Kora, Datani nu Abiramu baguna.
16
1 Kora, mwana wa Izihari, mwana wa Kohati, mwana wa Lawi, gamozi na Datani na Abiramu, bana ba Eliabu, nu Oni mwana wa Peleti, ba kikanga kya Rubeni, 2 basombile Musa, nu beikotizie kweli gamozi na bango bakulu ba baIsraeli nkama ibili nu makumi matano babezaga basondelezia ba bikanga balumba ku baIsraeli beingi nu basombolwa kuba bakulu. 3 Bakundamenne ku Musa nu Haruni, nu bababwide bunee: “Bansania ba musanganano beli basililila, nawe nawe asililila, nu Yehowa eli munkatini mwabo. Ukubabenga. Kubuni ukwisakika gantata ga musanganano wa Yehowa?” 4 Nu Musa, gongule ku bubo bubatendile, eigusizie bukukama. 5 Nu abwide Kora nu bansania babezaga nage bunee: “Nindunindu Yehowa alolesie nazi uli wage nu nazi uli wasililila, nu amukundie bwigi nage. Muntu wasombolwa na Yehowa amukundie lebelebe. 6 Uwe, Kora, nu babo bansania bakukuyanga, kitazi bubuno: Tolazi bikagi byeinyu bya kubika aliga mubyo, 7 nu lubi, bangiazi keiya mubyo nu kubika aliga mubyo lwabusio lwa Yehowa, nu Yehowa asombole muntu, nu wozo muntu abe wasililila. Inyuwe baLawi mwitila nunse.”
8 Musa abwide lingo Kora bunee: “Inyuwe baLawi, ungwililazi! 9 Ndi tabwakuka ku muli buno Kalaga wa Israeli amulekanukizye na bango bantu ba kilongo kya baIsraeli nu kumukundia bwigi nage kukita mulimo wa Numba za Kukulumana za Yehowa nu kwemana lwabusio lwa baIsraeli nu kubakitila? 10 Amukundizie bwigi nage gamozi na mibuto zobe insania zili baLawi, nu inyuwe tondo mukutunda busankoga lingo! 11 Ku kabamba kakano uwe nu bansania bakukuyanga mwakundamanine Yehowa. Nu Haruni, we eli nazi buno mukumukitila manungunungu?”
12 Nu Musa amanine Datani nu Abiramu, bana ba Eliabu, tondo batendile bunee: “Tatukuziga kuvwa. 13 Tabwakuka kuguli buno watutikizye ku kisi kisoga kiyala na mabele nu buuki buno utwite mu kalula? 14 Lingo, ntwatusondelezizie ku kisi kisoga kiyala na mabele nu buuki, nu ntwatukasile bwiyani bwa masoa nu bisanga bya miti za biguma. Ndi ukutunda kuziba meiso ma babano bantu? Kilo, tatukuvwa.”
15 Nu Musa ongilwe nunse, nu atendile ku Yehowa bunee: “Ntwitabizie kayulo kabo. Nsyakatile mpunda aba umozi kubeli, nu nsyakitide umozi wa babo bansania bubi.”
16 Musa abwide Kora bunee: “Uwe nu bansania ba musanganano wobe, mube gano lwabusio lwa Yehowa, uwe nu babo nu Haruni gamozi. 17 Na muntu na muntu avwe lubi na kikagi kyage kya kubikila mu aliga, nu kubika mumo aliga, u bibikilo bya aliga nkama ibili nu makumi matano, nu kubikasana ku Yehowa. Nu uwe nu Haruni mukasane bibikilo byeinyu.” 18 Ububo na muntu na muntu avule na kyage kibikilo kya aliga, nu babikile keiya mubyo nu aliga ga keiya, nu bemenne ku mwingilo wa Numba za Kukulumana. 19 Gakundamanizie Kora bantu bage mu musanganano wa kusomba Musa nu Haruni, nu bakundamenne ku mwingilo wa Numba za Kukulumana, lutanuno lwa Yehowa lwamonekile ku musanganano unsania. 20 Nu Yehowa abwide Musa nu Haruni bunee: 21 “Mwidekanukye na musanganano wono buno nivwame kubazikya kitangalabesi.”
22 Tondo Musa nu Haruni bagwede bukukama nu balilile bunee: “Ee Kalaga, u Kalaga wa mitima za bantu bansania, ndi ukongelwa musanganano unsania ku kabamba ka bwagi bwa muntu umozi tugu?”
23 Nu Yehowa abwide Musa bunee: 24 “Bula bantu ba mwino unsania bunee: ‘Tukazi bwigi na numba za Kora, nu za Datani, nu za Abiramu.’”
