Nzoka za nsubi.
21
1 Mukota wa Aradi, muKanana umozi, wikalaga mu kibe kya kisi kyamanagwa Negevi, ungule buno baIsraeli bakuvwa mu nzila zikwenda ku Atarimu, eitenne na baIsraeli nu akatile bamozi. 2 Nkungu zezo baIsraeli balagile Yehowa bunee: “Ndi watukasa bantu babano, nti twazikya nunsania miino zabo.” 3 Yehowa ungule idagano lyabo, nu abakasile babo beiti ba baKanana. Ukinsa baIsraeli bazikizye nunsania miino zabo nu bantu babo. Ku kabamba kako kiziki kikyo kyamaninwe Horma.
4 Batukile ku Mwiduko Hori kwendelela mu nzila zikwenda ku Kitatenge Kyakisimana, kutimba kisi kya baEdomu. Tondo bantu bakutilwe mu komanizia kabo. 5 Nu bakitile manungunungu ku Kalaga nu ku Musa. Batendile bunee: “Kubuni mwatutikizye mu Misri kutwita mu kalula kakano? Takuli idia, nu takuli mazi; mitima zeitu zikusomba idia lilino.”
6 Nu Yehowa asingile nzoka zakisimana anga keiya munkatini mwabo, nu zatwide bantu nu beingi ba baIsraeli bakule. 7 Bantu bavule ku Musa, nu batendile bunee: “Twagile gatwakitile manungunungu kuguli nu ku Yehowa. Tusegele buno Yehowa atikye zeno nzoka kutuli.” Ububo Musa asegede bantu.
8 Nu Yehowa abwide Musa bunee: “Kita nzoka za nsubi nu kuzisakika ku muti buno unsania watubwa anavwama kuzimona, nu ndi azilola nti alama.” 9 Ukinsa Musa akitile nzoka za nsubi, nu azisakikile ku muti. Kusila ndi nzoka zatoa muntu unsania, nkungu zalola wozo muntu ku zezo nzoka za nsubi, nti alama.
Lugendo ku Kibitabita kya Moabu.
10 BaIsraeli bendile nu bakitile ido lyabo ku Oboti. 11 Batukile ku Oboti, nu beiyombekile mu ido ku Iye-Abarimu mu kalula kakulolana na kisi kya baMoabu kukutukaga kisongo kya busi. 12 Batukileko, nu bendile ku Kibitabita kya Zeredi nu kwiyombeka mu ido. 13 Bendile lingo kwiyombeka mu ido ku mutili wa luuzi lwa Arnoni mu kalula. Luuzi lwa Arnoni luli mwaga wa kisi kya baMoabu, gasamba baMoabu nu baAmori. 14 Ku kabamba kako mu mukanda wa Bita bya Yehowa mwasanzwa bunee:
“Mwino wa Wahebu mu kisi kya Sufa nu luuzi lwa Arnoni, 15 Nu kugela kwa mazi ku kiziki kya Ari, nu kuli ku mwaga wa Moabu.”
16 Batukile ko nu bendile ku Beli, u kanuabalongo katendile Yehowa ku Musa bunee: “Kundamania bantu gamozi, nu nabanusie mazi.”
17 Mu nkungu zezo baIsraeli beimbile luluno lwimbo bunee:
“Kanuabalongo, basia mazi! Mwimbazi kitondo kikino,
18 Ee, imbazi kitondo kya kanuabalongo kombile bakota,
Kombile mitonge na misumbo zabo,
U tulolesio twa bwangato bwabo.”
Nu bendile kutuka kuko kwenda ku Matana. 19 Nu kutuka ku Matana bendile ku Nahalieli, kumbusa ku Bamoti, 20 nu kutuka ku Bamoti bendile ku kibitabita kya Moabu, gago galolelana ntonga za Mwiduko wa Pisiga nu kalula.
Bakinda Sihoni nu Ogi.
21 BaIsraeli basingile migenzi ku Sihoni mukota wa baAmori kumutenda bunee: 22 “Tukase bwangato bwa kutinga mu kisi kyobe, tatwagaluke mu nzila kwenda mu masoa aba mu bisanga bya miti za biguma, nu tatwanue mazi ma tunuabalongo. Tukwenda tugu mu nzila nnene za mukota aaba nu twasila kutinga myaga za kisi kyobe.”
23 Tondo Sihoni ntazigile baIsraeli batinge mu kisi kyage. Akundamanizie bakoloboyo bage bansania nu kubasila baIsraeli mu kalula. Gababasile ku Yahaza beitenne na baIsraeli. 24 Tondo baIsraeli bamukindile nunsania nu beitile bakoloboyo bage na myene za nganda. Lingo bakatile kisi kyage kinsania kutukila luuzi lwa Arnoni aaba nu ku luuzi lwa Yaboki luli mwaga wa kisi kya baAmoni. BaAmoni babezaga na magala nu bakali ku mwaga wabo. 25 BaIsraeli bakindile miino insania za baAmori, aaba nu Hesiboni nu miino insania zagutimbile. 26 Hesiboni wabezaga mwino wa mukota wa baAmori, u Sihoni, witenne na mukota wa baMoabu nu kutikya kisi kyage kinsania ku bwangato bwage aaba nu ku luuzi lwa Arnoni. 27 Ku kabamba kako basozi ba tuzeni batendile bunee:
“Vwazi ku Hesiboni, nu wobakwe lingo busoga.
Mwino wa Sihoni wimikwe lingo;
28 Keiya katukile mu Hesiboni,
Nu ngulumina za keiya ku mwino wa Sihoni.
Kagisizie Ari wa baMoabu.
Kazikizye bantu ba miduko za Arnoni.
29 Inyuwe baMoabu, kabebe kumuli,
Inyuwe bantu ba Kemosi, mwazika.
Basikila bage babede batini,
Nu bakinga bage bendile ku bukobe bwa
Kukitila Sihoni mukota wa baAmori.
30 Tondo kano kaluma twabakindile na misungu.
Hesiboni wazika nu binsania aaba nu Diboni.
Twabazikizye aaba nu ku Nofa nu ku Medeba.”
31 Ububo baIsraeli beikede mu kisi kya baAmori. 32 Nu Musa asingile batambuzi ku Yazeri. BaIsraeli bagukindile gamozi na miino zagutimbile, nu bapumbizie baAmori beikalaga kuko. 33 Nu bagalukile kubakama ku nzila za Basani, nu Ogi, mukota wa Basani, gamozi na bakoloboyo bage bansania bababaside kwitana nabo ku Edirei. 34 Yehowa abwide Musa bunee: “Ntumukue boba, kubuno namukasile kuguli gamozi na bakoloboyo bage bansania nu kisi kyage. Mukitile anga buwakitide Sihoni, mukota wa baAmori, wikalaga mu Hesiboni.”
35 Ububo baIsraeli bamwitile, we nu bana bage bansania nu bakoloboyo bage bansania, nu tabasigile muntu wampa. Beiyanine kisi kyage.