Misako zikusomba Kalaga.
14
1 Nu atendile lingo bunee: “Inyuwe muli bana ba Yehowa, Kalaga weinyu. Tamwisake nkembe nu tamwibege ga malanga meinyu ku kabamba ka bakuzi. 2 Kubuno muli kilongo kyasililila ku Yehowa, Kalaga weinyu, nu Yehowa wenyene amusombwede buno mube bantu bage batundwa kutinga bango bantu bansania beli ga kisi. 3 Tamulie kinsania kikusombwa na Kalaga. 4 Zeno u nyama zimwatunganana kulia: ngombe, nu mukoko, nu mpene, 5 nu nyama za mu lubanda, u nkita insania zili anga mubale nu kilinkumbi nu kangolo nu nkenge nu kaseti nu mpombi nu musege nu mpene nu mikoko za miduko. 6 Mulie tugu nyama zili na byondo nu zikubizula. 7 Munkatini mwa zezo zikuzibula nu zatika byondo, tamulie zeno: ngamia aba sungula aba mikumbi, kubuno zikubizula tondo tazatika byondo; tamuzilie. 8 Tamulie ngulube, kubuno zatika byondo tondo tazikubizula. Tamulie misuna zazo, aba kwitubya ku kitumba kyazo.
9 Munalia bibino ku binsania bili mu mazi: kinsania kili na byigi nu magamba, 10 tondo kinsania kiteli na byigi nu magamba tamukilie, kubuno takyaswaga kumuli.
11 Munalia tuzoni tunsania twaswaga, 12 tondo tamulie ndiu nu igulubwa nu mwimbi 13 nu kengewe nu kakozi nu mwewe ku lukita lwage, 14 aba nkita insania za bibombobombo, 15 aba mbuni aba nkita insania za nkozi, 16 aba sulukutu insania nnene aba nkeke, 17 aba mwari aba nderi aba munandi, 18 aba membe aba koikoi ku nkita insania nu hudihudi nu tukutu.
21 “Tamulie kinsania kyalekana geteli kubasia mikila zakyo; mukikase ku bageni beli mu miino zeinyu buno bakilie, aba kukikunzia ku mugeni, kubuno muli kilongo kyasililila ku Yehowa, Kalaga weinyu. Tamuyike kyana kya mukoko aba kya mpene mu mabele ma nina.
Mulembe wa kyindi ky'ikumi.
22 Mukase kyindi ky'ikumi kya matubulo ma masoa meinyu mwaka na mwaka. 23 Mwakilie lwabusio lwa Yehowa, Kalaga weinyu, ku kiziki kyasombole kubika izina lyage. Endazi kuko kulia kyindi ky'ikumi kya ngano aba shayiri, kya mazi ma biguma nu kya makiti, nu nkula insania za bituganwa bya ngombe nu mikoko nu mpene, buno mwiyigisie kukua Yehowa, Kalaga weinyu, boba nunse. 24 Gamutalikile Yehowa, Kalaga weinyu, matubulo meingi, embe tamwavwame kweka kikyo kyindi ky'ikumi aaba ku kiziki kyasombole Yehowa kubika izina lyage gago, kubuno nzila zabe ndazi, 25 nti munakigalukya kuba feza, nu kuzitola mu maboko, nu kwenda nazo ku kiziki kyasombole Yehowa, Kalaga weinyu. 26 Na zezo feza, munakunza kinsania kimukutunda, aba ngombe aba mukoko nu mazi ma biguma aba bingo bya kunua, u binsania bimukutunda, nu munabilia gago lwabusio lwa Yehowa, Kalaga weinyu, nu mwabogeboge gamozi na bikanga byeinyu. 27 Tamwibilile baLawi beli mu miino zeinyu, kubuno tabakeiyana gamozi n'inyu.