Batitiki basingwa ku Kanana.
13
1 Yehowa abwide Musa bunee: 2 “Singa bantu bamozi kwenda kutitika kisi kya Kanana kinkukasa ku baIsraeli. Ku kikanga na kikanga kya beisibo, singa muntu umozi wa bakulu babo.” 3 Ku ikakizio lya Yehowa, Musa abasingile kutukila Kalula ka Parani. Babo basingilwe babezaga bakulu ba baIsraeli. 4 Meina mabo mabezaga mamano: Ku kikanga kya Rubeni, Samua mwana wa Zakuli. 5 Ku kikanga kya Simeoni, Safati mwana wa Hori. 6 Ku kikanga kya Yuda, Kalebu mwana wa Yefune. 7 Ku kikanga kya Isakari, Igali mwana wa Yosefu. 8 Ku kikanga kya Efuraimu, Hoshea mwana wa Nuni. 9 Ku kikanga kya Benjamina, Palti mwana wa Rafu. 10 Ku kikanga kya Zebuluni, Gadieli mwana wa Sodi. 11 Ku kikanga kya Yosefu, aba Manase, Gadi mwana wa Susi. 12 Ku kikanga kya Dani, Amieli mwana wa Gemali. 13 Ku kikanga kya Aseri, Seturi mwana wa Mikaeli. 14 Ku kikanga kya Nafutali, Nabi mwana wa Wofusi. 15 Ku kikanga kya Gadi, Geueli, mwana wa Maki.
16 Mamano meli meina ma bamulume basingile Musa kutambula kisi. Musa amanine Hoshea mwana wa Nuni Yosua.a Yosua, bwisulilwa buli Mukota eli lonio. 17 Gaabasingile buno batambule kisi kya Kanana, Musa abakakizizie bunee: “Bakamazi mu nzila zikwenda ku Negevi, nu kubakama ku miduko. 18 Mulole kisi nu lukita lwakyo, nu lolazi ku bantu beliko, ndi beli na magala aba ndi beli basosu, ndi beli beingi aba ndi ta beingi. 19 Nu kisi kibakwikala mukyo kili kya lukita lukizi, ndi kisoga aba kibi. Lolazi ku lukita lwa miino zabo, ndi zili na mikolo aba ndi ta zili na mikolo. 20 Nu kisi kili kya lukita lukizi, ndi kyanaga aba ndi takyanaga. Nu lolazi ndi kuli miti mukyo aba kilo. Mube na bupuka, kusubya na biguma bimozi bya kisi.” Zabezaga nkungu za kwela kwa biguma bitangi bya mizabibu.
21 Ukinsa babakamine nu kutambula kisi kulinga mu Kalula ka Zini aaba nu ku Rehobu bwigi na mwingilo wa Hamati. 22 Babakamine kunsania mu Negevi, u lulenge lwa kwidume lwa kisi, nu bavule ku mwino wa Hebroni, mumo mwikalaga Ahimani, Sesayi nu Talmayi, bana ba Anaki. Bobakile mwino wa Hebroni myaka mutubakamo lwabusio lwa kobakwa kwa mwino wa Zoani mu Misri. 23 Gabavule ku kibitabita kyamanwa Eskoli, basesile lutabi lumozi lwabezaga na kibombo kimozi kya biguma bya mizabibu, babili bekile lutabi lulo ga mungolo gabasamba, gamozi na bingo biguma u komamanga nu tini. 24 Kiziki kyasesedwe lutabi lulo kyamaninwe Eskoli ku kabamba ka kikyo kibombo kya muzabibu kibasesile. 25 Basubizie kumbusa kwa kutambula kisi ku kuzinda kwa bindi makumi manazi.
26 Basubizie ku Musa nu Haruni nu ku bantu bansania ba baIsraeli babezaga ku Kadesi mu Kalula ka Parani. Babasambalide musagu wa kisi nu kubalolesia biguma bya kisi bibavule nabyo. 27 Basolede Musa bunee: “Twabasile mu kisi kiwatusingileko, nu lebelebe kiyala na mabele nu buuki! Bibino bili biguma byakyo. 28 Tondo bantu bakyo beli babibu, nu miino zabo zili minene nu zili na mikolo minene. Lingo twamonine ku baAnaki gago. 29 BaAmaleki bakwikalaga mu Negevi; baHiti nu baYebusi nu baAmori bakwikalaga mu kibe kya miduko, nu baKanana bakwikalaga mu kibe kili bwigi na kitatenge nu bwigi na luuzi lwa Yordani.”
30 Nu Kalebu abibizie bantu lwabusio lwa Musa nu atendile bunee: “Tubakame kano kaluma nu kukata kisi, kubuno tunavwama kukikinda.”
31 Tondo bamulume babakamine gamozi nage batendile bunee: “Tatunavwama kwitana bita na bantu babo kubuno beli na magala kututinga.” 32 Balumbizie musagu mubi wa kisi kibatambwide munkatini mwa baIsraeli. Bababwide bunee: “Kisi kitwatambula kili kisi kikulia bantu bakyo. Bantu bansania batwamonine ko beli bantu balazi nunse. 33 Twamonine ko bantu balazi nunse, u baNefili kwatukile baAnaki, nu iswe twakengede buno twabezaga mande tugu, nu babo bantu bakengede bubo lingo.”