Lusungio lwa mulengania wa buza.
13
1 Nu atendile lingo bunee: “Ndi kwazanzuka mulengania munkatini mweinyu, aba muloti wa ndozi, nu we amukasa kalolesio aba iganogano, 2 nu kalolesio aba iganogano lyabase nu ageleka kumuluta nalyo nu kutenda bunee: ‘Tukumbamine nu kukitila tungo tulaga tututeizi,’ 3 nti tamungwilile wozo mulengania aba wozo muloti wa ndozi, kubuno Yehowa, Kalaga weinyu, amulindike buno amenye ndi mukumutunda na mutima unsania nu kalenganio keinyu kansania. 4 Yangazi Yehowa, Kalaga weinyu, tugu, nu kumukua boba nu kukita makakizio mage nu kwanza iyuki lyage, nu kumukitila nu kulandana nage. 5 Mulengania nu muloti wa ndozi wa lukita lulo beitwe, kubuno bamulutile kuguna Yehowa, Kalaga weinyu, nu kumugalukya mu nzila zamukakizizie Yehowa, Kalaga weinyu, buno mwende muzo. Yehowa, Kalaga weinyu, amutikizye mu kisi kya Misri nu amukulwide mu numba za bukobe. Gamwite wozo mulengania nu wozo muloti wa ndozi, mwatikye bwagi buli munkatini mweinyu. 6 Ndi mubuto wobe, aba mwana wa nyoko, aba mwana wobe, musikila aba mukinga, aba mukazi wobe, aba mwida wobe u watunda, akukuluta mu lumbisombiso nu akutenda bunee: ‘Twende kukitila tungo tulaga tuteizi aba tutamenyine basoinyuwe, 7 u tulaga twa bilongo byatutimba, ndi bwigi aba bulazi n'inyu, kutukila kuzinda kwa kisi aaba nu ku lungo lulenge lwakyo,’ 8 nti tamumwitabizie aba kumungwilila nu tamumukwile kyombo aba kumubisa. 9 Tondo lebelebe mumwite. Kuboko kwa wozo wamungule kube kutangi kwa kumwita, nu kumbusa bantu bansania. 10 Lebelebe mwamwise makozi aaba nu akue, kubuno agelekile kumugalukya nu kumutikya ku Yehowa, Kalaga weinyu, wamutikizye ku Misri, mu numba za bukobe. 11 BaIsraeli bansania bongwe nu kukua boba, nu tabakite lingo bubi bubuno munkatini mweinyu.
12 Ndi mungwa musagu wa mwino umozi munkatini mwa zezo miino zamukasa Yehowa, Kalaga weinyu, mwikale muzo, buno mugo muli bantu bakutenda bunee: 13 ‘Bantu bamozi batukile munkatini mwa mwino wozo nu batendile bunee: “Twendazi kukitila tungo tulaga,” u tulaga tumuteizi’ 14 nti mwabuzie nu kulonda nunsania na komanizia ndi buligo lebelebe. Ndi lebelebe buli bulili buno bakitile bwagi bubo, 15 nti lebelebe mwazikya beiya mwino bansania na myene za nganda, nu kugubigia nunsania, nu binsania bili mugo nu bituganwa bili mugo na myene mikali za nganda. 16 Nu mwakundamanie ntiko insania za mwino ga mulungu nu kugisia na keiya, zibe lukaso ku Yehowa, Kalaga weinyu. Ntiko nu lwito lwasigala kalundo ku milyalya, nu mwino tagobakwe lingo gago. 17 Tamube na kena ka zezo ntiko zaswilililwa na Yehowa, buno Yehowa agalukye bongoa bwage kumuli nu amukwile kyombo nu kumukasa mponga nu kumutalikila bikanga anga bwalagile ku basoinyuwe.
18 Amukitile bubo ndi mungwilila iyuki lya Yehowa, Kalaga weinyu, nu kukokomezia makakizio mage mankumukakizia lelo, nu kukita bwisanana lwabusio lwa Yehowa, Kalaga weinyu.”