Mazi matuka mu ikozi.
20
1 Mu mwezi mutangi baIsraeli bansania, u musanganano unsania wa bantu bansania, bavule ku Kalula ka Zini, nu beikede mu ido ku Kadesi. Miriamu akule kuko, nu bamuyikile. 2 Takwabezaga mazi ku bantu ba mwino, nu beikundamanizie ku Musa nu Haruni. 3 Basakile na Musa, nu bamubwide bunee: “Songo twakule gakule mibuto zeitu lwabusio lwa Yehowa. 4 Kubuni watusondelezizie, iswe beli bantu ba musanganano wa Yehowa, ku kakano kalula, buno tukue, iswe nu bituganwa byeitu, gano? 5 Kubuni watutikizye mu Misri nu kutusondelezia gano ku kiziki kikino kibi? Gano tageli mbuto aba tini, takuli mizabibu aba makomamanga, nu takuli mazi ma kunua.”
6 Musa nu Haruni batukile mu musanganano nu bendile ku mwingilo wa Numba za Kukulumana nu bagwede bukukama, nu lutanuno lwa Yehowa lwamonekile ko kubeli. 7 Yehowa abwide Musa bunee: 8 “Kata musumbo wobe, nu uwe nu solonzi Haruni kundamaniazi musanganano gamozi. Kakizia lwanda lulo, lwabusio lwabo, nu lwabasie mazi malo. Nu uwe wababasizie mazi matuke mu lwanda buno babo bansania nu bituganwa byabo banue mazi.”
9 Ukinsa Musa atolile musumbo wage wabezaga lwabusio lwa Yehowa, anga bwamukakizizie. 10 Musa nu Haruni bakundamanizie bantu bansania mu musanganano lwabusio lwa lwanda, nu Musa abatendile bunee: “Inyuwe baguni, ungwililazi kano kaluma. Ndi iswe u bakumubasizia mazi kutuka mu lwanda luluno?” 11 Musa alambizie kuboko kwage nu alibwide lwanda mambizi mabili na musumbo wage. Mazi mabasile mengi, nu musanganano wanune nu bituganwa byabo byanune.
12 Tondo Yehowa atendile ku Musa nu Haruni bunee: “Kubuno tamwankatizizie, nu kunkasa lutanuno lwabusio lwa baIsraeli, tamwingizie bantu ba musanganano wono mu kisi kinabakasa.”
13 Mamano meli mazi ma Meriba; kubuno baIsraeli bendile myango na Yehowa, nu gago eidolesizie wisanana munkatini mwabo.
BaEdomu tabaziga baIsraeli batinga.
14 Musa asingile migenzi kutuka Kadesi kwenda ku mukota wa baEdomu kumutenda bunee: “Mubuto wobe Israeli akutenda bunee: ‘Wizi tubebe tunsania twatubaside. 15 Batateiswe bagelile ku Misri nu twikalile kuko myaka mingi. Tondo baMisri bakitide batateiswe nu iswe bubi, 16 nu gatwalilile ku Yehowa ongule ku iyuki lyeitu nu asingile mwanzelo nu kututikya mu Misri. Kano kaluma tuli gano ku mwaga wa kisi kyobe, ku Kadesi, 17 nu twakusega kwitabizia tutinge mu kisi kyobe. Tatwingile mu isoa limozi aba mu kisanga kya mizigi za biguma, nu tatwanue mazi ku kanuabalongo kamozi. Tukwenda tugu mu nzila za mukota nu kutagaluka ku seidume aba ku seikazi aaba nu gatwasile kutinga nunsania mu kisi kyobe.’”
18 Tondo mukota wa baEdomu akwide bunee: “Tamwatinge mu kisi kyane. Ndi mwageleka, nti navwe na bakoloboyo bane kwitana n'inyu na myene za nganda.”
19 BaIsraeli batendile bunee: “Tukwenda mu nzila nnene tugu, nu ndi twanua mazi mobe, iswe aba bituganwa byeitu, nti twamulige bukunza bwamo. Tukutunda kutinga na magulu tugu mu nzila nnene. Tatukutunda kingo kimozi.”
20 BaEdomu batendile lingo bunee: “Tamwatinge.” Nu mukota wabo avule na bakoloboyo bage beingi nu beiya magala.
21 Kubuno baEdomu tabazigile baIsraeli batinge mu kisi kyabo, baIsraeli bagalukile kungo.
Lukuo lwa Haruni.
22 Musanganano unsania wa baIsraeli, u bansania b'ido lyabo, batukile ku Kadesi nu bavule ku Mwiduko wa Hori. 23 Kuko ku Mwiduko wa Hori, guli bwigi na mwaga wa kisi kya baEdomu, Yehowa abwide Musa nu Haruni bunee: 24 “Haruni akundamanibwe ku bantu bage.a Nteingile mu kisi kinkukasa baIsraeli, kubuno inyuwe babili mwasombile ikakizio lyane ku mazi ma Meriba. 25 Bakama Mwiduko wa Hori na Haruni nu mwana wage Eleazari. 26 Kungula nsulu za Haruni nu vwalikya Eleazari zo, kubuno Haruni akue nu kwenda ku beisi. Akukua ga mwiduko.”
27 Musa akitile anga bwakakizizie Yehowa. Babakamine Mwiduko wa Hori lwabusio lwa bantu bansania. 28 Musa akungwide nsulu za Haruni nu avwalikizie Eleazari, mwana wa Haruni, zo. Haruni akule gago ga ntonga za mwiduko. Kusila Musa nu Eleazari bagelile mu mwiduko. 29 Nkungu zamonine bansania ba musanganano buno Haruni akule, balilide Haruni bindi makumi masatu. Bansania bamulilide.