Mponga za Kalaga ku babo bamwanza
26
1 Nu atendile lingo bunee: “Tamwikitile ikumbamino, aba tamuzanzule nkisi aba iyango ku kabamba keinyu, aba tamubike ikozi lyabazwa mu kisi kyeinyu buno mulikumbamine, kubuno Nne nili Yehowa, Kalaga weinyu. 2 Kokomeziazi Sabato zane insania, nu anzazi kiziki kyane kyasililila. Nne nili Yehowa.
3 Ndi mwakite makakizio mane nu mwidange kukita milembe zane 4 nti namulokezye mbula mu nkungu zazo, nu kisi kyasie matubulo mansania makyo, nu miti zakolame biguma byazo. 5 Kususula mankanda ma mbuto kwizizie aaba nu kulinga kwa kukola biguma bya mizigi, nu kukola biguma bya mizigi kwizizie aaba nu kulima nu kuyika mbuto, nu inyuwe mwalie malia meingi ku kwembuka, nu mwikale mu kisi na bubobelelo.
6 Namubobelezie mu kisi nu mwiyombeke geteli boba, aba takwabe wampa wamwitie boba. Natikye nyama nkali mu kisi kyeinyu, nu bita bya myene tabyabe mu kisi. 7 Mwapumbie beiti beinyu nu bagoe lwabusio lweinyu na myene za nganda. 8 Bantu batano ba kumuli bapumbie beiti lukama lumozi, nu bantu lukama ba kumuli bapumbie bantu tununu ikumi (10.000), nu beiti beinyu bagoe lwabusio lweinyu na mwene wa nganda. 9 Nu Nne namukase mponga nu kumwitizia buno maganzo meinyu mabe meingi, nu nakite idagano linamulagile. 10 Nu mukalia bibyo byasigala ku matubulo ma mwaka watinga kalazi ku nkungu za kubitikya buno mwabe na kiziki kya kubika matubulo ma mwaka wono. 11 Nu nabike numba munkwikala munkatini mweinyu nu nsyamusombe. 12 Natabange munkatini mweinyu nu nabe Kalaga weinyu, nu inyuwe mwabe bantu bane. 13 Nne nili Yehowa, Kalaga weinyu, wamutikizye mu kisi kya Misri, buno tamube lingo bakobe ba baMisri. Namutikizizie bwangato bwa bukobe, nu namukasile magala buno mwatabange geteli nsoni.
Nsungio ku babo batanza Kalaga
14 Tondo ndi tamwannungwilila, aba kukita makakizio mamano mansania, 15 nu ndi mwanana milembe zane nu kusomba makakizio mane nu kutakita binsania binamukakizizie, nu mu zeno nzila mwite idagano lyane, 16 nu Nne tondo, namukitile bubuno: Namulusizie boba kitangalabesi, nu nsambo zikumwondia, nu muzuzo gukwita meiso meinyu nu zikutambia mitima zeinyu. Mwayike mbuto zeinyu bulia, kubuno beiti beinyu balie matubulo mazo. 17 Nabike meiso mane kumuli buno mwakindwe na beiti, nu babo bamusomba bamwangate, nu mwatine mu nkungu zimutakuyangwa.
18 Nu ndi ku bitondo bibino binsania tamwaziga kunnungwilila, nti namusungie mambizi mutubakamo ku kabamba ka bwagi bweinyu. 19 Nite lwikotio lwa mitima zeinyu, nu nakite buno igulu libe anga kyuma nu nsi zibe anga nsubi kumuli. 20 Nu mwazimizie magala meinyu bulia, kubuno kilongo takyasie mbuto na munago wakyo, aba miti tazakolame biguma byazo.
21 Ndi mwasigala mu misako za kunnana nu kutaziga kunnungwilila, nti nitile kumusungia na mbabazio mambizi mutubakamo anga buli bwagi bweinyu. 22 Nasinge nyama nkali za mu lubanda kumuli, kunyaga bana beinyu nu kwita bituganwa byeinu, nu kumukegya mube na maganzo makeke, buno nzila zeinyu zabube.
