Kengelazi Mukota Kalaga weinyu.
8
1 Nu atendile lingo bunee: “Mwanze makakizio mansania manamukakizia lelo, buno mulame nu kwitila nu kwingila kwiyana kisi kyalagile Yehowa ku basoinyuwe. 2 Kengelazi ngendo zamusondelezizie Yehowa, Kalaga weinyu, mu kalula ku myaka makumi manazi buno amubotye nu kumulindika nu kumenya buni buli mitima zeinyu, ndi mwanza makakizio mage aba kilo. 3 Ububo amubotezie nu amwitabizizie kukua na nzala nu kumulisia mana mamuteizi, aba basoinyuwe tabamenyine, buno amumenyesie buno bantu tabakulamaga na kampampa tugu, tondo bantu bakulamaga na moki mansania matenda Mukota Kalaga. 4 Nsulu zeinyu tazakungukile nu magulu meinyu tamatumbile ku zezo myaka makumi manazi. 5 Kengelazi mu mitima zeinyu buno anga bukwana muntu mwana waabutile, ububo Yehowa, Kalaga weinyu, akumwana. 6 Ukinsa mwatunganana kwanza makakizio ma Yehowa, Kalaga weinyu, nu kwenda mu nzila zage nu kumukua boba. 7 Kubuno Yehowa, Kalaga weinyu, amwingizie mu kisi kisoga, u kisi kya nuuzi nu tunuabalongo tukubasia mazi mu mpinga nu mu miduko. 8 Kisi kikwasia ngano nu shayiri nu mizabibu nu miti za mitini nu komamanga, u kisi kya makiti ma zeituni nu buuki. 9 Mu kikyo kisi tamwakue na nzala nu tamwide kampa. Mukyo muli makozi ma byuma, nu munavwama kumba nsubi mu miduko zakyo. 10 Gamwalie nu kwembuka, nti mwaganune Yehowa, Kalaga weinyu, ku kabamba ka kisi kisoga kyamukasile.
11 Mwikokomeziazi kukengela Yehowa, Kalaga weinyu, buno tamwibilile makakizio nu nsungio nu milembe zage, zinamukakizia lelo. 12 Gamwalie nu kwembuka, nu kobaka numba nsoga nu kwikala muzo, 13 nu ngombe nu mikoko zeinyu gazikwitila, nu feza nu olo zatalikwa, nu binsania byeinu bili byingi, 14 idangazi nunse buno tamube na lwikotio nu kwibilila Yehowa, Kalaga weinyu, wamutikizye mu kisi kya Misri, nu mu numba za bukobe. 15 Amusondelezizie mu kalula kakano kanene ka kukua boba, nu muko muli nzoka zili nkali anga keiya, nu nkutu, nu kili kisi kya mpusia, u kiteli na mazi. Yehowa amulusizie mazi matukile mu ikozi ibibu, 16 nu amulisizie na mana matamenyine basoinyuwe, buno amubotye nu kumulindika, buno mu bindi byavwe amukitile busoga. 17 Mu zezo nkungu mwidangazi nunse buno tamutende mu mitima zeinyu bunee: ‘Twakitile busoga bubo na mpumba zeitu nu na magala meitu.’ 18 Tondo kengelazi Yehowa, Kalaga weinyu, kubuno We amukasile magala ma kukita bubo. Akumukasa mamo magala nu menge buno alindie idagano lyalagile basoinyuwe, anga buli lelo.