Kiziki kimozi kya kukumbamina.
12
1 Nu atendile lingo bunee: “Zeno zili milembe nu nsungio zimukakitaga bindi binsania bimukalamaga mu kisi kyamukasa Yehowa, Kalaga wa basoinyuwe, buno mukiyane. 2 Lebelebe mwazikye biziki binsania bikukumbamina babilongo tulaga twabo. Bili gantata miduko zasakama nu gantata ga nkangamo nu gansina miti zili na nsamba. 3 Nu mwabungule tusenga twabo twa tuyulo nu kuketula mango mabo nu kugisia nkisi zabo za miti, nu kwisa gansi nkisi zabo zabazwa za tulaga twabo, nu mwazikye meina ma to nunsania mu kiziki kikyo.
4 Tamukumbamine Yehowa, Kalaga weinyu, anga bukukumbamina bantu babo tulaga twabo. 5 Tondo mwakundamane ku kiziki kyasombole Yehowa, Kalaga weinyu. Kyabe munkatini mwa bikanga byeinyu binsania buno abike izina lyage nu eikale gago. 6 Mweke kuko tuyulo tweinyu nu bisansa byeinu bya kugisibwa nu bisansa byeinu bya kyindi ky'ikumi, nu mitebe zimwakase nu nkaso za bilumbilo byeinu nu za lutundo lweinyu nu nkula za bituganwa, aba ngombe aba mikoko. 7 Nu gago mwalie lwabusio lwa Yehowa, Kalaga weinyu, nu mwabogeboge na bikanga byeinyu mu binsania byamukasile Yehowa, Kalaga weitu, mu mponga zage.
8 Tamukite anga butukukita gano lelo: na muntu na muntu kukita anga bwakukengela buno buli busoga, 9 kubuno tamubasa ku kyumuno nu bwiyani bukumukasa Yehowa, Kalaga weitu. 10 Tondo kungwa mwasoka Yordani, nu kwikala mu kisi kikumukasa Yehowa, Kalaga weinyu, buno mukiyane nu amukasa kyumuno munkatini mwa beiti beinyu, buno mwikale bulonge bukata, 11 nti Yehowa, Kalaga weinyu, wenyene asombole kiziki kyage kya kwikala gago, nu mwavwe kuko na binsania binamukakizia, u tuyulo twa kugisibwa na bisansa byeinu, nu byindi by'ikumi byeinu, nu mitebe zeinyu, nu nkaso za kilumbilo kimwalumbide nu za lutundo lweinyu zimwakase ku Yehowa. 12 Nu mwabogeboge lwabusio lwa Yehowa, Kalaga weinyu, inyuwe nu bana beinyu nu bakiti beinyu bamulume nu bakikulu, nu muLawi uli gamozi n'inyu, kubuno nteli na ntiko aba bwiyani gamozi n'inyu. 13 Mwidange tamukite tuyulo tweinyu twa kugisibwa mu kiziki na kiziki kimwamonako, 14 tondo mu kiziki kyasombole Yehowa munkatini mwa bikanga byeinyu, mwakite mu kyo tugu tuyulo tweinyu twa kugisibwa, nu mu kyo mwakite binsania binamukakizia.
15 ‘Munasesa nu kulia bimwatunda mu miino zeinyu ku nkungu na nkungu anga bwamukase Yehowa, Kalaga weinyu, mponga zage. Muntu na muntu analia, ndi eli waswaga aba ndi nteli waswaga, nu mwabilie bumozi na kulia nyama, anga mubale aba kilinkumbi. 16 Tondo tamulie mikila zazo, tugu kuzikubula gansi anga mazi.
17 Mu miino zeinyu tamulie kyindi ky'ikumi kya mbuto zeinyu, aba kya mazi ma biguma aba kya makiti meinyu, aba nkula za bituganwa byeinu binene aba bikeke. Tamulie tuyulo tweinyu twa bilumbilo nu tuyulo twa lutundo, aba bisansa bimwasakika ku Yehowa na maboko. 18 Tondo mwalie tutuno nu bisansa bibyo, nu bibyo byindi by'ikumi lwabusio lwa Yehowa, Kalaga weinyu, mu kiziki kyasombola Yehowa, Kalaga weinyu, wenyene. Na muntu na muntu alie gamozi na basikila nu bakinga, nu bakiti bamulume nu bakiti bakikulu, nu muLawi uli gamozi n'inyu, nu mwabogeboge lwabusio lwa Yehowa, Kalaga weinyu, mu binsania bimukukita. 19 Idangazi buno tamwibilile baLawi, tamubakitile idungia bindi binsania bimwikalage mu kisi kyeinyu.
20 Kungwa Yehowa, Kalaga weinyu, atalikila myaga zeinyu anga bwalagile, nu mwatende bunee: ‘Nalie misuna anga bukutunda mutima wane,’ nti munavwama kulia misuna zakuka anga bumukutunda. 21 Ndi kiziki kyasombola Yehowa, Kalaga weinyu, kili bulazi n'inyu, nti munasesa ngombe aba mukoko wamukasile Yehowa anga bunamukakizizie. Mwalie misuna zakuka, anga bumukutunda, mu numba zeinyu. 22 Anga bukulibwa mibale nu bilinkumbi, u bumulia bituganwa bibyo, wozo muntu waswaga nu wozo muntu utaswaga abilie. 23 Tondo mwidange nunse buno tamulie mikila, kubuno mikila zili kalamo. Tamulie mikila na misuna. 24 Tamuzilie; mwazikubule gansi anga mazi. 25 Tamuzilie, buno bwabe busoga kumuli, nu ku bana beinyu kumbusa kweinyu, gamukukita bwisanana ku Yehowa. 26 Mwende ku kiziki kyasombola Yehowa na bintu byasililila tugu nu bimwalumbide ku Yehowa, 27 nu mwakase tuyulo twa kugisibwa, u misuna na mikila zazo, ga kasenga ka kayulo ka Yehowa, Kalaga weinyu, tondo mikila za tuyulo zakubulwe gansi ku kasenga ka Yehowa, Kalaga weinyu, nu mwalie misuna tugu. 28 Ungwililazi bitondo bibino binsania, nu idangazi kubikita ku milyalya, ndi mwakita bwisanana nu busoga ku meiso ma Yehowa, Kalaga weinyu.
Idangazi ku nkisi nu tulaga twa buza.
29 Nkungu zazikye Yehowa, Kalaga weinyu, bilongo bimwiyane, nu mwabipumbie nu kwikala mu kisi kyabyo, 30 idangazi, tamukatwe mu kubiyanga kumbusa kwa kubizikya n'inyu. Tamubuzie misagu za tulaga twabyo nu kutenda bunee: ‘Buni bwakitide bilongo bibino tulaga twabyo? Natunda kukita anga bubo.’ 31 Tamukumbamine Yehowa, Kalaga weinyu, bubo, kubuno bakitide tulaga twabo mu nzila insania zikusombaga Yehowa. Bakuzikya bana babo basikila nu bakinga mu keiya ka tulaga twabo. 32 Mwidange kwanza binsania binamukakizia; tamubitalikile aba tamubikokole.”