25 Musa emanukile nu endile ku Datani nu Abiramu, nu bakulu ba baIsraeli bendile nage. 26 Atondile bantu ba mwino bunee: “Tukazi bwigi na numba za hema za bantu babano babi. Tamwitubye ku kinsania kyabo, munazikibwa nabo mu bwagi bwabo bunsania.” 27 Nu bantu ba mwino babezaga bwigi na numba za Kora, nu numba za Datani, nu numba za Abiramu, batukile nu bendile bulazi nabo. Datani nu Abiramu batukile mu numba zabo nu bemanine ku mwingilo wazo, nawe nawe ku zage numba, gamozi na mukikulu nu bana bage.
28 Musa atendile bunee: “Ku kitondo kikino mwamenye ndi Yehowa ansingile kukita milimo zeno insania nu nsyazikitile mu bwangato bwane tugu nu makengelo mane. 29 Ndi babano bantu bakua mu lukita lukukuaga bango bantu bansania, nti Yehowa ntansingile. 30 Tondo ndi Yehowa akita kitondo kili kito lebelebe, nu kisi kyasula kanua kakyo nu kubamena gamozi na binsania bili byabo, nu bagela mu nsinda beikili na kalamo, nti mwamenye buno bantu babano bansania babengile Yehowa.”
31 Gaasilile kutenda moki mamo mansania, kisi kyabezaga kunsi kwabo kyabede kyundundu, 32 anga bwasula kisi kanua nu kubamena bansania gamozi na binsania byabo, u bantu bansania ba musanganano wa Kora. 33 Babo bansania bagelile mu nsinda gamozi na binsania byabo, nu kisi kyabakukide. Ububo bazikile nu batukizibwe mu mwino. 34 Ku kabamba k'idilo lyabo baIsraeli bansania babezaga bwigi nabo ku ntungo insania batinine. Batendile bunee: “Kisi kinatumena lingo.”
35 Keiya katukile ku Yehowa nu kagisizie bantu nkama ibili nu makumi matano bakasanaga aliga. 36 Yehowa abwide Musa bunee: 37 “Kakizia Eleazari mwana wa Haruni uli sankoga buno atole mpepe zibabikile mo aliga zili munkatini mwa bitumba bya babo bazika mu keiya, nu kwisa lwito luli muzo bulazi mu kingo kiziki, kubuno zezo mpepe zasililila, 38 nu byabezaga bibikilo bya bantu bagile nu bakule ku kabamba ka bwagi bubakitile bobenyene. Babikasile ku Yehowa nu byabede byasililila. Eleazari abitule bibe kyuki kya kasenga ka kayulo, nu kyabe kalolesio ku baIsraeli.”
39 Nu Eleazari sankoga atolile mpepe za bibikilo bya aliga zakasilwe na babo bazikile, nu azitulile kuba kyuki kya Kasenga ka Bisansa, 40 anga bwamukakizizie Yehowa na Musa. Kyuki kikyo kyabezaga kakengelezio ku baIsraeli buno ungo muntu ntakunde Yehowa kugisia aliga, tugu babo beli ba kibuti kya Haruni. Ndi ungo muntu akunda Yehowa kugisia aliga nti abe anga Kora nu babo ba musanganano wage.
41 Gakede busi, bantu bansania ba mwino wa baIsraeli bakitide Musa nu Haruni manungunungu. Batendile bunee: “Mwitile bantu ba Yehowa.” 42 Tondo nkungu zakundamenne musanganano unsania ku Musa nu Haruni nu kugaluka ku Numba za Kukulumana, kitangalabesi kimpa kyakukide Numba nu lutanuno lwa Yehowa lwamonekileko. 43 Musa nu Haruni bendile ku kiziki lwabusio lwa Numba za Kukulumana. 44 Nu Yehowa abwide Musa bunee: 45 “Tuka bulazi na musanganano wono buno nibazikye yiliyili.” Musa nu Haruni bagwede bukukama.
46 Musa abwide Haruni bunee: “Tola lupepe lwobe lwa kibikilo kya aliga nu bika mulo aliga gamozi na keiya kawatikye ku kasenga ka kayulo, nu sasia kwenda ku musanganano wa bantu kubakitila bukulumania. Bongoa bwa Yehowa buli kubeli nu lusambo lukali lwalinga.”
47 Ububo Haruni akitile anga bwatendile Musa nu eitumine lubilo munkatini mwa musanganano. Lusambo lwabasile ku bantu nu bamozi bakule kalazi, tondo Haruni akasenne aliga anga kayulo nu akitide musanganano bukulumania. 48 Emanine gasamba babo beki balama nu babo bakule kalazi, nu lusambo lwasilile. 49 Babo bakule na lulo lusambo lukali bakuka bantu tununu ikumi nu tunazi nu nkama mutubakamo (14.700), geteli kuganza babo bakule ku kitondo kya Kora. 50 Nkungu zasilile lusambo, Haruni asubizie ku Musa, gaabezaga ku mwingilo wa Numba za Kukulumana.