Musa abakakizizie kulanga milembe.
4
1 Nu atendile lingo bunee: “Inyuwe baIsraeli, ungwililazi lelo milembe nu makakizio mankumwigisia buno mwamakite, buno mulame nu mwingile mu kisi kyakasile Yehowa, Kalaga ku basoinyuwe. 2 Tamutalikile iyuki limozi gantata ga binamukakizizie, aba tamutikye kubyo, buno mwanze makakizio ma Yehowa, Kalaga weinyu. 3 Mwamonine na meiso meinyu ku binsania byakitile Yehowa ku Bali-Peori. Yehowa, Kalaga weinyu, azikizye munkatini mweinyu bansania bayangile Bali, u kalaga ka Peori. 4 Tondo beinyuwe bayangile Yehowa, Kalaga weinyu, muki mwalama aaba nu lelo. 5 Namwigisizie milembe nu makakizio anga bwankakizizie Yehowa, Kalaga wane, buno mumanze mu kisi kimwiyane. 6 Mwanze mo lebelebe; u bumwalolesie bango bantu menge nu bumenyinino bweinyu. Kungwa bongwa ku makakizio mamano batende bunee: ‘Lebelebe kilongo kikino kili na menge nu bumenyinino.’ 7 Kingo kilongo kikizi kili na kalaga bwigi nakyo anga buli Yehowa, Kalaga weitu, bwigi n'iswe? Akutungwilila mambizi mansania matukumumana. 8 Kingo kilongo kikizi kili na milembe nu makakizio meisanana anga buli milembe insania zinamukasa lelo?
9 Idangazi nu lindiazi mitima zeinyu, buno tamwibilile bitondo bibino bimwamonako nu tabituke mu tulenganio tweinyu ku bindi binsania bya kalamo keinyu. Igisiazi bana beinyu nu bayukulu beinyu bitondo bibino binsania. 10 Beigisiazi bitondo bya busi bumwemenne lwabusio lwa Yehowa, Kalaga weitu, kuko ku Horebu, nkungu zambwide Yehowa bunee: ‘Nkundamanizie bantu buno bongwe moki mane buno beiyigisie kunkua boba bindi binsania bya kalamo kabo, nu beigisie bana babo.’
11 Mwankundile nu kwemana kunsi kwa mwiduko, nu mwiduko wagulumine keiya kanene kwigulu, nu kwabezaga kapilo nu bimpa nu mikulumino. 12 Yehowa atendile n'inyuwe gaabezaga munkatini mwa keiya, nu mungule ku iyuki lyage tondo tamwamonine ku kisusania kyage. 13 Amusambalide idagano lyage lyamukasile buno mwalyanza, u Milembe Ikumi. Lingo azisanzile ku makozi mabili. 14 Mu nkungu zezo Yehowa ankakizizie milembe nu makakizio mamwanze mu kisi kimwasoke kwiyana.
15 Idangazi nunse, kubuno tamwamonine ku kisusania aba ku lukita lwage, gatendaga Yehowa n'inyuwe mu keiya. 16 Tamukite nkisi ku kisusania kya muntu, aba wamulume aba mukikulu, 17 aba kisusania kya nyama insania za mu kisi, aba tuzoni tunsania twa mu mpelela, 18 aba kinsania kikugelegeta gansi, aba kyena kinsania kili mu mazi. 19 Idangazi mu nkungu za kutambia meiso kwigulu nu kumona ku kisongo kya busi aba mwezi aba nkeninkeni, u zezo za kwigulu zakasile Yehowa, Kalaga weinyu, ku bilongo binsania bili kunsi kw'igulu. Tamulutwe nazo kuzikumbamina nu kuzikitila. 20 Tondo Yehowa amutikizye ku malindiko mabibu, mabezaga anga iyambi lya keiya kakali kakunyengula kyuma. Ee, amutikizye mu Misri, buno mwabe bantu bage anga bumuli lelo.
21 Lingo Yehowa anongedwe ku kabamba keinyu, nu alumbide buno nsikasoka Yordani, aba nsikeingila mu kisi kyamukasile Yehowa, Kalaga weinyu kukiyana. 22 Umpanga nakue mu kisi kikino. Nsyasoke Yordani, tondo inyuwe mwalusoke nu mwiyane kikyo kisi kisoga. 23 Mwidange nunse. Tamwibilile idagano lya Yehowa, Kalaga weinyu, lyakitile n'inyu. Tamukite nkisi za kisusania kinsania zikusomba Yehowa, Kalaga weinyu, 24 kubuno Yehowa, Kalaga weinyu, eli anga keiya kakugisia nunse, eli Kalaga wa lugi.
