5
1 Musa akundamanizie baIsraeli bansania, nu ababwide bunee: “Inyuwe baIsraeli bansania, ungwililazi milembe nu nsungio zinkutenda kumuli lelo, buno mwiyigisie zo kuzilanga nu kuzikita. 2 Yehowa, Kalaga weitu, akitile idagano n'iswe ku mwiduko wa Horebu. 3 Nu Yehowa ntakitile idagano na batateiswe tugu, tondo na beiswe bansania beli lelo na kalamo gano. 4 Yehowa atendile na beinyuwe meiso ku meiso gaabezaga ga mwiduko mu keiya. 5 Nu nne nemanine gamusamba na Yehowa ku nkungu zezo, buno nimusambalile moki ma Yehowa, kubuno mwakule keiya boba nu tamwabakamine ku mwiduko. Yehowa abwide bunee:
6 ‘Nne nili Yehowa, Kalaga weinyu. Namutikizye mu kisi kya Misri nu mu numba za bukobe.
7 Tamube na tungo tulaga, Nne tugu.
8 Tamwikitile nkisi zabazwa ku kisusania kyampa kya kwigulu aba kya kisi aba kya mazi meli kunsi kwa kisi. 9 Tamuzikumbamine aba kuzikitila, kubuno Nne Yehowa, Kalaga weinyu, nili Kalaga wa lugi. Nkusungia bwagi bwa bantu bakunsomba ku bana babo aaba nu ku kibuti kya bisatu kyabo aba kya binazi, 10 tondo nkulolesia mponga ku tununu twa bantu, u babo bakuntunda nu kwanza milembe zane.
11 Tamutekule izina lya Yehowa, Kalaga weinyu, bulia, kubuno Yehowa asungie wozo muntu watekule izina lyage bulia.
12 Anzazi Busi bwa Kumunwa, u Sabato, buno buli bwa Yehowa, Kalaga weinyu, anga bwamukakizizie. 13 Kitazi milimo zeinyu mu bindi mutuba. Mubyo kitazi milimo zeinyu insania, 14 tondo busi bwa mutubakamo buli Sabato, u Busi bwa Kumunwa. Mubo tamukite mulimo unsania, uwe nu basikila nu bakinga bobe, aba mukobe wobe aba mukiti wobe, aba mulume wa ngombe aba mpunda aba kituganwa kinsania, aba mugeni uli mu mwino wobe, buno bakobe bobe, ndi bamulume aba bakikulu, bomunwe anga uwe, 15 nu mukakengela buno mwabezaga bakobe mu Misri nu Yehowa, Kalaga weinyu, alambizie kuboko kwage kumutikya kuko na magala mage. Ububo Yehowa, Kalaga weinyu, amukakizizie kwanza Busi bwa Kumunwa, u Sabato.
16 Anzazi basoinyuwe nu banyoko inyuwe anga bwamukakizizie Yehowa, Kalaga weinyu, buno kalamo keinyu kabe kalazi, nu busoga bwabe kumuli mu kisi kyamukasile Yehowa, Kalaga weinyu.
17 Tamwite ungo.
18 Tamukite butazi.
19 Tamwibe.
20 Tamwekele muneinyu buza.
21 Tamwelame mukikulu wa muneinyu, aba numba zage, aba isoa lyage, aba mukobe wage, wamulume aba wa mukikulu, aba mulume wa ngombe wage, aba mpunda zage, aba kinsania kyeli nakyo.’
22 Yehowa amutendile mamo moki mansania nkungu zimwakundamenne ku mwiduko. Abezaga ga mwiduko, mu keiya nu bimpa nu kapilo kakali, nu amutendile n'iyuki inene. Ntatalikile bingo bitondo, nu asanzile mamo moki ku mbavu ibili za makozi, nu ankasile zo.
Bantu bakua Kalaga boba.
23 Gamungule ku iyuki lyatukile mu kapilo nu keiya kaguluminaga ku mwiduko, bakota ba bikanga byeinyu nu bakulu bankundile. 24 Bambwide bunee: ‘Lebelebe Yehowa, Kalaga weitu, atulolesizie lutanuno, nu bunene bwage, nu tungule ku iyuki lyage lyatukile mu keiya. Lelo twamona buno Kalaga akutenda na muntu, nu wozo muntu alama. 25 Kubuni tukukua kano kaluma? Kubuno keiya kakano kanene kakutugisia, ndi tungwa lingo ku iyuki lya Yehowa, Kalaga weitu, nti twakue. 26 Munkatini mwa bantu bansania bakulamaga, nazi wungule ku iyuki lya Kalaga ukulamaga, likutenda nage, anga butungule, nu kulama? 27 Uwe tondo, kunda bwigi na Yehowa, Kalaga weitu, nu kungwilila binsania byakutenda, nu uwe utusambalile bibyo byakutende Yehowa, Kalaga weitu, nu iswe twabyungwilile nu kubyanza.’
28 Gongule Yehowa moki mamano mamwatendile abwide bunee: ‘Nungwa ku moki makutendile bantu babano, nu meli masoga. 29 Songo bindi binsania beli na mutima wono wa kunkua boba nu kwanza makakizio mane mansania, songo bwabe busoga kubeli, kubo nu ku bana babo ku milyalya. 30 Enda ubabule bunee: “Subyazi ku numba zeinyu za hema.” 31 Tondo uwe, emana bwigi na Nne, nu nakutende milembe nu makakizio mane mansania nu nsungio ziwabeigisie buno babyanze mu kisi kinkubakasa.’