BaIsraeli banana Yehowa nu kukita manungunungu.
14
1 Kindi kikyo musanganano unsania wa baIsraeli balalukile moki mabo nu kulila nunse. 2 BaIsraeli bansania bakitide Musa nu Haruni manungunungu, nu bababwide bunee: “Songo twakule mu Misri, songo busoga kutuli. Aba songo twakule mu kakano kalula, songo mbogimbogi kutuli! 3 Kubuni Yehowa atusondelezia ku kino kisi, buno tukue na myene za nganda? Bakikulu beitu nu bana beitu banyagwe nu kuba ba babo bantu! Tabunaba busoga kutinga buno tunasubanya ku Misri?” 4 Batendenne bwabo bwabo bunee: “Tusombolazi ungo mukota nu kusubya ku Misri.” 5 Musa nu Haruni bagwede bukukama lwabusio lwa musanganano wa baIsraeli bansania. 6 Yosua mwana wa Nuni nu Kalebu mwana wa Yefune babezaga munkatini mwa batambuzi ba kisi, batile nsulu zabo; 7 nu batendile ku musanganano unsania wa baIsraeli bunee: “Kisi kitwatingile mukyo kukitambula kili kisoga nunse. 8 Ndi Yehowa atananizibwa n'iswe, nti atwingizie mu kino kisi kiyala na mabele nu buuki, nu atukase kyo. 9 Tondo tamugune Yehowa. Nu lingo tamukue bantu ba kisi boba, kubuno twabakinde nunsania. Tabeli na mulangi, tondo Yehowa eli n'iswe. Tamubakue boba aba kakeke.”
10 Bansania ba musanganano beitendenne buno babeite na kubeisa makozi. Nu kitangalabesi lutanuno lwa Yehowa lwamonekile ko ku bantu bansania ba musanganano wa baIsraeli ga Numba za Kukulumana. 11 Nu Yehowa abwide Musa bunee: “Aaba ku nkungu nkizi babano bantu bambenge? Nu tabankatizie aaba nu nkungu nkizi? Nu nakitile tulolesio tutuno tunsania munkatini mwabo tondo tabankatizia? 12 Nabeite na lusambo lukali nu kubazikya, nu nakukite ube kilongo kinene kubatinga nu kya magala manene kubatinga.”
13 Musa akwide Yehowa bunee: “Tondo baMisri bongwe wozo musagu, buno na bwangato bwobe uwe walusizie bantu bobe kutuka munkatini mwabo. 14 Nu baMisri basolele bantu ba kisi kikino. Ee, babo bantu bongule kalazi buno uwe, ee Yehowa, uli gamozi na bantu babano, nu, ee Yehowa, use ukumoneka ko meiso ku meiso kubuno kimpa kyobe kikusigala nabo, nu buno ukubasondelezia mu iyango lya kimpa mu musi nu mu iyango lya keiya mu kindi. 15 Ndi wita bantu babano bansania mu nkungu emozi, nti bilongo byongule musagu mutangi wono bikatenda bunee: 16 ‘Yehowa ntavwamine kwingizia bantu babano mu kisi kyabalagile n'idagano lyage. Ububo abeitile mu kalula.’ 17 Kano kaluma nakusega kutulolesia bwangato bwobe bunene anga buwatendile bunee: 18 ‘Yehowa eli na nkiki ku kitondo kya bongoa, eiyala na kyombo nu akusigilila bantu bwagi bwabo nu lunano lwabo. Tondo ntakusigilila bagi geteli lusungio, tondo akwikya bwagi bwa beisibo ku bana aaba nu ku kibuti kya bisatu aba kya binazi.’ 19 Ku kyombo kyobe kinene, sigilila bantu babano bwagi bwabo, anga buwabasigilide mango mambizi kutukila ku Misri aaba nu kano kaluma.”
