Ingo milembe za bisansa.
15
1 Yehowa abwide Musa bunee: 2 “Tenda ku baIsraeli bunee: ‘Kumbusa kwa kwingila mu kisi kinkumukasa kibe kyeinyu, 3 kungwa mwakasana bisansa nu tuyulo twakitwa mu keiya ku Yehowa, ndi bili bya bibombo bya ngombe aba lusumba lwa mikoko, nu twabe ku Yehowa nsunu nsoga za kumutananizia, nu ndi bili bya kilumbilo kyeinyu aba bya ntundo zeinyu aba bya bindi bya mbogimbogi zeinyu, ndi bili bisansa aba tuyulo twa kugisibwa, 4 nti akase ku Yehowa gamozi na kisansa, kango kayulo ka byanzi bibili a bya bunga busoga na makiti makuka ku idega limozi.b 5 Gamozi na kyana kya mukoko kinsania kili kayulo ka kugisibwa aba ndi kili kisansa, nti akase gamozi nakyo, kayulo ka kunubwa ka mazi ma biguma makuka ku idega limozi. 6 Gamozi na kilimba kya mukoko kili kayulo aba kisansa, akase kayulo ka kyanzi kinene c kya bunga busoga bwasambikwa na makiti makuka ku idega limozi,d 7 nu mazi ma biguma magaga makuka ku idega limozi meli kayulo ka kunubwa. Kasanazi kayulo kako buno kabe nsunu nsoga ku Yehowa.
8 Nkungu zibalongeka mulume wa ngombe kuba kayulo ka kugisibwa aba kisansa, ndi ku kabamba ka kilumbilo aba ndi ku kabamba ka kayulo ka bubobelelo aba kugomania na Yehowa, 9 kasanazi gamozi na mulume wa ngombe kango kayulo ka kyanzi kinene e kya bunga busoga bwasambikwa na makiti makuka ku idega.f 10 Lingo, gamozi na kako kayulo, kasanazi mazi ma biguma magaga makuka ku idega. Kabe kayulo kakaswa ku Yehowa mu keiya, u nsunu nsoga kweli. 11 Mwakite bubo ku balume ba ngombe nu bilimba bya mikoko nu ku byana bya mpene nu mikoko, limbizi na limbizi lya kubikasana. 12 Nu mukite bubo ku binsania bimwalongeka kukasana ku Yehowa; ndi maganzo mabyo meli mengi, nti tuyulo twakasanwa nabyo twabe twingi.
13 Bansania babutwa mu bibuti byeinu bakite bitondo bibino mu nzila zeno gabakasane ku Yehowa kayulo ka kugisibwa mu keiya, u nsunu nsoga zikutananizia Yehowa. 14 Mu bindi bikuvwa ku kibuti na kibuti kyeinyu, nu mugeni wikala munkatini mwa bibuti byeinu aba unsania uli munkatini mweinyu, ndi atunda kukasana ku Yehowa kayulo kakitwa mu keiya kabe nsunu nsoga za kutananizia Yehowa, nti atunganana kukita kayulo anga bumukukakitaga. 15 Mu musanganano weinyu, mwabe ikakizio limozi kumuli nu ku bageni beli munkatini mweinyu. Ikakizio lilino lili lya milyalya, ku bibuti bikuvwa, nu lili bunee: Inyuwe nu bageni muli bumozi lwabusio lwa Yehowa. 16 Makakizio meinyu nu milembe zeinyu zili bumozi, ku bantu beinyu bansania nu ku bageni bakwikala munkatini mweinyu.’”
17 Yehowa abwide Musa bunee: 18 “Tenda ku baIsraeli bunee: ‘Kungwa mwabasa ku kisi kinamweke kukyo 19 nu mwalia ku idia lya kikyo kisi, nti mukasane ku Yehowa nkindi zalyo, zibe kayulo ka Yehowa. 20 Gamwayike tumpampa, kasanazi ku Yehowa kampampa katangi kakitwa na bunga bwa matubulo matangi. Kako kampampa katangi keli kayulo kakutuka ku kiziki kya kususula mbuto zeinyu. 21 Mu bibuti byeinu bikuvwa mukasane ku Yehowa kayulo kakano ka bunga bwa matubulo matangi.
