Myaka zabo mu kalula.
2
1 Nu atendile lingo bunee: “Kumbusa twagalukile, twendile mu kalula mu nzila za Kitatenge Kyakisimana anga bwambwide Yehowa, nu twatimbile mwiduko wa Seiri. 2 Nu Yehowa antendile bunee: 3 ‘Mwatimbile mwiduko wono nkungu zakuka, mugaluke ku lulenge lwa kwikazi. 4 Kakizia bantu bunee: “Mwatinge mu myaga za mibuto zeinyu, u bantu ba kibuti kya Esau bakwikalaga mu Seiri. Bamukue boba. Ukinsa mwidange. 5 Tamwitane nabo, kubuno nsyamukase kisi kyabo nunse kukinyanta na magulu meinyu, kubuno nakasile Esau wono mwiduko wa Seiri kwiyana go. 6 Mwakunze idia kubeli na feza buno mulie, nu mwakunze mazi kubeli buno munwe. 7 Kubuno Yehowa, Kalaga weinyu, amukasile mponga mu milimo zeinyu insania zimwakitile. Akumenya kwenda kweinyu na magulu mu kalula. Myaka makumi manazi Yehowa, Kalaga weinyu, abezaga gamozi n'inyu, nu tamwidile kampa.”’ 8 Ububo twatingile mibuto zeitu, u baEsau beikalaga mu Seiri, ku nzila za kibitabita kinene kyamanwa Araba, kutuka ku Elati nu Ezioni-Geberi, twagalukile kutinga ku Kalula ka Moabu. 9 Gago Yehowa ambwide bunee: ‘Tamukutie baMoabu, nu tamusake nabo ku bita, kubuno nsikumukasa kampa ka kisi kyabo kukiyana, kubuno nakasile Ari ku bana ba Loti buno kibe bwiyani bwabo. 10 (Mu Ari u mwikalaga baEmi wakalazi. Babo bantu babezaga beingi nu banene nu balazi anga buli baAnaki. 11 Babo bakengedwe anga baRefaimu, anga baAnaki, tondo baMoabu babamanine baEmi. 12 Lingo baHori beikalaga mu Seiri, tondo baEsau babanyagile nu kubazikya, nu beikalile mu kiziki kyabo, anga bwakitile baIsraeli ku bwiyani bwabo bwa kisi kyabakasile Yehowa.) 13 Zanzukazi, musoke mpinga za luuzi Zeredi.’ Ububo twasokile zezo mpinga za Zeredi. 14 Bindi binsania bitwendile kutuka Kadesi-Barnea aaba nu twasokile Zeredi byabezaga myaka makumi masatu nu kinana, aaba nu kibuti kinsania kya bakoloboyo kyazikile mu ido, anga bwalagile Yehowa. 15 Lebelebe kuboko kwa Yehowa kwabezaga kubeli kubazikya mu ido, aaba nu bansania bazikile.
16 Gabazikile bansania nu kukua munkatini mwa bantu, 17 Yehowa ambwide bunee: 18 ‘Lelo musoke luuzi lwa mwino wa Ari, luli mwaga wa kisi kya baMoabu, 19 nu kungwa mwabasa bwigi na mwaga wa baAmoni, tamubakutie aba kusaka nabo, kubuno nsyakukase kampa ku kisi kyabo kibe bwiyani bweinyu, kubuno nakikasile ku bana ba Loti ku bwiyani bwabo.’
20 Kikyo kisi kyabezaga kisi kya baRefaimu, u mapuka malazi, kubuno baRefaimu beikalaga mukyo wakalazi, tondo baAmoni bamanine babo bantu baZamuzumi, 21 nu babezaga mapuka, nu balazi, nu beingi anga baAnaki. Nu Yehowa abazikizye lwabusio lwa bana ba Loti, nu bana ba Loti babanyagile nu kwikala mu kisi kyabo. 22 Yehowa akitide baEsau beikalaga mu Seiri bubo gaazikizye baHori lwabusio lwabo, nu bo baEsau bapumbizie baHori nu beikalalile mu kisi kyabo aaba nu lelo. 23 Nu baAvi, beikalaga mu miino zabo aaba nu ku mwino wa Gaza, bazikizibwe na baKafutori. Babo baKafutori, batukile mu kisanga kyamanagwa Kafutori, nu babazikizye nu beikede mu miino zabo.
24 Nu atutendile lingo bunee: ‘Zanzukazi, mwende, nu musoke luuzi Arnoni. Lebelebe namukasa Sihoni muAmori, u mukota wa ku Hesiboni, nu kisi kyage. Ingilazi mukyo nu kulinga kukyangata, mulwane nage mu bita. 25 Lelo nalinga kubika boba ku bantu bansania beli kunsi kw'igulu, bakungwa misagu zeinyu buno bamukue boba buno bagilimine nu kuba na tubebe twingi.’
BaIsraeli bakinda mukota Sihoni.
26 Kutuka mu Kalula ka Kedemoti nasingile migenzi ku Sihoni, mukota wa ku Hesiboni, kulonda bubobelelo nage. Namutendile bunee: 27 ‘Tukase bwangato kutinga mu kisi kyobe. Twende mu nzila tugu; tatwagaluke ku seidume aba ku seikazi. 28 Watukunzie idia na bikulo buno tulie, nu watukunzie mazi na bikulo buno tunue. Tukase tugu bwangato bwa kwenda na magulu, 29 anga bwatukitide baEsau beikalaga mu Seiri, nu baMoabu beikalaga mu Ari. Kita bubo aaba nu twasoka Yordani nu kwingila mu kisi kyatukasa Yehowa, Kalaga weitu.’
30 Tondo Sihoni mukota wa ku Hesiboni ntatuzigile kutinga mwage, kubuno Yehowa, Kalaga weinyu alimbanizie mutima wage, buno amukasane kumuli, anga buli lelo. 31 Nu Yehowa ambwide bunee: ‘Tamukumona, nalingile kumukasa Sihoni nu kisi kyage. Lingazi kwiyana kisi kyage.’
32 Ububo Sihoni avule kutuli na bakoloboyo bage bansania ku Yahaza. 33 Yehowa, Kalaga weitu, amukasile kutuli nu twamukindile, we nu bana nu bantu bage bansania. 34 Twakindile miino zage insania mu bindi bibyo nu twazikizye bansania ba mwino na mwino, u bamulume nu bakikulu nu bana. Tatwasigile wampa. 35 Twakatile bituganwa nu ntiko za miino zabo zibe ntiko zeitu.
36 Kutukila Aroeri, mwino guli ku ntungo za luuzi Arnoni, nu mwino guli mu mpinga aaba nu ku Gileadi, takwabezaga mwino wampa wavwamine kutukinda. Yehowa, Kalaga weitu, atukasile insania. 37 Tondo tatwakundile kisi kya baAmoni, aba lulenge lunsania lwa luuzi Yaboki, aba miino insania zili mu miduko, aba biziki binsania byatuzugide Yehowa, Kalaga weitu.”