Mulembe wa mwaka wa mutubakamo.
15
1 Nu atendile lingo bunee: “Ku kuzinda kwa mwaka na mwaka wa mutubakamo mwakite isigililo. 2 Lukita lw'isigililo luli luluno: nawe nawe wambizie munyage, nti amusigilile kikyo kyamwambizie buno ntakisubye. Asigilile munyage aba mubuto wage buno ntalige nsombi kubuno kuli isigililo lya Yehowa lyasambalwa. 3 Munaligia mugeni, tondo tamuligie mubuto weinyu, kilo, mwamusigilile nsombi zage. 4 Yehowa, Kalaga weinyu, akamukasa mponga mu kisi kyamukasile, buno takwabe bazambi munkatini mweinyu, 5 ndi mwanza iyuki lya Yehowa, Kalaga weinyu, nu kukokomezia kukita makakizio mamano mansania mankumukakizia lelo. 6 Yehowa, Kalaga weinyu, akamukasa mponga anga bwamulagile, nu mukambya bilongo byingi, tondo inyuwe tamukamba kena, nu mukangata bingo bilongo tondo tabikamwangata. 7 “Ndi kuli muzambi mu miino zeinyu mu kisi kyamukase Yehowa, Kalaga weinyu, nti tamukande mitima zeinyu kweli nu kutamukwila kyombo, 8 tondo mumukandulile mutima nu kumwambya bibyo byakwiyanina. 9 Tamukengele mu mutima bunee: ‘Mwaka wa mutubakamo w'isigililo use bwigi,’ nu kutakwila mubuto weinyu kyombo nu kutamwambya kena. Ndi asega ku Yehowa ku kabamba kako, nti bwaganzwa bwagi kumuli. 10 Mwatunganana kumukasa kinsania, nu mwamukase kyo na mutima musoga, nu bubo Yehowa, Kalaga weinyu, amukase mponga ku bitondo binsania bimunakitaga. 11 Bazambi tabanasila mu kisi kyeinyu. Ububo kwilazi mubuto weinyu kyombo nu bazambi nu bansania bakwiyanina kena beli mu kisi kyeinyu.
Mulembe wa bakobe.
12 Mubuto weinyu uli muIsraeli, wamulume aba mukikulu, ndi akunzibwa kuguli nu kukukitila myaka mutuba, nti watunganana kumukandula ku mwaka wa mutubakamo. 13 Mu nkungu za kumukandula buno atuke ku bukobe, ntumwenzie buliabulia, 14 tondo mukase bimozi bya bituganwa nu nkindi za mbuto nu za mazi meinyu ma biguma, anga bwakukasile Yehowa, Kalaga weinyu, mponga. 15 Mukengele buno mwabezaga bakobe mu kisi kya Misri nu Yehowa, Kalaga weinyu, amukulwide. Ububo nkumukakizia kitondo kikino lelo. 16 Tondo ndi akubula bunee: ‘Nsikutunda kwenda nu kukusiga’ kubuno akukutunda, uwe nu kikanga kyobe, kubuno akubogaboga nobe, 17 nti ku mwima wa lwibi lwa numba zobe ubotole kutuzi kwage na kyuma kya kubotola, nu abe mukobe wobe bindi binsania.
Kita bubo ku kalemba kobe.
18 Tabube bubibu kuziga buno atuke kuguli nu kwenda, kubuno akukitide myaka mutuba anga mukiti waswaga kuligwa mambizi mabili. Ndi mwakita bubo, nti Yehowa, Kalaga weinyu, amukase mu binsania bimwakitage.
Mulembe wa nkula za bituganwa.
19 Kasanazi nkula za bituganwa ku Yehowa, Kalaga weinyu. Tamukite mulimo na nkula za ngombe, nu tamusese myoza za nkula za mikoko aba mpene. 20 Muzilie, muntu na kikanga kyage, lwabusio lwa Yehowa, Kalaga weinyu, mu kiziki kyasombola, nu kitazi bubo na mwaka na mwaka. 21 Tondo ndi muzo muli kabalibango aba ndi zili kyuku aba kitunga, nti tamuzikase ku Yehowa, Kalaga weinyu. 22 Muzilie mu numba zeinyu, nu babo beisanana nu babo bateisanana bazilie, anga bumukuliaga kilinkumbi aba mubale. 23 Tondo tamulie mikila zazo; mwazikubule gansi anga mazi.”