31 Wamulume ntabe na bwagi, tondo mukikulu eeke bwagi bwage.