Milimo za basankoga nu baLawi.
18
1 Yehowa abwide Haruni bunee: “Uwe, nu basikila bobe, nu ba numba za so, mweke katati ka Kiziki Kyasililila, nu uwe nu bana bobe bamulume, mweke katati ka bwagi bwa busankoga bweinyu. 2 Lusia bwigi mibuto zobe, u babo ba kikanga kya baLawi buno bakulumanibwe nobe nu kumukasia, uwe nu bana bobe, nkungu zimwakitage mulimo mu Numba za Bulongeki. 3 Beli kunsi kobe kukita anga buwabakakizia nu kukita milimo insania za Numba za Hema, tondo tabakunde bintu bya Kiziki Kyasililila aba kasenga banakivwa kukua, babo nu inyuwe. 4 Babe gamozi n'inyu nu babe na mulimo wa kulanga Numba za Kukulumana, ee, milimo insania za Numba. Takuli ungo muntu wakunde kumuli. 5 Nu inyuwe tondo, muli na katati ka kulanga Kiziki Kyasililila nu Kasenga ka Bisansa, buno bongoa tabwavwe lingo ku baIsraeli. 6 Nu Nne nnenyene nasombwede mibuto zobe, u baLawi, babe lukaso kuguli lwatukile ku baIsraeli bansania, lwakasilwe ku Yehowa buno bakite mulimo mu Numba za Kukulumana. 7 Tondo uwe nu bana bobe tugu mwakite mulimo wa busankoga ku Kasenga ka Bisansa nu munda mwa busio bw'ibili. Nkumukasa lukaso lwa busankoga nu mulimo wabo. Nu ungo unsania wakunda Kiziki Kyasililila nti eitwe.”
8 Yehowa abwide lingo Haruni bunee: “Nne nakukasa bulangi bwa tuyulo nu bisansa binsania byakaswa kundi. Bisansa binsania nu tuyulo tunsania twasililila tukukasanaga baIsraeli, nkutukasa kuguli nu ku bana bobe buno twabe kyindi kyeinyu kya busi na busi. 9 Byindi bya bisansa byasililila nunse bitagisibwe ga kasenga byili byobe, nu ku tuyulo twasililila nu nkaso zibankasage, ndi tuyulo twa bunga aba kisansa kya bwagi aba kya katati ka bwagi, kyindi kikyo kitagisibwa mu keiya, nti kili kyeinyu, kyobe nu kya bana bobe. 10 Mwalie byindi bibyo, nu biganzazi byasililila nunse. Bamulume bansania banabilia, tondo mukengele buno byili byasililila.
11 Lingo bibino bili byeinu: binsania bya nkaso zikukasanaga baIsraeli mu tuyulo twabo twa kutengibwa. Nkumukasa zeno nkaso, kuguli nu ku basikila nu bakinga bobe, buno zibe idia lya muntu na muntu wenga lebelebe, ku bibuti byobe aaba nu ku milyalya.
12 Nkumukasa binsania bili bisoga nunse bya makiti mabo ma zeituni, nu bya mazi ma biguma byabo, nu bya bunga busoga bwa matubulo matangi mabo, bibakasanage ku Yehowa. 13 Matubulo matangi mansania mabakasana ku Yehowa, ma lukita na lukita lwa kisi kinsania, meli meinyu, nu nawe nawe wenga mu numba zobe, nti amalie.
