Ikakizio linene kutinga mango mansania.
6
1 Nu atendile lingo bunee: “Lilino lili ikakizio lyakakizizie Yehowa, Kalaga weinyu, kumwigisia gamozi na milembe nu nsungio, buno mwabyanze mu kisi kimukeiyana, 2 buno mwakue Yehowa, Kalaga weinyu, boba bindi binsania bya kalamo keinyu nu kwanza makakizio mage mansania nu milembe zinakasa kumuli nu ku bana beinyu nu ku bayukulu beinyu, buno mwabe na kalamo ka bindi byingi, u kalamo kalazi. 3 Inyuwe baIsraeli ungwililazi nu kokomeziazi kuzikita buno busoga bwabe kumuli, nu mwatalikilwe nunse nu kuba beingi, anga bwamulagile Yehowa, Kalaga weinyu, nu mwikalage mu kisi kili na mabele nu buuki bwingi. 4 BaIsraeli, ungwililazi. Yehowa, Kalaga weitu, Yehowa eli umozi tugu. 5 Elamazi Yehowa, Kalaga weinyu, na mutima unsania na kalamo kansania nu magala meinyu mansania. 6 Moki mamano mankumukakizia lelo mabe mu mitima zeinyu. 7 Mukameigisia ku bana beinyu na komanizia, nu kumasambala kubeli, kungwa mwikala mu numba, nu kungwa mukwenda mu nzila, mu nkungu za kwiyombeka nu nkungu za kuyuka. 8 Mumakande ku kuboko aba ku malanga meinyu buno mabe tukengelezio kumuli. 9 Mumasanze ku miima ma nibi za numba, nu ku isula lya mwino.
Anzazi nunsania.
10 Gamwingizie Yehowa, Kalaga weinyu, mu kisi kyalagile basoinyuwe, Abrahamu, nu Isaka nu Yakobo, buno amukase miino minene misoga zimutobaka, 11 nu numba ziyala na bintu bisoga bimuteizazizie, nu tunuabalongo tumutombile nu masoa ma mizabibu nu bisanga bya zeituni zimutayikile, nu mwalie bibyo biguma nu kwikuta, 12 nti mwidange nunse buno tamwibilile Yehowa, wamutikizye mu kisi kya Misri nu mu numba za bukobe. 13 Kuazi Yehowa, Kalaga weinyu, boba nu kumukitila, nu kulumbila ku izina lyage.
14 Tamuyange tungo tulaga twa bilongo byamutimba, 15 kubuno Yehowa, Kalaga weinyu, ukwikalaga munkatini mweinyu eli Kalaga wa lugi, bongoa bwage bunavwa kuba bukali kumuli anga keiya nu kumuzikya mu kisi. 16 Tamulindike Yehowa, Kalaga weinyu, anga bumwamulindikile ku Masa. 17 Kokomeziazi makakizio ma Yehowa, Kalaga weinyu, nu bulongeki bwa milembe zaamukakizia. 18 Kitazi bwisanana nu busoga ku Yehowa, buno bwabe busoga kumuli, nu mwavwame kwingila nu kwiyana kisi kisoga kyalagile Yehowa ku basoinyuwe, 19 kupumbia beiti beinyu lwabusio lweinyu anga bwatendile Yehowa.
20 Mu bindi bikuvwa kungwa mwana amubuzia bunee: ‘Buni buli bwisulilwa bwa malongeki nu makakizio nu milembe zamukakizizie Yehowa, Kalaga weitu?’ 21 Nti mwakule mwana bunee: ‘Twabezaga bakobe ba Farao mu Misri, nu Yehowa atutikizye ko na kuboko kwage kwa magala, 22 nu ku meiso meitu Yehowa akitile tulolesio tunene nu miganogano minene, ku baMisri nu ku Farao nu ku babo bansania ba numba zage. 23 Kumbusa atutikizye kuko nu kutwingizia mu kisi kyalagile kukasa ku batateiswe. 24 Yehowa atukakizizie kukita zeno milembe insania, nu kukua Yehowa, Kalaga weitu, boba, buno tumone busoga bindi binsania nu atulange mu kalamo keitu, anga buligo lelo. 25 Kukita bubo kuli bwisanana bweitu, ndi twakokomezia kukita mamano makakizio mansania ku meiso ma Yehowa, Kalaga weitu, anga bwatukakizizie.’”