Kwengibwa kwa bataswaga.
19
1 Yehowa abwide Musa nu Haruni bunee: 2 “Lilino lili ikakizio lya mulembe lyakakizizie Yehowa: Kakizia baIsraeli buno bamuvwile na ngombe zakisimana, ibuti liteli na kabalibango, litatumpuka aba kakeke, tondo zili nsoga nunse, nu zitabikwa kisanga kya muzigo. 3 Kasa zo ku Eleazari sankoga, nu we azilusie ku isula lya mwino, nu muntu azisese lwabusio lwage. 4 Kusila Eleazari sankoga akate mikila zazo, nu kusandila nkindi zazo ku lulenge lwa Numba za Kukulumana mambizi mutubakamo. 5 Ku meiso mage, muntu agisie ibuti lilyo lya ngombe nunsania, kikoba nu misuna nu mikila nu tubi twalyo. 6 Nu sankoga wenyene akate misali za muti mwerezi, nu kiyikanwa kikumanwa hisopo, nu myoza zakisimana nu kubisa mu keiya ka kugisia ibuti lya ngombe. 7 Kusila sankoga akungule nsulu nu kuzisuga, nu oge mazi ku mubili wage unsania. Kumbusa kwa kukita bubo eingile mu mwino, tondo ntabe wenga aaba nu mwigolo. 8 Nu muntu wozo wagisizie ibuti lya ngombe asuge nsulu zage nu oge mazi ku mubili wage unsania, nu we lingo ntabe wenga aaba nu mwigolo. 9 Nu muntu wenga asongye lwito lw'ibuti lilyo lya ngombe nu kulubika ku kiziki kyengibwa kili ku isula lya mwino. Lwito lulo lwalangwe na baIsraeli buno lwasambikwe na mazi ma kwengia bantu na bwagi bwabo. 10 Wozo muntu wasongya lwito nu kulubika mu kiziki kyalo asuge nsulu zage insania nu koga mazi ku mubili wage, nu we lingo ntabe wenga aaba nu mwigolo. Ikakizio lilino talinakuzinda ku baIsraeli nu ku bageni beli munkatini mwabo. 11 Wozo witubya ku kitumba kinsania kya muntu abe nsese bindi mutubakamo. 12 Atunganana kwiyengia na mazi mamo ku busi bw'isatu nu lingo ku busi bwa mutubakamo, nu kusila nti enga. Tondo ndi ntakwiyengia ku busi bw'isatu nu lingo ku busi bwa mutubakamo, nti asigala na nsese zage. 13 Wozo witubya ku kitumba kya muntu unsania nu ntaziga kwiyengia nti abigia Numba za Hema za Yehowa. Wozo muntu apumbibwe bulazi na baIsraeli. Asigale na nsese zage kubuno ntasandilwa mazi ma kwengia.
14 Wono guli mulembe ku muntu wakua mu numba za hema: Muntu na muntu ukwingila muzo, nu muntu na muntu uli muzo eli nsese bindi mutubakamo. 15 Nu kintu na kintu kili bwasi, kiteli na kyuki kyakandwa, kili nsese.
16 Nu muntu unsania uli mu isoa aba ku mulungu wa mwino, nu eitubya ku kitumba kya muntu witwa na mwene wa nganda aba ndi akule tugu, geteli lusambo aba kingo kyakwita bantu, wozo witubye ku kitumba, nu wozo witubye ku nsinda za muntu aba ku ikwa lya muntu wakule, nti eli nsese bindi mutubakamo.
17 Ku kabamba ka bantu beli nsese, bikazi mu idega nkindi za lwito lwa ngombe zagisizibwa ku kisansa kya kwengia nu kulusambikia na mazi masoga nunse. 18 Nu muntu wozo uli nsese akate hisopo, nu kulibika mu mazi, nu kumasandila ga numba za hema, nu ku bantu babezaga muzo nu bintu byazo. Amasandile lingo ku muntu unsania witubizie ku ikwa lya muntu, aba ku nsinda za muntu, aba ku kitumba kya muntu witilwe, aba ku kitumba kya muntu wakule mu lukita lunsania. 19 Wozo muntu wenga asandile wozo muntu utenga ku busi bw'isatu bwa nsese zage, nu lingo ku busi bwa mutubakamo bwazo, nu ku busi bubo bwa mutubakamo amwengie nunsania. Wozo muntu wengibwe asuge nsulu zage nu koga mazi ku mubili wage unsania, nu mwigolo nti enga. 20 Tondo ndi muntu uli nsese ntakwiyengia nti apumbibwe bulazi na bantu ba mwino wage, kubuno abigizie Kiziki Kyasililila kya Yehowa. Mazi ma kwengia tamasandilwe kweli nu asigale nsese. 21 Mulembe wono guli wabo aaba nu ku milyalya. Wozo ukusandila mazi ku babo bengibwe asuge nsulu zage, nu unsania witubye ku mazi ma kwengia abe nsese aaba nu mwigolo. 22 Kintu kinsania kitubibwa na mwiya nsese kili nsese, nu muntu unsania witubye kukyo abe nsese aaba nu mwigolo.”