Keiya ka Kalaga mu kiziki kyamanagwa Tabera.
11
1 Nu bantu bakitile manungunungu ku kabamba ka bitondo byabo bibibu nu Yehowa amongule. Nkungu zungule Yehowa, ongilwe bubibu, nu keiya ka Yehowa kagisizie munkatini mwabo, nu kazikizye babo babezaga bwigi na myaga z'ido. 2 Galilile bantu ku Musa, asegile ku Yehowa nu keiya kaziminne. 3 Ububo kiziki kikyo kyamaninwe Tabera, kubuno keiya ka Yehowa kabangile munkatini mwabo. Musa asombola bakulu makumi mutubakamo.
4 Bageni babezaga munkatini mwa baIsraeli bakatilwe na nkasa za mango malia, nu baIsraeli bobenyene balingile kulila. Batendile bunee: “Songo tuli na misuna za kulia! 5 Tukukengela byakwidu bitwalide bulia mu Misri, nu bitogo nu biguma nu matungulu masoga. 6 Tondo kano kaluma mitima zeitu zakama, kubuno tatuli na kingo kimozi kya kulia, tugu mana mamano.”
7 Mana mabezaga makeke anga mbuto za bunyonyo, nu idangi lyamo lyabezaga anga lya kibwagabwaga. 8 Bantu batimbiletimbile kumasongya, nu kumagoga na makozi ma kugoga aba kumatuta mu bilunga. Bamayikile mu nyungu aba kumokya anga tumpampa tukeke. 9 Nu nkungu za kukoloka kwamo zabezaga nkungu zalokile bususuli mu kindi.
10 Musa ongule bantu gabalilaga mu bikanga byabo, na muntu na muntu ga mwingilo wa numba zage za hema. Yehowa ongilwe bukali nunse, nu Musa abede na kabebe nunse. 11 Abuzizie Yehowa bunee: “Kubuni wabasizie kabebe kakano ku mukiti wobe? Kubuni ntuli na mponga kundi? Kubuni wabikile kundi muzigo wa bantu babano bansania? 12 Ndi nne nnenyene nekizie iyimi lya bantu babano bansania? Ndi nababutile? Kubuni wambula buno nabeeke ku kisi kiwalagile beisibo n'idagano lyobe, kubeeka ko ku bukuba bwane anga bukulela mulezi mwana wage mukeke? 13 Kuni kunamone misuna zakuka kulisia bantu babano bansania? Bakulilaga kundi bunee: ‘Tukase misuna za kulia.’ 14 Nne nnenyene nsikuvwama kweka bantu babano bansania, kubuno guli muzigo muzitu kuntinga. 15 Ndi wankitila bubuno, kasi nakusega kunita, ndi namona ku mponga zobe, nu ntunsige kuba na kabebe.”
16 Yehowa akwide Musa bunee: “Nkundamanizie bakulu makumi mutubakamo ba baIsraeli, u bantu bawizi beli basondelezia nu bakulu munkatini mwa bantu babo. Ubakundamanie ku Numba za Kukulumana buno bemane gamozi nobe lwabusio lwazo. 17 Nu Nne tondo, nagele kutendana nobe gago, nu nabalanganie Muuza Wasililila guli kuguli kubeli. Nu babo bakukasie kweka buzitu bwa bantu buno ntubeeke uwenyene tugu. 18 Kakizia bantu buno beiyengie, kubuno walubi mwalie misuna. Yehowa amungule gamwalilile bunee: ‘Songo tuli na misuna za kulia! Bwabezaga busoga kutuli mu Misri kutinga gano mu kalula!’ Yehowa amukase misuna nu mwazilie. 19 Tamwazilie ku kindi kimozi tugu, aba bindi bibili, aba bitano aba ikumi aba makumi mabili, 20 tondo mwazilie ku mwezi umozi mugimagima, aaba nu misuna zezo zikamubasa mu myembe zeinyu nu mwazisombe nunse, kubuno mwasombile Yehowa uli munkatini mweinyu, nu mwalilile lwabusio lwage bunee: ‘Kubuni kutwatukile mu Misri?’”
21 Tondo Musa akwide bunee: “Nili gano munkatini mwa bamulume tununu nkama mutuba (600.000) bakwenda na magulu, nu uwe ukutenda bunee: ‘Nkubakasa misuna za kulia ku mwezi umozi mugimagima!’ 22 Ndi kunaba misuna zakuka, ndi bibombo binsania bya ngombe nu lusumba lunsania lwa mikoko zaseswe ku kabamba kabo? Ndi kunaba byena byakuka, ndi byena binsania byili mu kitatenge byakatwe ku kabamba kabo?”
23 Yehowa akwide Musa bunee: “Ndi kuboko kwa Yehowa kuli kwigi? Kano kaluma wamone bubo bunatenda ndi buli bulili aba ndi buli buza, nu ndi bwazindilile kuguli aba kilo.”
24 Musa atukile nu abwide bantu bitondo byatendile Yehowa. Amanine bakulu makumi mutubakamo ku bakundamania bemane kutimba Numba za Hema. 25 Nu Yehowa agelile mu kimpa nu atendenne nage. Abalanganizie Muuza Wasililila wabezaga ku Musa ku babo bakulu makumi mutubakamo. Gabede Muuza wikala kubo balingile kulengania, tondo tabakitile bubo nkungu ndazi.
26 Tondo bamulume babili basigede mu ido. Meina mabo u Eldadi nu Medadi. Babezaga basanzilwe na bango bakulu, tondo tabendile ku Numba za Hema. Tondo Muuza eikalaga kubo gamozi na bango, nu balenganizie mu ido. 27 Musikila umozi eitumine lubilo kubula Musa bunee: “Eldadi nu Medadi bakulengania mu ido.” 28 Yosua mwana wa Nuni, u mukiti wa Musa kutukila busikila bwage, abwide bunee: “Musa, mukota wane, bananie.”
29 Musa akwide bunee: “Ndi uli na lugi ku kabamba kane? Ninatunda bantu bansania ba Yehowa babe balengania. Songo Yehowa anababikile Muuza wage!” 30 Nu Musa nu bakulu ba baIsraeli basubizie ku ido.
31 Kusila lumpumpu lwa Yehowa lwapupile nu lwalusizie tuzoni tukumanwa nkwale. Lumpumpu lwazigezizie buno zalengile bwigi na mabusu mabili kutukila gansi, nu zalengile ku ndenge insania z'ido ku bulazi bwakuka anga bwavwama kwenda na magulu muntu mu musi umozi. 32 Bantu batukile mu ido nu bakundamanizie nkwale busi bubo bunsania, nu kindi nu busi bw'ibili bunsania. Wozo wakundamanizie kakeke kutinga bango akundamanizie nkwale zakuka kwizazia mipala a mambizi ikumi. Bazibalanganizie gansi ku ntungo insania z'ido. 33 Nkungu zikile misuna mu meinyo mabo, lwabusio lwa kuzitakuna, bongoa bwa Yehowa bwabede bukali ku bantu, nu abalibwide na lusambo lukali. 34 Ububo izina lya kiziki kikyo lyamaninwe Kiburoti-Hatava, kubuno gago bayikile babo batundile lingo idia.
35 Kutuka Kiburoti-Hatava bantu bendile ku Hazeroti. Beikede ko.