23 Nu ndi ku bitondo bibino tamwaziga kunnungwilila tondo mwizizia kunnana, 24 nti Nne nnenyene nabe mwiti weinyu, nu kumusungia lingo mambizi mutubakamo ku kabamba ka bwagi bweinyu, 25 nu nalusie myene za nganda kumuli kumusuba ku kabamba ka kwita idagano lyane. Gamwatine mu miino zeinyu kwibisa, nti nasinge nsambo munkatini mweinyu, nu mwakaswe ku maboko ma beiti. 26 Nkungu zinasinge nzala kumuli, nti bakikulu ikumi bayike idia lyeinyu ku ipika limozi tugu, nu bamukase idia lyeinyu ku kilindiko kya muntu na muntu. Mwalie tondo tamwembuke.
27 Nu ndi ku bitondo bibino binsania tamwaziga kunnungwilila, nu mwasigala mu bwiti kundi, 28 nti mu bongoa bwane, nabe mwiti weinyu, nu Nne tondo, nnenyene namusungie lingo mambizi mutubakamo ku kabamba ka mibi zeinyu. 29 Nu inyuwe mwalie misuna za bana beinyu, misuna za basikila nu misuna za bakinga. 30 Nazikye biziki byeinu bya gantata miduko, nu kugisia tusenga tweinyu twa kugisia bulago, nu kwisa bitumba byeinyu gantata bitumba bya nkisi zeinyu, nu Nne namusombe nunse. 31 Nagalukye nunse miino zeinyu nu biziki byeinu byasililila buno bibe bukindu nu nsyabogeboge na nsunu za tuyulo tweinyu. 32 Nazikye nunse kisi kyeinyu buno beiti beinyu beli mubyo bangame. 33 Namubalanganie mu bilongo nu natikye mwene wane wa nganda mu musagi wago nu kumuyanga. Kisi kyeinyu kyasambuke, nu miino zazike nunse. 34 Mu nkiko zezo, kisi kyabogeboge na kumunwa mu Sabato zakyo. 35 Mu myaka insania za kwizizia mu bukindu, kisi kyumunwe anga bukitomunagwa mu myaka za Sabato zimwikalaga mukyo.
36 Ku kitondo kya babo basigala, nabeitizie boba mu mitima zabo buno iyuki lya lusamba lwekwa na lumpumpu lyabapumbie nu bo, anga bukutinaga muntu lwabusio lwa mwene wa nganda, nu bagoe tondo takuli umozi wabayanga. 37 Beikukane bwabobwabo anga bakutina mwene wa nganda, tondo takuli umozi wabayanga. Bubo tamwabe na magala ma kwemana lwabusio lwa beiti beinyu. 38 Mwakue mu bilongo bya bango bantu, nu bilongo bya beiti beinyu byamulie. 39 Nu babo basigala kumuli batambe aaba nu bakue mu bilongo bya beiti ku kabamba ka bwagi, nu lingo ku kabamba ka bwagi bwa beisibo, bonde nu kutamba aaba nu bakue.
40 Tondo ndi beigonge bwagi bwabo nu mibi za beisibo, u bwengelezi nu bwiti bwabo kundi, 41 bwangalukizye kuba mwiti wabo, buno nabeimbizie ku bilongo bya beiti babo, mu nkungu zezo zibabotezie mu mitima zabo zitamonesizibwe nu basungizibwe ku bwagi nu mibi zabo, 42 mu zezo nkungu nakengele lingo idagano lyane na Yakobo nu Isaka nu Abrahamu, nu nakengele lingo idagano lyane kubakasa kisi. 43 Kubuno kisi kyasigwe nabo, nu kyabogeboge ku Sabato zakyo mu nkiko zikyabe bukindu bubuno geteli bantu. Nu bo basungibwe ku kabamba ka bwagi bwabo, kubuno bananine makakizio mane, nu basombile milembe zane. 44 Tondo ku bitondo bibino, nkungu zibeli mu bilongo bya beiti babo, nsyabatune nunsania aba kubasomba buno nabazikye nunsania, kubuno songo nakita bubo songo nita nunsania idagano lyane nabo. Nne nili Yehowa, Kalaga wabo. 45 Tondo ku kabamba kabo nakengele idagano, linalagile beisibo banatikizye mu Misri lwabusio lwa meiso ma babilongo buno nibe Kalaga wabo. Nne nili Yehowa.”
46 Mamano meli makakizio, nu milembe nu nsungio, zakasenne Yehowa geisamba na baIsraeli, ku kuboko kwa Musa ga mwiduko wa Sinai.