Kisagulo ky'Isuluko kitangi mu kalula.
9
1 Yehowa atendile ku Musa mu Kalula ka Sinai mu mwezi mutangi wa mwaka w'ibili kumbusa kwa kutuka kwabo mu Misri. Amubwide bunee: 2 “BaIsraeli bakite Kisagulo ky'Isuluko mu nkungu zibakakizizibwe. 3 Ku nkungu zasombwedwe, u mwigolo lya kindi ky'ikumi nu binazi, mukite Kisagulo ky'Isuluko bulingilingi na makakizio makyo mansania nu milembe zakyo.” 4 Ububo Musa asambalide baIsraeli buno bakite Kisagulo ky'Isuluko, 5 nubo bakitile bubo mwigolo lya kindi ky'ikumi nu binazi kya mwezi mutangi, mu Kalula ka Sinai. BaIsraeli bakitile binsania anga bwakakizizie Yehowa ku Musa.
6 Tondo kwabezaga bantu bamozi batenga a ku kabamba ka kitumba kimozi, tabavwamine kulia ku Kisagulo ky'Isuluko ku kabamba kako. Ukinsa bavule ku Musa nu Haruni bubo busi, 7 nu babuzizie Musa bunee: “Twabede nsese ku kabamba ka kitumba, tondo kubuni tukukandwa buno tatukasane ku Yehowa nkaso zage gamozi na bango baIsraeli mu nkungu zatendilwe?”
8 Musa abakwide bunee: “Lindilazi gagano aaba nu namenya buni bwatende Yehowa ku kitondo kyeinyu.”
9 Nu Yehowa akakizizie Musa bunee: 10 “Bula baIsraeli bunee: ‘Kungwa muntu unsania munkatini mweinyu aba wa bibuti byeinu, ndi ta benga ku kabamba ka kitumba, aba ndi beli bulazi mu lugendo, nti balie ku Kisagulo ky'Isuluko kya Yehowa. 11 Tondo bakilie mwigolo lya kindi ky'ikumi nu binazi kya mwezi w'ibili. Balie kyana kya mukoko gamozi na tumpampa tutagaga nu bitogo bya lubaba anga nsyogo. 12 Tabasige bikeke kubyo kwika mu nindunindu, nu tabatande ikwa limozi lyakyo. Gabalie Kisagulo ky'Isuluko bakilie bulingilingi na milembe nu makakizio makyo mansania. 13 Tondo muntu uli wenga ku milembe nu nteli ku lugendo, ndi ntalie Kisagulo ky'Isuluko, nti apumbibwe bulazi na bantu bage, kubuno ntakasile Yehowa lukaso lwage mu nkungu zalagilwe. Muntu wozo wenyene eeke bwagi bwage.
14 Ndi munkatini mweinyu mukwikala mugeni watunda kulia ku Kisagulo ky'Isuluko kya Yehowa, nti akilie mu kuyanga milembe nu makakizio makyo. Mwabe na milembe nu makakizio bumozi ku bantu beinyu nu ku bageni.’”
Kimpa kya keiya ga Numba za Hema.
15 Busi bwimikilwe Numba za Hema, u Numba za Bulongeki, kimpa kyazikukide. Kutukila igolo aaba nu nindunindu kimpa kyasusanizie keiya. 16 Kyizizizie bubo bindi binsania, kimpa kyakukide numba mu musi, nu mu kindi kyasusanizie keiya. 17 Limbizi na limbizi kimpa kyazanzwidwe gantata ga Numba za Hema, baIsraeli balingile kwenda, nu ku kiziki kikalile kikyo kimpa, gago baIsraeli babikile ido lyabo. 18 Ku ikakizio lya Yehowa baIsraeli bendile, nu ku ikakizio lyage bakitile ido lyabo. Nkungu zikalile kimpa gantata ga Numba za Hema, beikalile mu ido lyabo. 19 Nkungu zeizizizie kimpa ga Numba za Hema bindi bingi baIsraeli banzile Yehowa nu tabendile. 20 Mango mambizi kimpa kikede bindi bikeke tugu, ta bingi, nu ku ikakizio lya Yehowa baIsraeli beikalile mu ido, nu ku ikakizio lya Yehowa bendile. 21 Nu mango mambizi kimpa kyasigede gantata ga Numba za Hema kutukila mwigolo aaba nu nindunindu, nu nkungu za kuzanzula kimpa, bendile. Ndi mu musi aba mu kindi, nkungu za kuzanzula kimpa, bendile. 22 Ndi kimpa kyasigede gantata ga Numba za Hema bindi bibili aba mwezi umozi aba mwaka umozi baIsraeli beikede mu ido lyabo, tondo kungwa kyazanzuka bendile. 23 Ku ikakizio lya Yehowa basigede mu ido lyabo, nu ku ikakizio lya Yehowa bendile, anga bwakakizizie Yehowa ku Musa.