Myonze za feza.
10
1 Yehowa abwide Musa bunee: 2 “Kita myonze ibili za feza; uzikite za mulimo wa kutula, nu kuzida kukundamania bantu ba mwino nu kubasindika mu lugendo lwabo. 3 Nkungu za kwida zezo myonze ibili, bansania ba mwino bakundamane ku mwingilo wa Numba za Kukulumana. 4 Tondo ndi bida monze umozi tugu, nti mitonge tugu, u basondelezia ba tununu twa baIsraeli, bakundamane lwabusio lwobe. 5 Nkungu zimwide monze ku musagu wa bita, nti bikanga bili ku lulenge lwa kukutukaga kisongo kya busi byalinge kwenda mu lugendo. 6 Nu limbizi lya mabili libida monze ku musagu wa bita, nti bikanga bili ku lulenge lwa kwidume byalinge lugendo lwabo. Kwida monze ku musagu wa bita kuli kalolesio ka kulinga lugendo. 7 Kukundamania musanganano nti bida monze, tondo ku lungo lukita. 8 Bana ba Haruni, u basankoga, u bide monze. Mulembe wono gube mulembe wa milyalya kumuli mu bibuti byeinu binsania bikuvwa.
9 Nkungu zimukenda kwitana bita na beiti bakumusungia mu kisi kyeinyu, nti mwide monze wa bita. Ndi mwakite bubo, nti Yehowa, Kalaga weinyu amukengele nu kumwonia na beiti beinyu. 10 Lingo, ku bindi byeinu bya mbogimbogi, u bindi bya bisagulo byakakizizibwe, nu bindi byeinu bya mbalo za myezi, nti mwatuta monze ku tuyulo twa kugisibwa nu twa bubobelelo, nu twabe kakengelezio kumuli ku Yehowa, Kalaga weinyu. Nili Yehowa, Kalaga weinyu.”
BaIsraeli batuka ku Sinai.
11 Ku kindi kya makumi mabili kya mwezi w'ibili wa mwaka w'ibili kimpa kyazanzukile kutuka gantata ga Numba za Bulongeki. 12 Nu baIsraeli balingile lugendo lwabo kutuka mu Kalula ka Sinai nu bendile ku ido n'ido aaba nu kimpa kikalile mu Kalula ka Parani. 13 Kwabezaga limbizi litangi lyabo lya kwenda ku makakizio ma Yehowa mu kanua ka Musa. 14 Nu mayombo ma bantu beikalile ku kibe kya Yuda mendile n'ibendela lyabo matangi mu mulindi. Musondelezia wabo u Nasoni, mwana wa Aminadabu. 15 Musondelezia w'iyombo lya baIsakari u Netaneli, mwana wa Zuari. 16 Nu Eliabu, mwana wa Heloni, u musondelezia w'iyombo lya babo ba kikanga kya baZebuluni.
17 Numba za Hema zagezizibwe kikagi na kikagi kyazo, nu baGersoni nu baMerari bazekile balingile kwenda lugendo. 18 Mayombo ma babo beikalile ku kibe kya Rubeni mendile n'ibendela lyabo kuyanga baGersoni nu baMerari. Elisuri, mwana wa Sedeuri, u musondelezia wamo. 19 Selumieli, mwana wa Zurisadai, u musondelezia wa baSimeoni. 20 Nu Eliasafu, mwana wa Deueli, u musondelezia w'iyombo lya baGadi. 21 Kumbusa kwabo baKohati balingile lugendo nu bekile bikagi byasililila bya mu Numba Zasililila. Numba za Hema zatunganana kusakikwa ndi tabevwa ku kiziki kyazo.
22 Kumbusa kwabo mayombo ma babo beikalile ku ibendela lya Efuraimu mendile n'ibendela lyabo. Elisama, mwana wa Amihudi, abezaga musondelezia wa baEfuraimu. 23 Nu Gamalieli, mwana wa Pedasuri, u musondelezia w'iyombo lya baManase. 24 Nu Abidani, mwana wa Gideoni, u musondelezia w'iyombo lya baBenjamina.
25 Kumbusa kwa bansania, anga balangi ba kuzinda, mayombo ma babo beikalaga ku kibe kya Dani mendile n'ibendela lyabo. Ahiezeri, mwana wa Amisadai, u musondelezia wabo. 26 Pagieli, mwana wa Okrani, u musondelezia w'iyombo lya baAseri. 27 Nu Ahira, mwana wa Enani, u musondelezia w'iyombo lya baNafutali. 28 Bubo u bwabezaga lukita lwa baIsraeli mu ngendo zabo, iyombo n'iyombo mu kiziki kyalyo, gabalingile kwenda.
29 Musa abwide Hobabu, mwana w'isibyala Reueli muMidiani bunee: “Tukulinga lugendo lwa kwenda ku kiziki kyatendile Yehowa bunee: ‘Nkamukasakyo.’ Vwa n'iswe nu twakukase mponga, kubuno Yehowa alagile bitondo bisoga ku baIsraeli.”
30 Amwakwide bunee: “Kilo, nsyende n'inyuwe, tondo nkusubya kwane ku kisi nu ku bantu bane.”
31 Tondo Musa amusegile bunee: “Ntutusige. Wizi biziki bya mu kalula bili bisoga bya kubika ido, nu wabe musondelezia weitu. 32 Ndi wavwa n'iswe, nti tukakukasa binsania bisoga byatukase Yehowa.”
33 Ububo batukile ku mwiduko wa Yehowa, nu bendile lugendo lwa bindi bisatu. Sanduku z'Idagano lya Yehowa zendaga lwabusio lwabo ku lugendo lulo, mu bibyo bindi bisatu, kubalondela biziki bya kumunwa. 34 Nu kikyo kimpa kya Yehowa kyasigede gantata gabo mu musi gabatukile mu ido. 35 Mu nkungu zendile Sanduku, Musa abwide bunee: “Ee Yehowa, zanzuka! Nu beiti bobe babalanganibwe, nu babo bakusomba batine lwabusio lwobe.”
36 Mu nkungu zizemanine kubomuzia abwide bunee: “Ee Yehowa, subya ku tununu twa baIsraeli.”