20 Yehowa amwakwide bunee: “Nabasigilide, anga buwasegile. 21 Tondo anga bunkulamaga lebelebe, nu anga bukwiyala kisi na lutanuno lwa Yehowa; 22 ta wampa wa babo bamulume bamonine ku lutanuno lwane nu bamonine ku migeleko zane zinakitile mu Misri nu mu kalula, nu bannanine nu kundindika mambizi mamano ikumi, 23 tabamone ku kisi kinalagile beisibo n'idagano lyane, ta umozi ukakimona ko. Ku babo bansombile ta umozi ukakimona. 24 Tondo Kalebu abezaga na mutima wa lungo lukita nu anyangile na mutima wage unsania, nu namwingizie mu kikyo kisi kyendile mukyo, nu babo ba kibuti kyage bakakiyana. 25 BaAmaleki nu baKanana bakwikalaga mu bibitabita; ukinsa lubi nti galukazi, nu endazi mu kalula mu nzila zikwenda ku Kitatenge Kyakisimana.”
26 Nu Yehowa abwide Musa nu Haruni bunee: 27 “Musanganano wono wa bantu babi bankitile manungunungu aaba nu ku nkungu nkizi? Nungule ku manungunungu nu kwizuzuma kwabo kundi. 28 Ububo ubatende bunee: ‘Yehowa akutenda bunee: “Lebelebe nkulamaga, nu ku kabamba kako nkamukitila bitondo bibyo binungule mukutenda. 29 Bitumba byeinyu bikagoa mu kano kalula, u bitumba bya bansania baganzilwe mu nkungu za kumuganza babezaga na myaka makumi mabili nu kutinga nu bankitide manungunungu. 30 Lebelebe takuli umozi wingile mu kisi kinalumbide na kuboko kwane kwalambibwa buno kisi kibe kyeinyu nunse, tugu Kalebu mwana wa Yefune nu Yosua mwana wa Nuni beingile. 31 Tondo bana beinyu bamwatendile banyagwe, nababasie mu kisi kimwasombile. 32 Tondo inyuwe, bitumba byeinyu bikagoa mu kalula. 33 Bana beinyu babe balangi ba mikoko gano mu kalula ku nkiko za myaka makumi manazi. Bakababazibwa ku kabamba ka kutakatizia kweinyu, aaba nu bitumba byeinyu bizinda byayikwe mu kalula. 34 Ku iganzo lya bindi bibyo bimwatambwide kisi, u bindi makumi manazi, mukasungibwa na mbabazio mwaka umozi ku kindi kimozi. Ku nkiko za myaka makumi manazi mukamenya buno nabede mwiti weinyu ku kabamba ka bwagi bweinyu. 35 Nne Yehowa natendile, nu lebelebe nakite anga bunatenda ku musanganano unsania wa bantu babano babi bakundamanine na nsake kundi, nu bakue mu kalula, nu kuzinda kwa kalamo kabo kwabe gano.”’”
36 Bantu basingile Musa kutambula kisi nu basubizie na musagu mubi, nu kusindika musanganano unsania kukita manungunungu kweli gabasambalide musagu mubi wa kisi, 37 babo bantu batendile wozo musagu mubi, bagusizibwe nu bakule na lusambo lukali lwasingile Yehowa kubeli. 38 Ku bansania batambwide kisi, Yosua mwana wa Nuni, nu Kalebu mwana wa Yefune, tugu balamine.
39 Musa asolede baIsraeli bitondo bibino binsania. Nkungu zezo bantu balilile nunse. 40 Bayukile lukesikesi, nu babakamine ku miduko za kisi, batendile bunee: “Twagile, tondo tukubakama ku kiziki kyatulagile Yehowa.”
41 Tondo Musa ababwide bunee: “Kubuni kumukuguna ikakizio lya Yehowa? Tamunakinda! 42 Tamubakame kubuno Yehowa nteli n'inyu! Mwakindwe na beiti beinyu. 43 Kubuno baAmaleki nu baKanana beli lwabusio lweinyu. Kubuno mwagalukile nu tamwayangile Yehowa, ntabe gamozi n'inyu nu mwakue na myene za nganda.”