Nkalilo za lwanzo.
11
1 Nu atendile lingo bunee: “Ukinsa elamazi Yehowa, Kalaga weinyu, nu kokomeziazi makakizio mage nu milembe zage nu nsungio zage, nu malagano mage bindi binsania. 2 Menyazi lelo nsikwigisia bana beinyu, kubuno tabamenyine aba kumona kusungia kwa Yehowa, Kalaga weinyu, aba bunene bwage aba magala ma kuboko kwage. 3 Tabamonine ku migeleko nu miganogano zage zaakitide Farao, mukota wa baMisri, nu ku bantu bage bansania mu kisi kya Misri, 4 nu buni bwakitide mayombo ma baMisri nu farasi nu tuyanga twabo mu Kitatenge Kyakisimana, kyabakokezie na mazi gabamuyangile. Ee, Yehowa abazikizye aaba nu lelo. 5 Tabamenyine buni bwamukitide Yehowa bitondo binsania mu kalula, aaba nu amubasizie kuno, 6 nu buni bwakitile ku Datani nu Abiramu, u bana ba Eliabu, mwana wa Rubeni. Kisi kyalimbukile nu kubamena nu bana babo nu binsania bya mu numba zabo, gamozi na numba zabo, munkatini mwa baIsraeli bansania. 7 Tondo mwamonine na meiso meinyu ku bitondo bibino binsania byakitile Yehowa. 8 Ukinsa, mwatunganana kwanza makakizio mansania manamukakizia lelo, buno mube na magala nu kwingila kisi kimwasoke luuzi luluno kukiyana, 9 nu buno mwikale bindi byingi mu kisi kyamulagile Yehowa ku basoinyuwe, nu ku kibuti kyabo. Kisi kikino kiyala na mabele nu buuki. 10 Kubuno kisi kimukwingila kwiyana takili anga kisi kya Misri, kimwatukile mukyo. Mwayikile mbuto na magulu mu lwamba lwabezaga bwigi na numba. 11 Tondo kisi kimukwingila kwiyana kili kisi kya miduko nu bibitabita, byalokwa na mbula za kwigulu, 12 nu Yehowa, Kalaga weinyu, akukilanga, kubuno meiso mage makulola kukyo bindi binsania kutukila kulinga kwa mwaka aaba nu kuzinda kwa mwaka.
13 Ndi mwanza makakizio mane manamukakizia lelo, nu kwelama Yehowa, Kalaga weinyu, nu kumukitila na mutima weinyu unsania ku kalenganio kansania, 14 nti namulokezye mbula ku nkiko na nkiko, buno mutubule mbuto nu biguma bya kukita mazi ma biguma, nu biguma bya makiti, 15 nu namukase bisugu bya kulisia bituganwa byeinu, buno mulie nu kwembuka.
16 Kokomeziazi mitima zeinyu, tazengelelwe buno mukitile tungo tulaga nu kutukumbamina, 17 bongoa bwa Yehowa bunavwa kuba bukali anga keiya kumuli, nu akande igulu buno mbula taziloke mu kisi nu mbuto tazase, nu inyuwe mwakue yiliyili mu kisi kisoga kyamukasa Yehowa.
18 Ububo bikazi moki mane mamano mu mitima zeinyu nu mu tulenganio tweinyu, nu bikazi kakengelezio ka moki mamano mu maboko meinyu, nu ku malanga meinyu buno mabe tulolesio kumuli. 19 Igisiazi bana beinyu moki mamano. Matendanazi mu nkungu za kwikala mu numba, nu za kwenda na magulu mu nzila, nu mu nkungu za kwiyombeka nu za kuyuka. 20 Masanzazi ku miima za numba zeinyu nu ku nibi zeinyu, 21 buno bindi byeinu nu bya bana beinyu bitalikilwe mu kisi kyalagile Yehowa ku basoinyuwe. Mukeikala mukyo bindi binsania byasigale igulu gantata kisi.
22 Ndi mwakokomezia makakizio mamano mansania manamukakizia lelo, u kwelama Yehowa, Kalaga weinyu, nu kwenda mu nzila zage insania nu kulandana nage, 23 nti Yehowa apumbie bilongo binsania lwabusio lweinyu, nu mwiyane bilongo binene bili na magala kumutinga. 24 Kiziki na kiziki kimukanyantaga kikaba kyeinyu kutukila kalula aaba nu ku miduko za Lebanoni, nu kutukila Kitatenge Kinene aaba nu ku Luuzi Furati, u kisi kya myaga zeno. 25 Takuli muntu wavwame kwemana lwabusio lweinyu, kubuno Yehowa, Kalaga weinyu, akeitia boba nu kugilimizia kisi kinsania kimukanyanta mukyo, anga bwamulagile.
26 Lolazi, nkubika lelo lwabusio lweinyu mponga nu kiswililo: 27 mponga, ndi mungwilila makakizio ma Yehowa, Kalaga weinyu, manamukakizia lelo, 28 tondo kiswililo ndi tamwanza makakizio ma Yehowa, Kalaga weinyu, nu ndi mwagaluka mu nzila zinamukakizia lelo, kuyanga tungo tulaga tumuteizi. 29 Gamubasie Yehowa, Kalaga weinyu, mu kisi kimwiyane, nti mwabike bantu ku mwiduko wa Gerizimu buno batende mponga, nu mwabike bango ku mwiduko wa Ebali buno batende kiswililo. 30 Miduko zeno, ndi tazili lisilya lwa Yordani ku lulenge lwa kukwenda kisongo kya busi, mu kisi kya baKanana bakwikalaga ku Araba bwigi na Gilgali, ku ntungo za kibitabita kya More? 31 Lebelebe mwasoke Yordani kwingila mu kisi nu kukiyana, u kisi kyamukasa Yehowa, Kalaga weinyu, nu mwakiyane nu kwikala mukyo. 32 Tondo mwatunganana kwikokomezia kulanga nu kukita makakizio mansania nu nsungio insania zinkumukasa lelo.”