Kwizuzuma kwa Miriamu nu Haruni ku Musa.
12
1 Miriamu nu Haruni bakitile manungunungu ku Musa ku kabamba ka mukikulu muKushi waasongile. 2 Babuzizie bunee: “Ndi Yehowa atendile na Musa tugu? Ntatendile n'iswe lingo?” Yehowa ungule moki mabatendile. 3 Nu wono Musa abezaga muntu wabota nunse. Abota kutinga bantu bansania ba ga kisi. 4 Kitangalabesi Yehowa atendile ku Musa, Haruni nu Miriamu bunee: “Vwazi, inyuwe basatu, ku Numba za Kukulumana.” Ukinsa babo basatu bendile ko. 5 Nu Yehowa agelile mu iyango lya kimpa nu emanine ga mwingilo wa Numba za Hema za Kukulumana nu amanine Haruni nu Miriamu. Gabakundile, 6 ababwide bunee: “Ungwililazi kano kaluma moki mane: Kungwa kuli mulengania wa Yehowa munkatini mweinyu, Nne Yehowa nidolesie kweli mu kalolesio, nu nkutendana nage mu ndozi. 7 Tondo tabuli bubo na mukiti wane Musa. We eli mukatizia mu numba zane insania, 8 nu nkutendana nage meiso ku meiso. Nkutenda kweli bwasibwasi; nsikutendana nage mu misumo. Nu we akumona ku lukita lwa Yehowa. Ku kabamba kako, kubuni tamwakule boba kwizuzuma ku Musa mukiti wane?”
9 Bongoa bwa Yehowa bwabede bukali kubeli, nu abasigile. 10 Nkungu zatukile kimpa ku Numba za Hema, Miriamu abede na bibali mu mubili wage unsania. Haruni agalukile kulola ku Miriamu, nu amonine buno abezaga mwiya bibali. 11 Nu atendile ku Musa bunee: “Ee mukota wane, ndi bwakutananizia, ntubike kwage bwagi bubo butwakitile mu bukongolo bweitu. 12 Nakusega buno ntumusige anga mwana wakua mu nkungu za kubutwa, nu nkindi za misuna zage zalibwa nkungu zatuka mu nda za nina.”
13 Ukinsa Musa alilile ku Yehowa bunee: “Ee Kalaga, nakusega kumwonia.”
14 Yehowa amwakwide bunee: “Songo isi amuswilaga matazi ku meiso, songo ntanamonine nsoni kubo bindi mutubakamo? Atukibwe mu ido nu kukandilwa nzila za kwingila mulyo bindi mutubakamo. Kungwa byasila, nti aningila mu ido lingo.” 15 Ububo Miriamu atukizibwe mu ido nu tabazigile buno eingile mulyo bindi mutubakamo, nu bantu tabendile aaba nu gaasubizibwe mu ido. 16 Kumbusa bantu bendile kutuka ku Hazeloti, nu beiyombekile ido mu Kalula ka Parani.