Milembe za bilumbilo ku Yehowa
27
1 Yehowa atendile lingo ku Musa bunee: 2 “Bula baIsraeli bunee: ‘Ndi muntu unsania wakita kilumbilo kya kukasana muntu ku Yehowa, nti muntu wozo wakasanwa alige anga bubuno: 3 ndi eli wamulume gasamba mwaka wa makumi mabili nu mwaka wa makumi mutuba, alige shekeli makumi matano za feza, ma shekeli a za Numba za Kukumbamina, 4 nu ndi eli mukikulu wa myaka zigezye zezo, nti alige shekeli makumi masatu. 5 Nu ndi muntu wozo eli gasamba mwaka w'itano nu mwaka wa makumi mabili, nu eli wamulume, bukunza bwalige buli shekeli makumi mabili, nu ndi eli mukikulu buli shekeli ikumi. 6 Nu ndi eli wa mwezi umozi aaba nu ku mwaka w'itano, ku wamulume bukunza bwage buli shekeli itano, nu ndi eli mukikulu nti bukunza bwage buli shekeli isatu. 7 Ndi muntu eli wa myaka makumi mutuba nu kutinga nti bukunza bwage buli shekeli ikumi nu itano ku wamulume, nu ku mukikulu shekeli ikumi. 8 Tondo ndi muntu walumbila idumbilo eli muzambi nu ntavwama kuliga bukunza bwatendwa, nti avwe ku sankoga na muntu waatunda kukasana ku Yehowa, nu sankoga abike bukunza bwavwama kuliga wozo watunda kumukasana ku Yehowa. 9 Ndi muntu alagile kukasana ku Yehowa nyama za bituganwa byage zineitabizibwa na Yehowa, nyama zezo zakasanwe ku Yehowa zibe zasililila. 10 Ntanagalukya zezo nyama n'engo, anga nyama nsoga ku mbi, aba mbi ku nsoga. Ndi agalukya nyama ku nyama, nti zezo ibili, zezo zaatundile kukasana nu zezo zaatundile kugalukya nazo, zibe zasililila. 11 Ndi nyama zaatundile kukasana zili nyama za nsese, zitatunganana kukasanwa ku Yehowa kuba kayulo aba kisansa, nti nyama zezo zalusibwe ku sankoga, 12 nu sankoga atende ndi zili nsoga aba mbi, nu bukunza bwatenda sankoga, ndi bunene aba bukeke, nti buli bukunza bwazo. 13 Tondo ndi mwiya zo atunda kuzikulula, nti atalike kyindi kimozi kya bitano kya bukunza bwazo.
14 Ndi muntu engia numba zage kuba zasililila ku Yehowa, b sankoga alole ndi zili numba nsoga 15 Ndi muntu wengia numba zage atunda kuzikulula lingo, nti atalike kyindi kimozi kya bitano ku bukunza bwazo, nu numba zabe zage lingo.
16 Nu ndi muntu akasana kyindi ky'isoa lya bwiyani bwage ku Yehowa, bukunza bwakyo bwabe anga kuyika kwakyo, u shekeli makumi matano za feza ku isoa lyakuka kuyika luzi lunene c lwa mbuto za shayiri. 17 Ndi engia isoa lyage mu mwaka wa mbogimbogi, bukunza bwatendile sankoga bwasigale, 18 tondo ndi engia isoa lyage kumbusa kwa mwaka wa mbogimbogi, nti sankoga aganze myaka zasigala aaba nu mwaka wa mbogimbogi nu atende bukunza bwagezibwa bulingilingi na myaka zasigala aaba nu mwaka wa mbogimbogi muto. 19 Ndi muntu wengia isoa lyage atunda kulikulula, nti atalike kyindi kimozi kya bitano kya bukunza bwalyo, nu isoa lyabe lyage lingo. 20 Tondo ndi ntalikulula aba ndi alikunzizie ku ungo muntu, nti talinakululwa aba kakeke. 21 Nkungu za kulisubya mu mwaka wa mbogimbogi, nti lyabe lyasililila anga isoa lyengibwa ku Yehowa, nu lyabe lya basankoga.
22 Ndi muntu atunda kwengia kyindi ky'isoa lyakunzile, nu talili bwiyani bwa kikanga kyage, 23 nti sankoga aganze bukunza bwalyo ku myaka zasigala aaba nu mwaka wa mbogimbogi, nu muntu abulige busi bubo anga kintu kyasililila ku Yehowa. 24 Ku mwaka wa mbogimbogi isoa lyasubye ku wozo walikunzizie, u mwiya bwiyani bwa kikanga kikyo.
25 Bukunza na bukunza bwabe bwa shekeli za Numba Zasililila, d nu shekeli emozi zili gera makumi mabili.
26 Takuli muntu wampa unengia nkula za nyama, kubuno nkula zili za Yehowa kalazi, ndi nkula za ngombe, aba za mukoko, zili za Yehowa. 27 Ndi zili emozi za nyama ziteli nsoga, nti anazikulula ku bukunza bwatenda sankoga nu kutalika lingo kyindi kimozi kya bitano. Ndi ntazikulula, nti zakunzibwe ku bukunza bwatendwa.
28 Tondo kinsania kili kya muntu nu akyengia ku Yehowa, ndi muntu aba nyama aba isoa lya bwiyani bwage, takinakululwa. 29 Na muntu na muntu wakasanwa nunsania ku Yehowa ntanakululwa. Atunganana kukua. 30 Kyindi ky'ikumi kya binsania bikwasa mu masoa kili kya Yehowa, ndi mbuto zikwasa munsi aba biguma bya miti. Kili kyasililila ku Yehowa. 31 Ndi muntu akulula nkindi za kyindi ky'ikumi kyage, nti atalike kyindi kimozi kya bitano kya bukunza bwakyo. 32 Kyindi ky'ikumi kinsania kya kibombo kya ngombe aba lusumba lwa mikoko kili kyasililila ku Yehowa. 33 Gamwaganze bituganwa, nyama z'ikumi nu nyama z'ikumi zili za Yehowa. Zasililila kweli. Ndi azigalukye, nti nyama zezo nu zezo zaatunda kugalukya, zezo ibili zili zasililila nu tazinakululwa.’”
34 Makakizio mamano meli makakizio matendile Yehowa ku Musa ku Mwiduko Sinai kumakasa ku baIsraeli.