7
1 Nu atendile lingo bunee: “Gamwingizie Mukota, Kalaga weinyu, mu kisi kikyo kukiyana, mwakinde bingo bilongo byingi, u baHiti, nu baGirgasi, nu baAmori, nu baKanana, nu baPerizi, nu baHivi, nu baYebusi, bili bilongo mutubakamo nu bili binene nu beiya magala kumutinga. 2 Gasile Yehowa, Kalaga weinyu, kumukasa byo nu mwabikinda, nti mwabizikye nunse. Tamukite idagano nabyo aba kulolesia bantu babyo mponga. 3 Tamusongelane nabo, tamukase bana beinyu bamukazi ku basikila babo, aba kutola bakinga babo kusongana na basikila beinyu. 4 Kubuno bagalukye bana beinyu kutanyanga nu kukitila tungo tulaga, buno bongoa bwa Yehowa bwabe bukali kumuli nu kumuzikya lubilo. 5 Tondo mwabakitile bubuno: Mwabungule tuyulo twabo, nu kukalikia mango mabo ma makozi byindibyindi, nu kwisa nkisi zabo mu keiya. 6 Kubuno muli kilongo kisanana ku Yehowa, Kalaga weinyu. Amusombwede inyuwe tugu kutinga bingo bilongo binsania bili ga kisi buno mube bantu bage. 7 Yehowa ntamutundile aba kumusombola kubuno mwabezaga beingi kutinga bingo bilongo, ee, lebelebe mwabezaga bakeke kutinga bingo bilongo binsania. 8 Tondo, Yehowa amusombwede kubuno amwelamine, nu ku kabamba ka kusililizia idagano lyalagile basoinyuwe, u kinsa Yehowa amutikizye mu numba za bukobe, na magala mage nu kumukulula ku kuboko kwa Farao mukota wa Misri. 9 Ukinsa mumenye buno Yehowa, Kalaga weinyu, eli Kalaga unakatizibwa, nu akokomezia idagano nu kyombo kyage ku bibuti tununu bya babo bakumwanza nu kukokomezia makakizio mage, 10 tondo akusungia babo bakumusomba mu kalamo kabo. 11 Ububo kokomeziazi makakizio nu milembe nu nsungio zinamukakizia lelo.
Ndi mwanza, nti mwamone mponga zeno.
12 Ndi mungwilila makakizio mamano nu kumanza nu kumakita, nti Yehowa, Kalaga weinyu, akokomezie idagano nu kyombo ky'idagano kyalagile basoinyuwe. 13 Amwelame nu kumukasa mponga nu kumwitizia. Akase mponga ku ibuta lyeinyu nu ku biguma bya kisi kyeinyu, nu ku mbuto zeinyu nu ku mazi ma biguma nu ku makiti meinyu, nu ku byana bya ngombe zeinyu nu ku byana bya mikoko zeinyu. Amukase zeno mponga insania mu kisi kyalagile basoinyuwe buno amukase kyo. 14 Mwakaswe mponga kutinga bingo bilongo binsania; mukikulu aba wamulume munkatini mweinyu ntabe mugumba, aba kituganwa takikaba kigumba. 15 Nu Yehowa atikye kumuli nsambo insania, nu ntazige zezo nsambo nkali nu mbi za Misri zimwamenyine, tondo azibike ku babo bansania bakumusomba.
16 Mwazikye bibyo bilongo binsania byamukasa Yehowa, Kalaga weinyu. Tamube na kyombo kubeli nu tamukitile tulaga twabyo, kubuno kukita bubo kwabe itega kumuli. 17 Embe munatenda mu mitima zeinyu bunee: ‘Bilongo bibino byatutinga. Buni butunabikinda nu kwiyana kisi kyabyo?’ 18 Tamubikue boba. Kengelazi bwakitile Yehowa, Kalaga weinyu, ku Farao nu ku baMisri bansania. 19 Kengelazi malindiko manene mamwamonineko, nu tulolesio nu miganogano zakitile Yehowa, Kalaga weinyu, na kuboko kwage kwa magala nu kuboko kwalambizibwe, gaamutikizye mu kisi kyabo. Bubo u bwakite Yehowa, Kalaga weinyu, ku bilongo binsania bimukukua boba. 20 Yehowa, Kalaga weinyu, asinge lusungu munkatini mwabo, aaba nu babo bakusigala nu kwibisa bazikibwe.
21 Tamubakue boba, kubuno Yehowa, Kalaga weinyu, uli munkatini mweinyu, eli Kalaga munene nu ukwangamia bantu. 22 Yehowa, Kalaga weinyu, azikye bilongo bibyo bukebuke. Tamubazikye bansania limbizi limozi, nyama za mu lubanda zinavwa kwitila ningi, 23 tondo Yehowa, Kalaga weinyu, abagabule kumuli nu kubakinda, aaba nu bazikibwe. 24 Agabule bakota babo kumuli nu mwazimizie meina mabo mu kisi.