MAGANZO 17

Musumbo wa Haruni wasa.

1 Yehowa atendile ku Musa bunee: 2 “Kakizia baIsraeli buno batole misumbo zabo ikumi nu ibili, umozi umozi ku babo beli basondelezia ba kikanga na kikanga kya beisibo. Sanza izina lya nyene musumbo ga musumbo wage. 3 Ga musumbo wa kikanga kya baLawi sanza izina lya Haruni, kubuno kwatunganana kuba musumbo umozi tugu ku kikanga na kikanga. 4 Zibike mu Numba za Kukulumana lwabusio lwa Bulongeki, u kiziki kinkukulumana n'inyu. 5 Musumbo wa muntu gunasombole waase nsamba, nu nazindilizie manungunungu mamano makumukitila baIsraeli kankanka.”

6 Ububo Musa atendile ku baIsraeli, nu basondelezia babo bamukasile misumbo ikumi nu ibili, na mukota na mukota wage wa kikanga ky'isi, nu musumbo wa Haruni wabezaga gasamba zezo insania. 7 Musa azibikile lwabusio lwa Yehowa mu Numba za Kukulumana.

8 Nu gakede busi, Musa eingide mu Numba za Kukulumana nu amonine musumbo wa Haruni waasile nsamba nu maluba nu biguma. Musumbo wa Haruni wabezaga wa kikanga kya baLawi. 9 Nu Musa abasizie misumbo insania kuzitikya mu kiziki kya lwabusio lwa Yehowa nu kuzilolesia ku baIsraeli bansania. Bazimonine ko nu na muntu na muntu atolile wage musumbo. 10 Yehowa abwide Musa bunee: “Subya musumbo wa Haruni lwabusio lwa Bulongeki, walangwe kuba kakengelezio ku bantu banani. Kako kazindilizie manungunungu mabo mabankitide nu tabakue.” 11 Musa akitile bubo anga bwamukakizizie Yehowa.

12 Kusila baIsraeli batendile ku Musa bunee: “Twakua! Iswe bansania twazika, nu twakua bansania! 13 Muntu unsania wakunda Numba za Kukulumana za Yehowa nti akue. Ndi twakue, iswe bansania?”