Ingo mbavu za makozi.
10
1 Nu atendile lingo bunee: “Mu nkungu zezo Yehowa ambwide bunee: ‘Baza ingo mbavu ibili, anga zezo ntangi, nu bakama kuno kundi ku mwiduko nu kukita sanduku za muti. 2 Nu Nne nasanze moki manasanzile ga mbavu ntangi ziwabugizie, nu wazibike mu sanduku.’ 3 Ububo nakitile sanduku za muti wa musita, nu nabazile mbavu ibili za makozi anga zezo ntangi. Nabakamine mwiduko na zezo mbavu ibili ku maboko mane. 4 Nu Yehowa asanzile ga mbavu anga bwasanzile ga mbavu ntangi mamo makakizio mamubwide Yehowa gaabezaga mu keiya ku mwiduko ku busi bwa musanganano. Nu Yehowa ankasile zo, 5 nu nagalukile nu kugela mwiduko, nu nabikile mbavu zezo mu sanduku zinakitile, nuzo zabede mumo anga bwankakizizie Yehowa.
6 BaIsraeli batukile ku kiziki kya tunuabalongo twa baYakini nu bendile ku Mosera. Haruni akule kuko, nu ayikilwe gago, nu Eleazari mwana wage eiyanine mulimo wage wa busankoga. 7 Kutuka gago baIsraeli bendile ku Gudigoda, nu kutuka Gudigoda bendile ku Yotibata, u kisi kya nuuzi ningi. 8 Ku nkungu zezo, Yehowa asombwede kikanga kya baLawi, buno beeke Sanduku z'Idagano lya Yehowa, nu kwemana lwabusio lwa Yehowa nu kumukitila, nu kukasa mponga mu izina lyage, anga bubakukitaga aaba nu lelo. 9 Ububo baLawi tabeli na kyindi kya kisi aba bwiyani anga mibuto zabo. Yehowa eli bwiyani bwabo, anga bwabalagile Yehowa, Kalaga weinyu.
10 Lingo nikalile ku mwiduko bindi makumi manazi musi nu kindi anga limbizi litangi, nu Yehowa anungwilide lingo, nu eitabizizie kutamuzikya. 11 Mu nkungu zezo Yehowa antendile bunee: ‘Zanzuka, usondelezie bantu babano kwiyana kisi kinalagile beisibo buno nabakase kyo.’
Buni bwatunda Mukota Kalaga.
12 Inyuwe baIsraeli, kano kaluma buni bukutunda Yehowa, Kalaga weinyu, kumuli? Akutunda tugu mukue Yehowa, Kalaga weinyu, boba nu kumuyanga mu nzila zage insania, nu kumwelama nu kukitila Yehowa, Kalaga weinyu, na mutima unsania nu kalenganio keinyu kansania, 13 nu kukokomezia kukita makakizio ma Yehowa nu milembe zage zinamukakizia lelo, buno mulame busoga. 14 Lebelebe Yehowa, Kalaga weinyu, eli mwiya igulu lya meigulu nu binsania bili mu kisi. 15 Yehowa atundile basoinyuwe, nu asombwede kibuti kyabo, kukitunda gasamba bingo bilongo binsania, anga buli lelo. 16 Ukinsa monesiazi mitima zeinyu nu tamube na mutima mubibu.
17 Yehowa, Kalaga weinyu, eli Kalaga wa tulaga nu Mukota wa bakota, Kalaga Munene, Mwiya Mayombo nu wozo ukwangamia bantu, nu utakukutya bantu nu utakwitabizia nkaso za bwengelezi. 18 Akukitila nkubi nu musigala bwisanana. Akutunda bageni beli gatusamba nu kubakasa idia nu nsulu. 19 Su, tundanazi bageni, kubuno mwabezaga bageni mu kisi kya Misri. 20 Kuazi Yehowa, Kalaga weinyu, boba; mukitilazi, gomiazi nage, nu lumbilazi ku izina lyage. 21 We eli luganuno lweinyu, nu we eli Kalaga weinyu, wamukitide miganogano minene zamwitizie boba zimwamonine ko na meiso meinyu. 22 Basoinyuwe bagelile ku Misri na bantu makumi mutubakamo tugu, tondo Yehowa, Kalaga weinyu, akitile buno museli beingi kutinga nkeninkeni za kwigulu.”