BaIsraeli bakinda mukota Ogi.
3
1 Nu atendile lingo bunee: “Kumbusa twagalukile kwenda mu nzila za Basani. Nu Ogi mukota wa Basani, atubaside, we nu bakoloboyo bage bansania ku bita ku Edirei. 2 Yehowa ambwide bunee: ‘Ntumukue boba, kubuno namukasa kumuli, we nu bantu bage bansania nu kisi kyage. Mwabakitile anga bumwakitide Sihoni mukota wa baAmori wikalaga mu Hesiboni.’ 3 Ububo Yehowa, Kalaga weitu, atukasile Ogi mukota wa Basani gamozi na bantu bage bansania. Twabazikizye nu takwasigede wampa. 4 Twakindile miino zabo insania mu nkungu zezo. Takuli mwino u tutakindile. Twatikizye kubeli miino makumi mutuba nu kinana zabezaga mu kisi kya Argobu, u bukota bwa Ogi, nu Basani. 5 Miino zezo insania zabezaga na mikolo milazi nu nibi nu bilimba, gamozi na miino mikeke mingi geteli mikolo. 6 Twabazikizye nunsania anga butwakitile ku Sihoni mukota wa ku Hesiboni, ee, twazikizye nunse bamulume nu bakikulu nu bana ba mwino na mwino. 7 Tondo bituganwa binsania nu bikulo bya miino twabitolile ku ntiko zeitu. 8 Mu bindi bibyo twatikizye kisi kya bakota babili ba baAmori babezaga ku lulenge luluno lwa luuzi Yordani, kutukila luuzi Arnoni aaba nu ku mwiduko wa Hermoni. 9 Babo bantu ba mwino Sidoni bakumana mwiduko wozo Sirioni, tondo baAmori bakugumana Seniri. 10 Twakindile nu twakatile miino insania zili mu kisi kya Gileadi nu mu bukota bwa Ogi mukota wa Basani, aaba nu Saleka nu Edirei. 11 Kubuno tugu Ogi mukota wa Basani u muzinda wasigede ku baRefaimu. Mugu wage wabezaga mugu wa kyuma. Bulazi bwago bwabezaga mabusu mubula, nu bungulu bwago mabusu manazi. Guki wamoneka ku mwino wa Raba ku baAmunoni aaba nu lelo.
Kikyo kisi kyakaswa ku bikanga bibili nu kyindi.
12 Kikyo kisi kitwakindile, kutukila ku Aroeri guli bwigi na luuzi Arnoni aaba nu munkatini mwa miduko za Gileadi, u kyindi kyazo, gamozi na miino za kikyo kisi, nakasile baRubeni nu baGadi. 13 Kyindi kikyo kyasigala kya Gileadi gamozi na kinsania kya Basani, u bukota bwa Ogi, nakasile ku kyindi kya kikanga kya Manase. Kisi kinsania kya Argobu nu kinsania kya Basani byamaninwe Kisi kya baRefaimu. 14 Yairi mwana wa Manase atolile kisi kinsania kya Argobu, aaba nu ku mwaga wa baGesuri nu wa baMakati, nu akimanine n'izina lyage wenyene, u Hawoti-Yairi, aaba nu lelo. 15 Nakasile Gileadi ku Makiri. 16 Nakasile baRubeni nu baGadi kutukila Gileadi aaba nu ku luuzi lwa Arnoni, munkatini mwa luuzi, guli mwaga wage, aaba nu ku luuzi lwa Yaboki, guli mwaga wa baAmoni. 17 Nu kisi kyamanwa Araba, u kisi kyabota kili na luuzi lwa Yordani u mwaga wakyo, kutukila Kinereti ku lulenge kukutukaga kisongo kya busi lwa kitatenge kya Araba, u kitatenge kya Munkange, ku mwiduko wa Pisiga.
18 Namukakizizie mu nkungu zezo bunee: ‘Yehowa, Kalaga weinyu, amukasile kisi kikino buno mukiyane. Inyuwe bansania beli mapuka, sokazi luuzi lwabusio lwa mibuto zeinyu, u baIsraeli, na ngabo zeinyu. 19 Tondo bakikulu beinyu nu bana basigale mu miino zinamukasile, gamozi na bituganwa byeinu. Nizi buno muli nabyo byingi. 20 Basigale mumo aaba nu gabobelezie Yehowa mibuto zeinyu anga bwamubobelezizie inyuwe, nu bo beiyane kisi kyabakasile Yehowa, Kalaga weinyu, lisilya lya Yordani. Kumbusa muntu na muntu asubye ku bwiyani bunamukasile.’
21 Ku nkungu zezo nakakizizie Yosua bunee: ‘Wamona ku bunsania bwakitile Yehowa, Kalaga wobe, ku babo bakota babili. Bubo u bwakiteYehowa ku makota mansania mawasoke kwingila mumo. 22 Tamumakue boba, kubuno Yehowa, Kalaga weinyu, eli wozo wakumwitanina.’
Musa ntavwama kwingila mu kisi.
23 Mu nkungu zezo nasegile ku Yehowa. Namutendile bunee: 24 ‘Ee Yehowa, Mwiya Bwangato Bunsania, walingile kulolesia mukiti wobe bunene bwobe, nu magala ma kuboko kwobe, kubuno kango kalaga kakizi keli mwigulu aba mu kisi kinsania kanavwama kukita anga buwakitile na magala mobe nu mu bwangato bwobe? 25 Nkukusega nisoke, nimone kisi kikyo kisoga kili lisilya lya Yordani, u kisi kisoga kya mwiduko, nu Lebanoni.’
26 Tondo Yehowa anongedwe ku kabamba keinyu, nu ntanungwilide. Yehowa ambwide bunee: ‘Bwakuka. Ntutende lingo na Nne kitondo kikino. 27 Bakama gantonga za Pisiga nu tambia meiso mobe ku ndenge insania, kubuno ntwasoke luuzi luluno lwa Yordani. 28 Tondo kakizia Yosua nu kumukokomezia mutima na magala, kubuno we asoke lwabusio lwa bantu babano nu kubeiyania kisi kiwamonako.’
29 Ububo twikede mu kibitabita kili ku lulenge lwa Beti-Peori.”