25 Nkungu zimukabuta bana nu bayukulu, u bindi bimwabe bakungu mu kisi, ndi mwakite bubi nu kukita nkisi za kisusania kinsania, nu kukita mibi lwabusio lwa Yehowa, Kalaga weinyu, nti mwamwongie.
26 Lelo nkumana igulu nu kisi kuba balongeki, buno ku nkungu nkeke mwazike nunse mu kisi ga mwasoke Yordani kwiyana. Tamukeikala bindi byingi mukyo, tondo mwazike nunse, 27 nu Yehowa amubalanganie mu bilongo, nu mwasigale bantu bakeke, ta beingi, munkatini mwa baBilongo, kuko kwamwenzie Yehowa bulazi. 28 Kuko mwakitile tulaga twakitwa na bantu, u tulaga twa miti aba twa makozi, tutakumona aba kungwa aba kugila. 29 Nu gago mwalonde Yehowa, Kalaga weinyu, nu mwamumone, ndi mukumulonda na mutima unsania nu muuza unsania.
30 Ku nkungu zimuli na mbabazio, nu bitondo bibino binsania byamubasile ku bindi bya kuzinda, nti mwasubye ku Yehowa, Kalaga weinyu wa mponga, nu kumungwilila, 31 Kubuno Yehowa, Kalaga weinyu, eli Kalaga wa kyombo, ntamusige aba kumuzikya, aba kwibilila idagano lyalagile basoinyuwe.
32 Buziazi ku ndenge insania za kisi, ndi kutukila busi bwabumbile Kalaga bantu ga kisi, ndi bantu bongule kitondo kikino kinene anga kikino kyabede kumuli. 33 Ndi kuli bantu bongule ku iyuki lya Kalaga likutenda kutuka ku keiya anga bumungule nu kulama? 34 Aba ndi kuli kango kalaga kendile kwidondela kilongo kyage nu kukitikya mu kingo kilongo na malindiko nu tulolesio, na bwa kwangamia nu na bita nu na kuboko kwa magala nu kwalambibwa, nu na kwitia boba bunene, anga bwamukitide Yehowa, Kalaga weinyu, ku Misri lwabusio lweinyu?
35 Beinyuwe mwalolesizibwe bitondo bibino, mumenye buno Yehowa eli Kalaga wa bulili, nu takuli ungo, We tugu. 36 Mungwilide iyuki lya Kalaga lyatukile kwigulu buno amwigisie, nu amulolesizie keiya kage kanene mu kisi, nu mungule ku iyuki lyage lyatukile mu keiya kako. 37 Kubuno atundile basoinyuwe, amusombwede beinyuwe bana babo, nu amutikizye mu Misri We wenyene na magala mage manene. 38 Apumbizie bingo bilongo binene nu bya magala kumutinga, buno amwingizie mu kisi kyabo nu kumwiyania kyo, anga buli lelo. 39 Ububo, lelo menyazi mu mitima zeinyu buno Yehowa eli Kalaga wa kwigulu nu wa mu kisi kinsania, nu takuli ungo. 40 Ukinsa anzazi milembe zage nu makakizio mage mankumukakizia lelo, buno beinyuwe nu bana beinyu mwalame busoga, nu kwikala bindi byingi mu kisi kikumukasa Yehowa, Kalaga weinyu, ku milyalya.”
Miino za kutinina.
41 Nkungu zezo Musa asombwede miino isatu ku lisa lya Yordani, ku lulenge lwa kukutukaga kisongo kya busi, 42 buno wozo ukwita munyage geteli kumukambila aba ntamusombile, anavwama kutinina ku mwino umozi wa zezo isatu buno alame, 43 u zeno: Bezeri mu kalula ka gantata ga miduko za kisi kya baRubeni, nu Ramoti mu Gileadi wa baGadi, nu Golani mu Basani wa baManase.
44 Wono guli mulembe wabikile Musa lwabusio lwa baIsraeli. 45 Bubuno buli bulongeki nu milembe nu nsungio zatendile Musa ku baIsraeli gabatukile ku Misri, 46 lisa lya Yordani mu kibitabita kya lulenge lwa Beti-Peori, mu kisi kya Sihoni, mukota wa baAmori, wikalaga ku Hesiboni. Musa nu baIsraeli bamwitile gabatukaga ku Misri. 47 Beiyanine kisi kyage nu kisi kya Ogi, mukota wa Basani, bobabili bakota ba baAmori beikalaga ku lulenge lwa kukutukaga kisongo kya busi lwa Yordani, 48 kutuka ku Aroeri, guli ku mutili wa luuzi lwa Arnoni, aaba nu ku mwaga wa mwiduko wa Siyoni u Hermoni, 49 nu Araba ku lisa lya Yordani, ku lulenge lwa kukutukaga kisongo kya busi, aaba nu ku kitatenge kya Araba, kunsi kwa musigulu wa Pisiga.