Milembe za bakasanwa ku Yehowa.
6
1 Yehowa abwide Musa bunee: 2 “Sambala ku baIsraeli bunee: ‘Ndi wamulume aba mukikulu atunda kulumbila idumbilo lya kwiyengia ku Yehowa anga muNaziri, 3 nti eidekanukie na maku aba mazi mansania ma biguma magaga, nu ntanue mazi ma ngigi masambikwa na maku. Ntanue mazi mansania ma biguma nu ntalie biguma bya mizabibu bibisi aba byakamibwa. 4 Bindi binsania bya kwidekanukia kuba muNaziri ntalie kimozi kyatuke ku mizabibu, aba mbuto zabyo aba kisugu kyabyo. 5 Bindi binsania bya kwidekanukia kwage, kakengo a Asige nzwili z'itoe lyage kuba ndazi. 6 Bindi binsania bya kwidekanukia kwage ku Yehowa ntakunde kitumba. 7 Ndi isi aba nina aba mubuto aba mubitu akua, nti nteikite kuba wa nsese ku kabamba kabo, kubuno kalolesio ka kwidekanukia kwage ku Kalaga keli ku itoe lyage. 8 Bindi binsania bya kwidekanukia kwage eli wasililila ku Yehowa. 9 Nu ndi muntu akua kitangalabesi mu ntungo nage, nu kubigia nzwili za muNaziri za kwikanda kwage, nti ku busi bwa kwengibwa kwage, u busi bwa mutubakamo kumbusa kwa kubigibwa, abege nzwili zage z'itoe. 10 Nu ku busi bwa kinana alusie nkulimba ibili aba byana bibili bya kilinga ku sankoga ku mwingilo wa mukolo wa Numba za Kukulumana. 11 Sankoga akase kitangi kibe kisansa kya bwagi, nu kya bibili kibe kisansa kya kugisibwa, kumukitila bukulumania kubuno agile ku kabamba ka kuba bwigi na kitumba. Nu busi bubo eiyengie lingo nzwili z'itoe lyage. 12 Nu we eikande ku Yehowa ku nkiko za bindi byatendile mu kulinga kwa kwikanda kwage, nu alusie kilimba kya mukoko kya mwaka umozi kibe kisansa kya katati ka bwagi. Bindi byatingile bya kilumbilo kyage tabyaganzwe, kubuno abigibwa ku kwikanda kwa mu bindi byako.
13 Wono guli mulembe wa muNaziri busi bwakuka bindi bya kilumbilo kyage. Avwe ku mwingilo wa kibanza kya Numba za Kukulumana, 14 nu gago akase ku Yehowa bisansa byage, u kisansa kya kugisibwa kya kilimba kya mukoko kya mwaka mutangi kiteli na kabalibango, nu kisansa kya bwagi kili ibuti lya mukoko lya mwaka umozi lili lisoga nunse, nu kisansa kya bubobelelo u kilimba kya mukoko musoga nunse, 15 gamozi na tuyulo twa bunga bwabyo nu twa kunubwa kwabyo, nu luzi lumozi lwa tumpampa tutagaga, u tumpampa twakitilwe na bunga busoga bwasambikwa na makiti, nu tumpampa tukeke anga mukuki twabongibwa makiti.
16 Sankoga abikasane ku Yehowa. Akase kisansa kya bwagi nu kisansa kya kugisibwa. 17 Nu akase luzi lwa tumpampa tutagaga, nu akase kisansa kya bubobelelo, u kilimba kya mukoko, ku Yehowa, gamozi na kayulo kakyo ka bunga nu kayulo kakyo ka kunubwa.
18 Nu kusila muNaziri abege nzwili z'itoe lyage kuko ku mwingilo wa mukolo wa Numba za Kukulumana, nu agisie nzwili zezo ziyengezie ku Yehowa mu keiya keli kunsi kwa kisansa kya bubobelelo.
19 Kusila kwa kubega nzwili zage insania, sankoga abike mu maboko mage kiganza kya kuboko kya mulume wa mukoko kyabilulwa nu kampampa kamozi katagaga nu kamozi kakeke katagaga, byatikibwa mu luzi. 20 Nu sankoga abitengietengie lwabusio lwa Yehowa kayulo ka kutengibwa. Byasililila nu bili bya sankoga gamozi na bukuba bwatengibwa nu kilumbu kyazanzulwa. Kusila muNaziri eli na bwangato bwa kunua mazi ma biguma.
21 Wono guli mulembe wa muNaziri walaga bisansa byage ku Yehowa anga buli kwidekanukia kwage, gamozi na bikagi bibyo byanavwama kukasana. Atunganana kukita kilumbilo kyage kyalumbide anga buli mulembe wa baNaziri.’”
Mponga za basankoga.
22 Yehowa abwide Musa bunee: 23 “Tenda ku Haruni nu bana bage bunee: ‘Bubuno u bumwakase baIsraeli mponga. Mubabule bunee:
24 “Yehowa amukase mponga, nu kumulanga.
25 Yehowa amusanizie kyengi kya kilungi kyage nu kumukwila kyombo.
26 Yehowa agalukye kilungi kyage kumuli nu kumubobelezia.”’
27 Bubo u bubabike izina lyane ku baIsraeli, nu Nne nabakase mponga.”