22 Nu ndi bansania tabakokomezie makakizio mansania makasile Yehowa ku Musa, 23 u makakizio makakizizie Yehowa na Musa, meli ma kukitwa kutukila busi bubo bwatendile Yehowa, aaba nu ku bibuti byeinu binsania bya bindi bikuvwa, 24 ndi mwaga mu ikakizio limozi geteli isela aba geteli kulisongolola, nti kilongo kinsania kikakasana kisansa kya kyana kya ngombe kili mulume, kibe kisansa kya kugisibwa, nu bakikase gamozi na kayulo kakyo ka bunga busoga nu kayulo ka mazi ma biguma magaga, u nsunu nsoga za kutananizia Yehowa, nu lingo kisansa kya bwagi kili kilimba kya mpene. 25 Anga bubo, sankoga abakitile bukulumania ku kilongo kinsania kya baIsraeli, nu basigililwe, kubuno bakitile bwagi geteli kusongolola nu kubulongeka, nu bakasile ku Yehowa kisansa kya kugisibwa nu kisansa kya bwagi ku kabamba ka bwagi bubakitile. 26 Kilongo kinsania, u musanganano unsania wa baIsraeli nu bageni bakwikalaga munkatini mwabo, kyasigililwe bwagi, kubuno bantu bansania bakitile bubo bwagi geteli kubusongolola.
27 Tondo ndi kuli muntu umozi tugu ukukita bwagi geteli kubusongolola, nti avwe na kisansa kyage ky'ibuti lya mpene lili lya mwaka umozi, u kisansa kyage kya bwagi. 28 Sankoga amukitile bukulumania na Yehowa ku kabamba ka wozo muntu umozi wagile geteli bumenyinino. Kungwa bukulumania bwamukitilwa, nti asigililwe bwagi bwakitile. 29 Mulembe wono guli ku muntu na muntu waga geteli bumenyinino, ndi abutwa mu bibuti beinyu aba ndi eli mugeni.
30 Tondo muntu unsania waga n'isela, g nti alinga Yehowa, nu nti wozo muntu alekanukibwa na bantu bage, ndi eli wabutwa mu kibuti kyeinyu aba ndi eli mugeni. 31 Wozo muntu abikwe bulazi na bantu bage, kubuno abengile Yehowa nu idagi lyage. Bwagi bwage bwasigala gantata gage, ntasigililwe nunsania.’”
Muntu wabenga Sabato.
32 Gabezaga baIsraeli mu kalula, basangile muntu umozi akukundamania misali busi bwabo bwa kumunwa. 33 Babo bamusangile akukundamania misali bavule nage ku Musa nu Haruni nu ku musanganano unsania. 34 Bamukandile kubuno tabamenyine buni bubakite nage. 35 Nu Yehowa abwide Musa bunee: “Lebelebe wozo muntu akue. Musanganano unsania wamwisile makozi ku isula ly'ido.” 36 Ububo musanganano unsania wamwekile ku isula ly'ido nu wamwisile makozi. Anukule mu ikakizio lya Yehowa, lyakakizizie Musa.
37 Yehowa abwide Musa bunee: 38 “Kakizia baIsraeli bunee: Mu bibuti byeinu bikuvwa, kitazi makuku ma misinge ku miimbo za nsulu zeinyu. Kandazi makuku mamo na muzigi w'idangi ly'igulu. 39 Mwaswike makuku mamo ku nsulu zeinyu buno mwamamone nu kukengela makakizio mansania ma Yehowa. Anga bubo munavwama kwanza makakizio mansania nu kutagila Yehowa mu kukita ntundo zeinyu za mitima nu za meiso. 40 Gamwamamone, mukakengelezibwa kwanza makakizio mane mansania nu mwengibwe ku Kalaga weinyu. 41 Nne nili Yehowa, Kalaga weinyu wamutikizye mu Misri, buno nibe Kalaga weinyu; nili Yehowa, Kalaga weinyu.”