Musa akengela lunano lwa baIsraeli.
9
1 Nu atendile lingo bunee: “Inyuwe baIsraeli, ungwililazi! Lelo muli kayikayika kusoka lulo luuzi Yordani mwingile nu kwiyana kisi kya bilongo bili binene nu bya magala kumutinga, miino zakyo zili minene nu zili na mikolo milazi zasakama nunse. 2 Bantu beli banene nu balazi, u bantu ba Anaki. Mungule bukutendwa bunee: ‘Nazi unavwama kwemana lwabusio lwa baAnaki?’ 3 Ukinsa menyazi lelo buno Yehowa, Kalaga weinyu, eli wozo ukwenda lwabusio lweinyu anga keiya kakuzikya, nu We wenyene abazikye buno mwabakinde nu kubapumbia lubilo, anga bwamutendile Yehowa. 4 Gabapumbie Yehowa, Kalaga weinyu, tamutende mu mitima zeinyu bunee: ‘Yehowa abapumbia ku kabamba ka kwisanana kweitu nu kutwingizia kwiyana kisi kikino,’ kubuno Yehowa abapumbie ku kabamba ka bwagi bwabo. 5 Mukwingila mu kisi kikyo nu kukiyana, ta ku kabamba ka kwisanana kweinyu, tondo ku kabamba ka bwagi bwa bibyo bilongo, Yehowa, Kalaga weinyu, akubipumbia lwabusio lweinyu, nu ku kabamba k'idagano lya Yehowa ku basoinyuwe, u Abrahamu nu Isaka nu Yakobo, buno alizindilizie. 6 Ukinsa menyazi lebelebe Yehowa, Kalaga weinyu, ntakumukasa kisi kikino kisoga kukiyana ku kabamba ka kwisanana kweinyu, kubuno muli beiya mitima mibibu.
7 Kengelazi, tamwibilile buni bumwongezie Yehowa, Kalaga weinyu, mu kalula. Kutukila busi bumwatukile mu Misri aaba nu mwabasile gano mwabezaga baguni ba Yehowa. 8 Mwongezie Yehowa lingo mu Horebu, nu amwongedwe nu abezaga kayikayika kumuzikya. 9 Ganabakamine mwiduko kumutolela mbavu za makozi, u mbavu z'idagano lyalagenne Yehowa n'inyu, nikede ku mwiduko bindi makumi manazi, musi nu kindi geteli kulia aba kunua. 10 Nu Yehowa ankasile mbavu ibili za makozi na moki mansania mabwide Kalaga masanzilwe na munwe wa Kalaga, ee, moki mansania maamubwide gaabezaga mu keiya bubo busi bwa musanganano gansi ku mwiduko.
11 Kumbusa kwa bibyo bindi makumi manazi Yehowa ankasile zezo mbavu ibili z'idagano. 12 Mu nkungu zezo, Yehowa antendile bunee: ‘Tuka gano, gela yiliyili, kubuno bantu bawatikizye mu Misri bagaluka kutuka mu nzila zinabakakizizie. Bakitile bubi nunse; banyengwide olo kuzikita nkisi.’
13 Mu nkungu zezo Yehowa ambwide lingo bunee: ‘Namona ku babo bantu buno beli na mitima mibibu. 14 Nsige nibazikye nu kuzimizia izina lyabo ga kisi, nu nakukitile kingo kilongo kinene kubatinga.’
15 Ububo nagelile mwiduko, nu mwiduko wabangaga keiya, nu nabezaga na zezo mbavu ibili z'idagano ku maboko mane. 16 Nu namonine buno mwagide Yehowa, Kalaga weinyu, kubuno mwanyengwide olo kuzikita nkisi zasusania kyana kya ngombe. Mwasila kugaluka nu kutuka mu nzila zamukakizizie Yehowa. 17 Nisile zezo mbavu ibili zabezaga ku maboko mane nu kuzibugya lwabusio lweinyu. 18 Nagwede lwabusio lwa Yehowa bindi makumi manazi musi nu kindi, nsyalide aba kunua ku kabamba ka bwagi bweinyu bunsania, bumwakitide Yehowa, buno mumwongie. 19 Nakule bongoa bwa Yehowa boba, kubuno abezaga kayikayika kumuzikya, nu lingo limbizi Yehowa ongwilide isego lyane. 20 Nu Yehowa ongedwe lingo Haruni nunse, nu abezaga kayikayika kumuzikya, nu nasegede Haruni. 21 Nu natolile kikyo kyana kya ngombe kimwakitile, nu kukigisia mu keiya, nu kukibungula byindi byindi nu kukigoga kuba mukungu, nu kuwisa mu luuzi lwatuka ku mwiduko.
22 Nu ku Tabera mwongezie Yehowa, nu lingo ku Masa, nu lingo ku Kiburoti-Hatava. 23 Gamusingile Yehowa buno mutuke Kadesi-Barnea atendile bunee: ‘Zanzukazi, mwiyane kisi kinamukasa,’ mwagunine ikakizio lya Yehowa, Kalaga weinyu. Tamwamukatizizie aba kungwilila iyuki lyage. 24 Mwabezaga baguni ba Yehowa kutukila busi bunamumenyine.
25 Nu nagwede lwabusio lwa Yehowa bindi makumi manazi musi nu kindi, kubuno Yehowa atendile buno amuzikye. 26 Nasegile ku Yehowa bunee: ‘Ee Yehowa, Mwiya Bwangato Bunsania, ntuzikye bantu bobe beli bwiyani bwobe, u bantu bawakulwide nu banatikizye mu Misri na magala ma kuboko kwobe. 27 Kengela bakiti bobe Abrahamu, nu Isaka nu Yakobo; ntulole ku mitima mibibu za babano bantu aba ku bwagi bwabo aba ku mibi zabo. 28 Bantu ba kisi kikyo kiwatutikizye mukyo banatenda bunee: “Yehowa ntavwamine kubeingizia mu kisi kyabalagile, nu kubuno abasombile, abatikizye kubeita mu kalula.” 29 Tondo babo beli bantu bobe nu bwiyani bwobe, wabatolile na magala mobe manene nu na kuboko kwobe kuwalambizie.’”