Kubangia matala ma olo.
8
1 Yehowa abwide Musa bunee: 2 “Tenda Haruni bunee: ‘Nkungu ziwagulumizie matala mamo mutubakamo, mabike buno masanie kyengi lwabusio lwa kyanikilo kyamo.’” 3 Haruni akitile bubo; amabikile buno masanie kyengi lwabusio lwa kyanikilo kyamo, anga bwamukakizizie Yehowa na moki ma Musa. 4 Kyanikilo kyakitilwe mu lukita luluno: bakitulile ku kyindi kimozi kya olo, kutukila kikalilo kyakyo aaba nu ku maluba makyo. Kyanikilo kyakitilwe mu kisusania kyalolesizie Yehowa ku Musa.
BaLawi babikwa ku mulimo wabo.
5 Yehowa abwide Musa bunee: 6 “Tola baLawi kubatikya munkatini mwa bango baIsraeli nu kubengia. 7 Kubengia, kita bubuno: Sandila mazi ma kubengia kubeli, nu babege na kakengo mubili unsania nu kusuga nsulu zabo, nu bubo u bubeiyengie. 8 Kusila batole kyana kya mulume kya ngombe gamozi na kayulo kakyo ka bunga busoga bwasambikwa na makiti, nu kumbusa kwakyo tola kingo kyana kya mulume kya ngombe kibe kisansa kya bwagi. 9 Vwa na baLawi lwabusio lwa Numba za Kukulamana nu kukundamania baIsraeli bansania. 10 Bika baLawi lwabusio lwa Yehowa, nu bana ba baIsraeli babike maboko mabo ku baLawi. 11 Nu Haruni akasane baLawi ku Yehowa anga kayulo ka kutengibwa, buno babe kayikayika kukita mulimo wa Yehowa. 12 Nu baLawi babike maboko mabo ga matoe ma byana bya balume ba ngombe, nu kukasana kimozi kibe kisansa kya bwagi ku Yehowa nu kingo kibe kisansa kya kugisibwa, buno baLawi bakululwe ku Yehowa. 13 Emania baLawi lwabusio lwa Haruni nu bana bage, nu kubakasana ku Yehowa anga kayulo ka kutengibwa ku Yehowa. 14 Bubo u buwalekanukye baLawi na bango baIsraeli, nu baLawi babe bane.
15 Kumbusa kwa kwengia baLawi nu kubakasana ku Yehowa anga kayulo ka kutengibwa,a beingile mu Numba za Kukulumana kulinga kukita mulimo wabo. 16 Babo beli baIsraeli bakasilwe nunsania kundi. Nabakatile mu kiziki kya nkula, u mwana wamulume wabutwa mutangi na bakikulu bansania ba baIsraeli, buno babe lebelebe bane. 17 Nkula na nkula, wamulume wa bantu nu mulume wa nyama, zili zane. Kindi kinalibwide nkula insania za mu kisi kya Misri nabalekanukizye buno babe bane lebelebe. 18 Nu natolile baLawi mu kiziki kya nkula insania zili bamulume za baIsraeli. 19 Nakasile ku Haruni nu bantu bage baLawi anga lukaso, munkatini mwa baIsraeli bansania, bakite mulimo wa Numba za Kukulumana ku kabamba ka baIsraeli bansania, nu kubakulula buno lukuo talwabase ku baIsraeli nkungu zibakunda Kiziki Kyasililila.”
20 Musa nu Haruni nu musanganano unsania wa baIsraeli bakitide baLawi anga bwakakizizie Yehowa ku Musa. 21 BaLawi beiyengezie nu basugile nsulu zabo. Kusila Haruni abakasenne ku Yehowa anga kayulo ka kutengibwa, nu abakitide bukulumania kubengia. 22 Kusila baLawi beingide kukita mulimo wabo mu Numba za Kukulumana lwabusio lwa Haruni nu bantu bage. BaLawi bakitile anga bwatendile Yehowa ku Musa.
23 Yehowa abwide Musa bunee: 24 “Kitondo kikino kyatunganana baLawi: kutukila myaka zabo makumi mabili nu itano beingile ku mulimo mu Numba za Kukulumana. 25 Nu kutukila myaka makumi matano bakasiga kukita mulimo, tabakakamba lingo. 26 Banamenya kukasia mibuto zabo mu mulimo, tondo tabanemanina lingo mulimo. Bubo u buli kitondo kya kukasa mulimo ku baLawi.”