14 Kinsania kyankasa baIsraeli kyabe kyobe. 15 Nkula zabutwa mu mubili, u wamulume mutangi wabutwa na bantu, aba ndi wabutwa na nyama, zakaswa ku Yehowa zili zobe, tondo mwatunganana kukulula nkula zeinyu, nu nkula za nyama za nsese. 16 Kungwa zili na bindi byakuka ku mwezi umozi, nti mwazikulule. Bukunza bwa kuzikulula buli shekeli itano za shekeli za Kiziki Kyasililila zili za gela makumi mabili. 17 Tondo nkula za ngombe, aba nkula za mukoko, aba nkula za mpene, tamuzikulule. Zili zasililila. Sandila mikila zazo ku kasenga, nu gisia manona mazo ku Yehowa, meli kisansa kya kugisibwa ku Yehowa, u nsunu nsoga kweli. 18 Nu misuna zazo zili zobe, anga buli bukuba bwa kutengibwa nu kilumbu kya ku seidume bili byeinu. 19 Binsania bya kutengibwa aba kusakikwa bya bisansa byasililila byakaswa ku Yehowa, nkubikasa kuguli nu ku bana bobe basikila nu bakinga buno bibe byeinu. Mulembe wono guli kilumbilo kya munkange kitanakuzinda lwabusio lwa Yehowa kuguli nu ku kibuti kyobe gamozi nobe.”
20 Yehowa abwide Haruni lingo bunee: “Ntwabe na bwiyani mu kisi kyabo, nu uwe ntwabe na kyindi kyobe munkatini mwa byindi byabo. Nne nili kyindi kyobe nu bwiyani bwobe. 21 Nu ku kitondo kya baLawi, nkubakasa kyindi ky'ikumi kya baIsraeli kili bwiyani bwabo ku kabamba ka mulimo wabo gubakukita, u mulimo wa Numba za Kukulumana. 22 Nu kutukila lelo baIsraeli bansania tabakunde lingo Numba za Kukulumana. Ndi bazikunda nti beeke bwagi bwabo nu kukua. 23 Tondo baLawi bakite mulimo wa Numba za Kukulumana nu beeke bwagi buzakitidwe. Mulembe wono guli mulembe gukwizizia ku milyalya mu bibuti byeinu. BaLawi tababe na bwiyani munkatini mwa bango baIsraeli. 24 Kubuno nkubakasa mitebe za kyindi ky'ikumi za baIsraeli zibe bwiyani bwabo. Zezo mitebe zikukaswa ku Yehowa anga kayulo zili bwiyani bwa baLawi. Ku kabamba kako natendile bunee: Tababe na bwiyani munkatini mwa baIsraeli.”
25 Yehowa abwide Musa bunee: 26 “Tenda lingo ku baLawi nu kubabula bunee: ‘Kungwa mwakata mitebe za kyindi ky'ikumi za baIsraeli zinkumukasa zili bwiyani byeinyu, mwatunganana kutikya kyindi ky'ikumi kyeinyu kya mitebe zabo buno kibe lukaso ku Yehowa. 27 Mitebe zeinyu zibe anga kayulo ka mbuto zatuka ku kiziki kya kuzisusula, nu anga mazi ma biguma matuka ku kansango. 28 Mu nzila zeno inyuwe mwakasane ku Yehowa kayulo kakutuka ku mitebe za kyindi ky'ikumi kinsania kya baIsraeli zimwakatage ku baIsraeli. Ku byindi by'ikumi binsania bya baIsraeli mukase nkindi zili za Yehowa ku Haruni sankoga. 29 Mwatunganana kukasana ku Yehowa nkindi zage zili nsoga kutinga nu zasililila nunse, u kyindi ky'ikumi kya binsania bimwakaswe.’
30 Babule lingo bunee: ‘Nkungu zimwakasana nkindi zili nsoga nunse, nti zikuganzwa kumuli anga bwaganzwa kyindi ky'ikumi kya bango, u kyindi ky'ikumi kya mbuto zasusulwa, aba kyindi ky'ikumi kya mazi ma biguma byatutwa. 31 Nu bibyo byasigala byatinga kyindi ky'ikumi kimwakasana ku Yehowa, mubilie kunsania kuli numba zeinyu, kubuno bili nkalilo zeinyu za mulimo gumukukitaga ku Numba za Kukulumana. 32 Kungwa mwakasana nkindi nsoga nunse nti tamwabe na katati ka bwagi mu kitondo kikino, nu tamwabigie tuyulo twasililila twa baIsraeli, nu inyuwe tamwakue.’”