Nkaso za bemanizi ba baIsraeli.
7
1 Nkungu zasilile Musa kobaka numba za nsulu, azibongezie mwambo nu kuzengia, gamozi na bikagi byazo binsania. Lingo abongezie nu Kasenga ka Bisansa nu binsania byako, nu kubyengia. 2 Bemanizi ba baIsraeli, bangati ba bikanga bya beisibo, bakasenne nkaso; babano babezaga bemanizi ba bikanga, u babo babezaga matoe ma babo baganzilwe. 3 Bavwilide Yehowa na nkaso, u tuyanga mutuba twakukilwa gantata, nu balume ikumi nu babili ba ngombe: kayanga kamozi ku bemanizi babili nu nawe nawe na ngombe emozi ku bemanizi. Bavule nabyo lwabusio lwa Numba za Hema. 4 Yehowa abwide Musa bunee: 5 “Tola bibyo bili mu maboko mabo, buno bibe ku kukita mulimo wa Numba za Kukulumana. Nu wakase baLawi tuto tuyanga nu ngombe, ku muntu na muntu anga buli mulimo wage.”
6 Ububo Musa atolile tuyanga tuto nu ngombe, nu azikasile ku baLawi. 7 Akasile baGersoni tuyanga tubili nu ngombe inazi ku lukita lwa mulimo wabo. 8 Nu akasile baMerari tuyanga tunazi nu ngombe kinana ku lukita lwa mulimo wabo. Nu Itamari, mwana wa Haruni sankoga, abezaga musondelezia wa mulimo wabo. 9 Tondo Musa ntakasile kampa ku baKohati, kubuno mulimo wabo wabezaga kweka bintu byasililila ga bituli byabo, nu kubilanga.
10 Nu bemanizi bakasile ku kabamba ka kubika Kasenga ka Kayulo ku mulimo wasililila, mu busi bubyabongezibwe mwambo. Basondelezia bakasile nkaso zabo lwabusio lwa kasenga. 11 Yehowa abwide Musa bunee: “Bakasane nkaso zabo, na mwemanizi na mwemanizi mu bwage busi, ku kabamba ka kwengia Kasenga ka Bisansa.”
12-83 Na mwemanizi na mwemanizi akasile kayulo kage, u lupepe lwa feza lwa buzitu bwa shekeli lukama nu makumi masatu,a nu kibungulu kya kusandila kyakitwa na feza za buzitu bwa shekeli makumi mutubakamo,b anga buli shekeli za feza za Kiziki Kyasililila, nu bibyo bibili biyala na bunga busoga bwasambikwa na makiti buli kayulo ka bunga, nu lupagu lumozi lwa olo lwa buzitu bwa shekeli ikumi,c nu lwiyala na bulago, nu kyana kya mulume kya ngombe, kilimba kya mukoko nu kilimba kya mukoko kya mwaka umozi, u kayulo ka kugisibwa, nu kilimba kili kisansa kya bwagi, nu balume babili ba ngombe nu bilimba bitano bya mikoko nu bilimba bitano bya mpene nu bilimba bitano bya mikoko bya mwaka umozi, bibyo binsania bili bisansa bya bubobelelo. Na mwemanizi na mwemanizi akasile bisansa nu tuyulo bumozi, nawe nawe mu bwage busi.
Wozo wakasile busi butangi, u Nasoni mwana wa Aminadabu, mukota wa kikanga kya baYuda. Wozo wakasile busi bw'ibili, u Netaneli mwana wa Zuari, mukota wa kikanga kya baIsraeli. Wozo wakasile busi bw'isatu, u Eliabu mwana wa Heloni, mukota wa kikanga kya Zebuluni. Wozo wakasile busi bw'inazi, u Elisuri mwana wa Sedeuri, mukota wa kikanga kya baRubeni. Wozo wakasile busi bw'itano, u Selumieli mwana wa Zurisadai, mukota wa kikanga kya baSimeoni. Wozo wakasile busi bwa mutuba, u Eliasafu mwana wa Deueli, mukota wa kikanga kya baGadi. Wozo wakasile busi bwa mutubakamo, u Elisama mwana wa Amihudi, mukota wa kikanga kya baEfuraimu. Wozo wakasile busi bwa kinana, u Gamalieli mwana wa Pedasuri, mukota wa kikanga kya baManase. Wozo wakasile busi bwa mubula, u Abidani mwana wa Gideoni, mukota wa kikanga kya baBenjamina. Wozo wakasile busi bw'ikumi, u Ahiezeri mwana wa Amisadai, mukota wa kikanga kya baDani. Wozo wakasile busi bw'ikumu nu kimozi, u Pagieli mwana wa Okrani, mukota wa kikanga kya baAseri. Wozo wakasile busi bw'ikumi nu bibili, u Ahira mwana wa Enani, mukota wa kikanga kya baNafutali.
84-88 Bibino bili bisansa nu tuyulo twa bemanizi ba bikanga bya baIsraeli bibakasile kubika Kasenga ka Bisansa ku mulimo wasililila gakabongezibwe mwambo: mpepe ikumi nu ibili za feza, nu bibungulu ikumi nu bibili bya feza bya kusandila, nu ikumi nu ibili za olo. Lupepe na lupepe lwabezaga lwa buzitu bwa shekeli lukama nu makumi masatu, nu kibungulu na kibungulu kyabezaga kya buzitu bwa shekeli makumi mutubakamo. Buzitu bunsania bwa mpepe nu bibungulu bwabezaga shekeli tununu tubili nu nkama inazi (2.400),d ku buzitu bwa feza ku shekeli za Numba za Kukulumana. Buzitu bwa lupagu na lupagu lwa olo lwiyala na bulago bwabezaga shekeli ikumi, ku buzitu bwa shekeli za Numba za Kukulumana, nu buzitu bwa mpagu insania gamozi bwabezaga shekeli lukama nu makumi mabili.e Nyama insania zabezaga: byana bya mulume bya ngombe ikumi nu bibili, nu bilimba bya mikoko ikumi nu bibili, nu byana bya bilimba bya mikoko ikumi nu bibili ku tuyulo twa kugisibwa, gamozi na tuyulo twazo twa bunga bwa tuyulo twa bubobelelo, nu bilimba ikumi nu bibili bya bisansa bya bwagi; nu balume ba ngombe makumi mabili nu inazi, nu bilimba bya mikoko makumi mutuba, nu bilimba bya mpene makumi mutuba, nu byana bya bilimba bya mikoko bya mwaka umozi makumi mutuba ku tuyulo twa bubobelelo. Bibino binsania byabezaga nkaso nu tuyulo nu bisansa bya bakota ba baIsraeli buno babike Kasenga ka Bisansa ku mulimo wasililila nu kukabongia mwambo.
89 Nkungu zingide Musa mu Numba za Kukulumana buno atendane na Yehowa nu ungule ku iyuki lyatukile ku kisumbi kya mponga kili gantata ga Sanduku za bulongeki nu kili gasamba makerubi mabili; nu atendenne nage.